إمسك فلول

النهاردة الصبح حسام حسن - مش بتاع الكرة- واحد تاني مشهور شوية - طالب كلية الطب اللي عرض صور حضانات مستشفى الميري لقى فيديو مرفوع إمبارح يعني 10 مايو 2011 على Youtube.com على الجزء مش عارفة الكام من سلسلة "عايز أختي".. واحد بتعلن إسلامها من إدفو أسوان.

المهم بتتبع الحساب والحسابات المشتركة طلع عنوان الانترنت على الفيديو هو عنوان موقع عامل حملة تأييد لعميد كلية الدراسات الاسلامية والعربية بكفر الشيخ سابقا غير إن عليه انتهاك كبير لحقوق الملكية بكمية البرامج واللعب التجارية اللي الموقع حاطتها لأي حد، يعني يلبس تهم على مقاسه.

أما المشتركين في القناة اللي رافعة الفيديو

الأول: كاتب إيه في الحساب بتاعه؟
" نعم للحوار والأستقرار والاصلاح ولا للتدمير والتخريب والتدخل الأجنبى ببلدى الحبيبه مصر"

"هذا خاص بالمصريين والمحبين للبلد الساهرين على حماها ومن هنا من بلدى طنطا محافظه الغربيه خرج الالف محبين للاستقرار ومنادين به ومؤيدين لقرار الرئيس محمد حسنى مبارك ويدعونه للبقاء وعدم ترك البلد فى تلك الظروف وشاكرينه على قراراته الصائب وتسليم السلطه سلميه" 

التاني

عضو مجلس الشعب 2010 وكمان الامين المساعد لعمال الحزب الوطني بمحافظة الغربيه  اسمه محمد العريبي 

إيه العلاقة بين شركة الكمبيوتر بقة والأستاذ اتفضلوا

بعدين عرفنا إن الفيديو طلع منشور قبل كدة يوم 21 إبريل 2011 من 20 يوم 

وهم اللي جددوه

مفيش نص ساعة من الدعبسة اللي كنا بنعملها

حسام لقى خبر في اليوم الساقع.. هو الساقع صحيح بس يعني البلاوي بتبدأ من حتة وبعدين الريحة تفيح "أنباء عن اعتناق فتاة قبطية الإسلام بأسوان"

إنت مصر إن اللي يقول فلول ده بيدفن راسه في الرملة عشان أساسا مصر فيها مسلمين ومسيحيين متعصبين.. الحق يتقال إنت عندك حق بس عندنا طرفين، واحد بيرمي بذرة وفي أرض خصبة للفتنة تقوم "شجرة الشر" تطرح بسرعة. غير بقة إن حارس الأرض مكبر دماغه. يعني الحل ياإما نوقف اللي بيرمي البذور ياإما نحصن الأرض من الفتنة والتالت بتاع الحارس إيد منه والأرض.

ونحصن الأرض من الفتنة يعني تدخل عقول الناس محتاج وقت... القانون رادع بس في ناس بايعة نفسها لأجل الفلوس، نقوم نقطع إيد اللي بيدي الفلوس.

اللي عايش في طنطا عينه ع الراجل ده.

أنا من اسكندرية ورجالة الراجل الاسكندراني "الوطني" تاجر السلاح طايحين في البلد حتى بيتحشروا في مظاهرات الأقباط ويوزوهم يشتموا المشير بس هم "بيسقعوا" والشرطة لحم كتفها من خيره (كأن مفيش رازق يعني) وبلغت بس الرد كان ضحك ولاحد شاف مركز سوزان مبارك اللي كان بيتهرب منه حاجات ولا حاجة ولا الجيش حتى اتصرف يقول لي مفيش بلاغات بعد الساعة 3.

اللي يعرف معلومات عن الراجل ده يقول، واللي في أسوان يعرف اللي طلعوا مظاهرة عايز أختي يروح يبص مين دول وفي ناس في وسطهم ويصور يمكن حد في يوم يقول ياجدعان إحنا ناوينا نشتغل بذمة وهاتو الصور والفيديوهات اللي معاكم عشان "نضرب بيد من حديد".

أنا ما قلتش حاجة