24 مايو 2011

رسالة إلى قبيلة بني سويلم

حدث في أوائل صيف 2010 - أمريكا
"إيه رأيك في مبارك؟"
السؤال اللي "دانا" غيرت بيه الموضوع اللي كنا بنتكلم فيه وهو تقنيات التعليم اللي اتعرضت في المؤتمر في اليوم الأخير قبل الاستراحة
بعد تفكير وتردد في الإجابة بسبب استغراب السؤال قلت: " سمعت إن مجلة عملت تصويت على أكثر شعب مش بيحب رئيسه، والنتيجة إن مصر تصدرت التصويت، إدينا متقدمين في حاجة"
"دانا" ضحكت ضحكة خبيثة من بتوع الأفلام (السكة اتفتحت لها) وقالت هو مش ديموقراطي ومش...
قبل ما تكمل، قلت لها "بس هو مش بيصحى كل يوم الصبح يطلب من الشعب إنه يقعد يلعب على الكمبيوتر وقت الشغل ولو حد يروح يخلص حاجة في مصلحة يتعامل كأنه بيقاطع حاجة مهمة"
استغربت "دانا" شوية وحاولت تفسر "بس ده بسبب عبد الناصر اللي عمل قانون إن أي حد جامعي يقدم في وظيفة حكومية لازم يتقبل فده بيعمل تكدس وبيكونوا فاضيين"
أنا (في سري) "إخص هو عمل كدة؟" - بعدين رديت " بس مش مجبرين يلعبوا كوتشينة ع الكمبيوتر ممكن يتعلموا لغة جديدة من لغات الدول اللي بينا وبينها تعاملات اقتصادية وعلاقات استراتيجية أو دول لسة ماتعاملناش معاه، أو يتعلموا مهارات جديدة في الوقت الفاضي"
"دانا" بصت باستغراب شوية وسكتت، ما فهمتش قصدي إن "إن الله لا يغير ما بقوم حتى يغيروا ما بأنفسهم"
رجعت تكمل "أصل مبارك مش عارف يمسك العصايا من النص، يعني ممكن يعمل "شوية" ديموقراطية وفي نفس الوقت يحافظ على علاقاتها الخارجية، إحنا عايزين حليف قوي"
"إحنا؟ " كدة اتخنقت أنا بقة وقلبت، راحت حولت " وإيه رأيك في الأخوان؟" 
أنا (في سري) "يايوم مش فايت حد يشيلني من هنا" - ورديت "هم مجموعة منظمة، متلزمة دينيا ومعتدلة نسبيا، أفضل من مجموعات تانية ماشية مكشرة وبتكفر الناس"
"دانا" تنحت باين ماذكرتش كورس الناس التانية وبعدين ردت عليا "أصلهم قعدوا معانا وفهمونا إنهم معتدلين وقالوا لنا إن إحنا فاهمين غلط كلام القائد بتاعهم "اللي دخل السجن" اللي كاتب المنهج بتاعهم ، وقالوا لنا إحنا مش إرهابيين وإنتوا وصلتكم صورة غلط عننا، وإحنا اقتنعنا وشايفين إن ليهم حق يشاركوا في الحياة السياسية بس مبارك مش عارف يعمل ديموقراطية"
أنا (في سري) "إحنا واقتنعنا؟ إنتوا مين ياولاد اللذين؟ شوية وهتقولي "بيدينا الأمر"
الحمد لله الاستراحة خلصت، نجدة من الله، كان على طرف بقها سؤال كمان، ما عرفتوش بس وإحنا مروحين المصرية التانية اللي كانت في المؤتمر قالت لي إنها "اتجرجرت" في الأسئلة وكان آخر سؤال عن رأيها في "جيمي"
----------------------------------------------
بعد ما قامت ثورة 25 يناير - واحدة صاحبتي كانت مصرة إن أمريكا زعلانة على مبارك ولو تطول تشربه إكسير الحياة
وأنا كنت مصرة إنها مش زعلانة لأنها عارفة إن مفيش إكسير الحياة
خلاص أمريكا بتفقد مبارك لكبر سنه ومش عايزة جمال لأسباب كتير، اللي يضايق أمريكا طريقة خلع مبارك إنها تمت من غير اللي "بيديه الأمر" على حسب ما هم فاكرين نفسهم
مين كمان قال لنا "إحنا قامونا التوريث؟" أعضاء من المجلس
نراجع كدة
يوم 25 يناير كان متظاهرين -حتى لو مش كلهم -عايزين خلع مبارك بعدها بشوية انضم للمطلب ده كل من المجلس العسكري والبنتاجون الأمريكي، كل واحد منهم ليه أسبابه
فعقبال ما وصلنا ليوم 11 فبراير مرورا بالتصريحات المستفزة لأوباما والطقم بتاعه "Now is Now" (دلوقتي حالا)، اللي بتطالب مبارك بالرحيل لحد ما أعلن المجلس إنه في "انعقاد مستمر" وبدء صدور البيان الأول والتاني والثالث، وصلنا لتصادف توافق الرأي على خلع مبارك مابين الثوار والحكومة الأمريكية والمجلس العسكري.
يوم 12 فبراير نروح بيتنا؟
إحنا قلنا إيه؟ "الشعب يريد إسقاط النظام" وقلنا "عيش.. حرية.. كرامة إنسانية"
بعد 11 فبراير لحد النهاردة مستمرين في الطلب ده، هل الحكومة الأمريكية متفقة تماما معانا؟
لما المجلس في البيان أكد إنحيازه للمطالب "المشروعة" كان يقصد إن في مطالب هتكون "غير مشروعة" ولا إضافة الصفة للموصوف كان بغرض التأكيد؟
. طيب هل في مطالب "مشروعة" بس بتعارض مصلحة أمريكا؟ لو المجلس بدأ ينفذها هيترد عليه بخطاب "شديد اللهجة" من الحكومة الأمريكية وخصوصا إنها مسكانا بالمعونة وأكيد في اللي أكثر من المعونة "أمريكا والمخابرات بتاعتها"
. طيب المجلس العسكري لما يتجاهل مطالب من مطالبنا هل 
- عشان هو مش ناوي على الإصلاح؟
- عشان هو مقدم مصلحة أمريكا؟
- عشان هو شايف إن عدم معاداة أمريكا ده حماية لمصر؟
. طيب هل المليونيات ديه بتساعد المجلس العسكري إنه يتحجج قدام أمريكا إنه مضطر ينفذ مطالبنا وهو فرحان من جواه عشان عارف إن المطالب ديه "من أجل مصر أحسن"؟ ولا هيجيله إرشادات من أمريكا بتنويم الناس والتضحية بالبعض كبش فداء زي ما إحنا حاسين خصوصا مع التراخي الشديد؟

كتير من الأسئلة ماعنديش إجابة عليها بس عايزة أكتب اللي أنا متأكدة منه في الرسالة لقبيلة بني سويلم اللي شايفين إن ثورتنا الحرة تنفيذ مخطط أمريكي.

إلى قبيلة بني سويلم
1. مطلب خلع مبارك صادف مصلحة أمريكية في التخلص من جيمي، فحصل في لحظة ما توافق بين مصلحة البنتاجون والثوار،
2. أكيد إن حريتنا والديموقراطية الحقيقية والشفافية الكاملة والتطهير وإصلاح مصر، مش من مصلحة إسرائيل ولا البنتاجون الأمريكي بأي حال ولو أمريكا قالت هساعدكم تعملوا ديموقراطية يبقى ناوية تصدر لنا  "قناع الديموقراطية" بتاع "إمسك العصاية من النص"
أمريكا حالها يبكي والله شعبها صعبان عليا وأحوالهم الاقتصادية ف النازل وكذب حكومتهم عليهم بيزيد يوم بعد يوم وبقيت أكبر مديون في العالم ومع ذلك تقريبا في كل ثورة عشان الحرية بيتحرق العلم الأمريكي وتتردد هتافات ضد الحكومة الأمريكية.
- يابني سويلم جايز تتلخبطوا بسبب تصادف التوافق في النقطة 1 إنما تتهمونا وإنتوا واثقين؟ إزاي؟
لو إحنا تبع المخطط الأمريكي كنا رجعنا لحياتنا من أول ما خلصنا النقطة رقم 1
إنما عشان ده مش حقيقي فإحنا ناويين "نخرب" زي ما بتقول يابني سويلم إحنا هنخرب أي تدخل سافر في مصلحة مصر، إحنا هنخرب على "أوباما" أي محاولة لكسب الشعب المصري في صفه ويضحك عليه بفلوس هو عارف إنها أصلا فلوس مصر.
يابني سويلم اللي يثبت انحياز المجلس العسكري لمطالب الثورة المشروعة مش إنه يسقف لنا على رقم 1 ويحيينا تحية "إعزاز"، انحياز المجلس العسكري للمطالب هو:
- إنه مايفضلش واقف عند النقطة 1 زي الحكومة الأمريكية
- إنه يمنع استيراد أي قناع للديموقراطية من أمريكا أو غيرها
- إنه ينقل على النقطة 2 ويكمل فيها ويزود عليها كمان 

رايحين على مصر النقطة 2، معانا؟
نازلين يوم 27 مايو

ليست هناك تعليقات:

إرسال تعليق