19 ديسمبر 2011

شيء من الايفيــــي : الحلقة الرابعة: كل هذا الخراء


الحلقات التلاتة اللي فاتوا كانوا عن الأحزاب اللي نازلة الانتخابات، وعمايلهم "الإيفي"
مش فاكرة أجلت كتابة التدوينة دي كام مرة، بس ده وقته، نتفق ف الأول بس إننا مش هنعمل هنا شغل باحث سياسي ولا خبير استراتيجي وإن إحنا هنا بنحاول نسرد.

وهانبدأ باللي انتهينا منه الحلقة الأخيرة، وهو أحزاب "الشعارات الدينية" ومواقفها من أحداث (اعتصام مجلس الوزراء) ومجزرة (القصر العيني) ومحاولات التفسير القبيحة لسكوتهم وخنوعهم للعسكر

تصريحات أحزاب "الشعارات الإسلامية" حول المجازر 
منها على سبيل المثال ماورد على لسان "الشيخ" (برهامي) من تصريحات بإن السيدة المنتقبة اللي ظاهرة ف صورة بتهاجم لاتنتمي لهم وإنها لابسة كدة مخصوص عشان تلصق تهمة فيهم (جماعة الدعوة السلفية)، والمتحدث الإعلامي لحزب (النور) نادر بكار قال "دعنا لا نخلط الأمور"
ومنها كمان حلقة مقدم برنامج (أهل البلد) على قناة أسستها (جماعة الإخوان المسلمين) واللي بيأيد فيها كلام "العسكري" إن فيديو سحل البنت وتعريتها متفبرك لأن -بحسب كلامه- معندهاش "راس" :S
ومنها سكوتهم ع اللي بيحصل واكتفائهم بمشاركتهم في الإشراف على فرز وإعادة فرز أوراق التصويت في انتخابات مجلس الشعب. دي مش أول مرة يسكتوا بقالهم كتير ساكتين، بالعكس ساعات بيمدحوا ف العسكر بطريقة مستفزة وإنهم "حموا الثورة" والكلام ده.


من شهور اتفتح ملف كشوفات العذرية اللي قام بيه مجموعة أفراد من الجيش على بنات اتظاهرت في التحرير في (يوم المرأة)، بعد ماجه في جريدة إن في ضابط أكد حدوث ده.
حصل وقتها إن واحد إخواني "غير قيادي" كتب مقالة بالخصوص ده وحب ينشرها على الموقع الرسمي للإخوان، لكن طلبه اتقابل بالرفض من القيادات، وهو كان بيطالب بتقديم المسؤولين للمحاكمة، دي النوت بتاعة المهندس/محمد كمال اللي نشرها على صفحته الشخصية على الفيس بوك، أهو في ناس فيهم دمهم حامي، بس ملعونة الحسابات السياسية.

ماتخفيش البنت في عينيا
قالك "أصل في صفقة مابين (المجلس) و(الإخوان)"
مش واضح إن في صفقة، هم خصوم بس مش ضروري يكون في نفس جبهة خصومة الثوار للعسكر، العسكر والإخوان بالنسبة لهم المفاتيح عند (أمريكا)
(هيلاري كيلنتون) قعدت في أوائل قيام الثورة مع بعض "النشطاء" قلبت أولهم من آخرهم درست مدى تأثيرهم وقوتهم، وأدركت إن الشباب دول في كتير منهم نقاء لا تدنسه السياسة - لأن أغلبهم ببساطة رفضوا مقابلتها - وإنهم مش "أصحاب كلمة" أوي ع الشارع، مش زي العسكر اللي بيمتلك الكثير على رأسه الإعلام الموجه الإرهابي، ومش زي جماعة (الإخوان) مثلا اللي مزروعين في كل حي وكل زقاق ومع الشارع بـ"الشغل " بتاعهم -عارفين إحنا الشغل م الحلقة اللي فاتت زيادة عليه القناة بتاعتهم ومعاها جريدة بنفس اسم الحزب

هو إيه اللي كان بيحصل؟
اللي بيحصل إن في مصارعة روماني دايرة وفي ملك قاعد ف المقصورة بيراقب، اللي هيكسب في المصارعة، الملك هيحط في رقبته جرس دهب.

أمريكا مع أي حد منهم: اللي "هيستحق" "هيكسب" الجرس الدهب
أمريكا معندهاش أي مانع إن الإخوان يستلموا السلطة على الطريقة "التركية" أو "التونسية"، أي حد يدي الأمان للدادة أمريكا من ناحية الدلوعة إسرائيل ويديها وعد وضمانات بعدم التعرض، هيستلم
وجايز نضيف عليها كمان شوية شروط جاية من اللي ماسك "المفاتيح":
1. عدم ترشيح رئيس جمهورية "إخواني"- الإخوان أعلنوها تقريبا من قبل تنحي مبارك؛
2. دعم رئيس على نفس الوعد بتاع "ماتخافيش ياأمريكا بنتك إسرائيل ف عينيا"؛
3. دور الجيش، وده الله أعلم هايكتب إزاي، التوقع إن هايكون فيه قعدات ناس بتشد شعر بعض فيها، (الطنطاوي) هيتقلب هو متساب يتحرق بالكامل ف المرحلة "الانتقامية"، أما (سامي عنان) - بحسب ما موجود في نيويورك تايمز -هو محبوب من (أمريكا) وخصوصا إنه معندوش مشكلة في (العمليات العسكرية المشتركة)، يعني هنشوف مناورات حيلوة بين الجيش التركي والإسرائيلي والمصري ويقولك دي مناورة "صداقة" يامعلم
"لأ بس الإخوان دايما عايزين يحرروا (الأقصى) واستحالة يكون ناويين يطمنوا (أمريكا) بعدم التعرض لإسرائيل".
على أدي فهمي، إنهم فاكرين إنهم ممكن يستنوا شوية ع الموضوع لحد ما عدد الدول اللي ماسك فيها "الإخوان" السلطة يزيد، ويقَّوا كل بلد اقتصاديا وسياسيا وخلافه وبعدين ينقضوا مرة واحدة على (إسرائيل)
مش فاهمة دماغهم طبعا لأن الثورة لو مااكتملتش وماحصلش ثورة على العلاقات المصرية الأمريكية، قوة مصر اقتصاديا وسياسيا و.... هيفضل يحددها ميزان كبرى الشركات متعددة الجنسيات. وعندنا مثال ماليزيا أو تركيا، محصلش عندهم نهضة شاملة، إنما بالأخص في السياحة وفي بعض الصناعات اللي مصانعها قفلت ف أمريكا وفتحت عندهم عشان تكلفة الأيدي العاملة أقل، واتخرب بيوت أمريكان كتير، هو ده ميزان كبرى الشركات، إنما فين مثلاً النهضة التعليمية اللي حصلت في ماليزيا وهم بيبعتوا الطلبة يدرسوا هنا في جامعات مصرية خارج التصنيف أصلا؟ قيس على ده الباقي

شكل المصارعة:
1. إن المجلس كان عنده أمل كبير ف الفلول وعدد المقاعد اللي هيخدوها ف مجلس الشعب،
2. النتايج بتقول إن أعلى نسبة مقاعد بتروح لحزب (الحرية والعدالة) وحزب (النور)
أدينا عدينا المرحلة الأولى والتانية والعسكر بيخسر في الجولة دي، بس كسبان في أرض تانية موازية هو اللي حضرها بنفسه في الشارع.

الإخوان شغالين دلوقتي باللي حصلوا عليه عن "استحقاق" بالنسبة لهم وهو مجلس الشعب، لو "هيمسكوا الحكم" هايكون ناقص مش في إيدهم حاجات زي أجهزة الأمن "الجيش والداخلية والمخابرات" وبما إنهم مش شغالين في أي اتجاه ثوري، محتاجين يستلموا الأجهزة دي على طريقتهم، المخابرات مثلا ملك لأمركيا أكتر ماهي ملك مصر، يا الثورة تطيح برؤوسها أو الإخوان يستلموها حبة حبة من أمريكا، وتفضل أمريكا متحكمة فيها برضه عادي، يقول لك "علاقات استراتيجية" وتفضل الحياة ماشية إن جهاز المخابرات مثلا ده "رأفت الهجان"، مع إن شغله الحالي العكس صحيح.

لعب الإخوان
الواحد صدق لوقت، إنه قد يحدث مواجهة أو خلاف ما بين العسكر والإخوان عشان تسلم السلطة، خصوصا إن المجلس حدد جامد من صلاحيات مجلس الشعب اللي جاي،
وإنهم ممكن إنهم ينزلوا يطالبوا بالمطلب اللي بدأ يظهر من وقت بخصوص تسليم السلطة في يناير القادم
وكمان شفت إخوان بيأيدوا على المواقع الاجتماعية الصورة دي سواء بالصورة أو بكتابات

والواحد كان قلقان من حاجة بالأساس وهي إن من كتر سكوتهم دلوقتي إن يبقى صعب جدا أي مجموعة تتحد معاهم تاني على الأرض حتى لو في وقوف ضد العسكر، والحاجة التانية اللي بتخوف من نزولهم: إنهم بينزلوا بعدد كبير يدوا ثقل وبعدين ممكن يسحبوه في أي وقت وفقا لحساباتهم مش بالضروري التوافق مع الجمع.
بعد استيضاح ومراقبات تانية، وهم لحقونا بالتصريحات السريعة ظهر الأصل، هم مش مع المطلب ده أصلا، تقريبا هيتبنوه عشان يحرقوه:
يعني يتبنوا المطلب وينزلوا في مسيرة "حاشدة" وبعدين يرجع العسكر شوية من صلاحيات مجلس الشعب اللي كان سحبها من كام شهر
- بالملخص : "ينزلوا رافعين يافطة بالصورة اللي فوق، يرجعوا بشوية صلاحيات ملهاش دعوة بالمطلب ده يبقى حققوا اللي عايزينه" كأنه ماكنش مطلب، بيضربوا ف العالي عشان يلحقوا حاجة أقل منه، ومنه برضه حرق المطلب، بما إنه مش على مزاج العسكر، ويبقى علموا ف العسكر جميل :(

وتقريبا البضاعة عليها الطلب، عملوها بضاعتهم وباعوها قبل ميعاد العرض ونزل خبر تراجع الإخوان عن المطلب. لا ماتراجعوش.. لأ لأ بيبحثوا في الموضوع، وتلاقي خبر كدة من صبحي صالح وتصريح مخالف للبلتاجي

تقريبا منتظرين الكفة هترجح فين وساعتها هيعتمدوا تصريح ويتجاهلوا التاني تماماً كأن لم يكن.
أما من يلوم الإخوان ومحتاجهم ينزلوا تاني زي نزول "موقعة الجمل" عشان كل اللي حصل ف الشارع من انتهاكات وإنهم مفروض يثوروا ويثأروا وغضبان من تصريحات تبرأهم إن البنت مش إخوانية، إسأل نفسك هم جابوا حق (زينب الغزالي)- رحمها الله وتقبلها عنده، أو السيدات والرجال اللي حصلهم أسوا ما حصل لها في السجون الحربية أيام عبد الناصر؟
لعب العسكر
مايقوم به المجلس الآن من افتعال حالات الانفلات الأمني ودس التحريات العسكرية والأمنجية والفلول في وسط المتظاهرين وإشعال المواقف، له أكثر من مكسب:
1. محاولة التشويش على مرحلة الانتخابات، سواء عشان يحصل فيها تزوير، زي ما وردت أخبار عن تزوير لحساب (الوفد) وشوية للـ(نور) في المرحلة التانية وحصل على أثرها المطالبة بإعادة الفرز،
2. الانتقام من الثوار، لأنهم ببساطة بنات أو ولاد أرجل منهم، وهم اللي قاموا بالثورة سبب الأزمة اللي هم فيها دلوقتي
3. تصفية الثوار من غير المنتمين لما يطلق عليها (التيارات الدينية)، ليه؟
- علشان بعد المرحلة التالتة ياخد الإخوان بالمتر والسنتيمتر الحتة اللي أمريكا أمرت العسكر بتسليمها للسلطة المنتخبة في مجلس الشعب ومحدش يطلب أكتر من كدة، وأي حاجة بعد كدة تبقى لعب "هات وخد" بين العسكر والقوة اللي هم مجبرين على التعامل معاها، وحاجة قصاد حاجة، يعني صعب برضه نتخيل إن الإخوان ممكن للحظة يحاكموا العسكر على أي حاجة.
وعشان وقت التقسيم محدش عايز دوشة، الإخوان على نفس الخطى، شفت بوست حقير نشره أحد شباب الإخوان عن 6 إبريل مسحه بعد كام يوم بعد سيل من الهجوم والتهزيق (عشان كدة مش هنشر النسخة اللي احتفظت بيها)، وما فهمتش إزاي حد كان بيدافع عن 6 إبريل من كام شهر عند اتهامهم بالتمويل يتصاب بالسعار فجأة ويعمل بوست لا أخلاقي ويتكلم عن بنات 6 إبريل كلها كدة لمجرد فيديو لواحدة بتشتم ومش معروف دي تبع إيه، وكأن البنت تمثل عقيدة داخل الحركة،

والنهاردة اتفرج تاني جريدة الإخوان تتناول "الخراء" باستمتاع
من كبار الاشتراكيين الثوريين، عم (كمال خليل) اللي كان بيهتف للإخوان وقت سجنهم أيام "مبارك" الحرية للعريان، الحرية للإخوان، خيرت خيرت ياأخانا كيف العتمة في الزنزانة" (معلومة: اللواء الرويني هو من صدق على محاكمة (خيرت الشاطر) عسكريا)

من حساب أحد الإخوان في أسيوط

لعب الثوار
صراحة ده الطرف الوحيد اللي مش بيلعب، ده واخد الموضوع جد الجد، أي حد مستعد يبخ في أي حد، وقت صعب ومتأزم.
غير مقبول للثوار والنشطاء سماع كلمة "مندسين" و"أيادي مخفية" وبالنسبة لهم ده كلمة "مهلبية". بس المندسين موجودين، شاهد عليكم اعتصام 8 يوليو لما اتفض أول يوم رمضان، كمية الناس اللي كانوا ف الاعتصام طوال الفترة، وساعة الفض هم اللي كانوا بيرشدوا عن الثوار وقت القبض عليهم.
سؤال:  مين دلوقتي اللي بيحدد ميعاد المظاهرات وأماكن الاعتصام؟ مين أول واحد بيقول "هنروح المكان الفلاني ده ياجماعة ونعتصم"؟ إيه فايدة الاعتصام عند مجلس الوزرا؟ الجنزوغي ممكن يعمل الشغل من أي مكان حتى لو من بيتهم،
حد من "ثوار التحرير" يقول  أو يأكد
- مين أول واحد صاحب فكرة الاعتصام عند مجلس الوزراء؟
- ليه "الثوار" مارحوش اعتصموا عند (ماسبيرو) مثلا في أي اعتصام من الاعتصامات السابقة أو الحالية وده مبنى كُرهنا ليه من كره (العسكر)؟
- خلاص مفيش مندسين في وسط الثوار؟
- إن كل الأطفال والقُصر المشاركين في الثورة ثوار حقيقيين أو جميعهم ليهم تار، زي الحالة دي؟
أو الحالة دي؟


من حساب منى سيف على تويتر

- إن مفيش حد من المشاركين قابض مثلا ف وسطهم من الحزب الوطني ولما بيقبضوا عليهم مجرد بيخلوهم يعترفوا إن بدل اللي مقبضهم واحد من الوطني، يقول "ده واحد من (6 إبريل) اللي قبضني" زي ما حصل وواحد إدعى على (الروبي) من حركة (6 إبريل)، ويكون ده الأمان اللي بيديه لهم العسكر عشان يخلي سبيلهم

في اسكندرية مثلا وقت أحداث المنطقة الشمالية 22 يوليو، واحد شغال لحساب الحزب الوطني، كان بيرمي طوب مع اللي بيرموا وكان بيحضر مولوتوف، واتقبض عليه مع بعض الثوار وبعض البلطجية واتكسرت رجله من الضرب، خرج من السجن، رماه سيده، واتحول للبطل الأعرج، هو مالوش كلمة دلوقتي بس واضح إن كان ليه، وممكن نراجع الشهادة هنا بالفيديو اللي يثبت حقيقته
من المضحك في القضية دي، إن واحد بلطجي أخد براءة وفي ثوار أخدوا سنة مع الإيقاف، والحُجة إن "أكيد واحد بلطجي ومُسجل مش هايكون مهتم بالمظاهرات وإنه أكيد كان معدي وقتها قدام المنطقة الشمالية صُدفة" (اضحك مع النيابة العسكرية)

-اندساس الأمن والفلول ده كان وقت وفات مثلا؟


من المناطق اللي ظروفها الاقتصادية متواضعة جداً في ناس منطقها كدة
صحبتي امبارح فالتحرير وقت ما الضرب اشتد، واحد ما تعرفوش شدها وداها مكان امان وقالها"انتي شكلك بنت ناس متعلمة،خلونا احنا الفقرا نموت، عشان لما الدنيا تهدي يفضل المتعلمين اللي يقدروا يفيدوا البلد" !!! 
وفي من كتر ما الفقر أكلهم، بيشاركوا في المظاهرات مدفوعين، استرزاق يعني زي المجموعة دي أو دي ف اسكندرية
-------------------------------------------------

"مش فاهم إيه المطلوب؟ الناس ترجع بيوتها؟"  المطلوب في رأيي المتواضع جدا
- مداواة الجرحى بعيد عن الأمن
- البحث عن المفقودين
- توحيد الصفوف
- عمل خطة تنظيم تحركات الثوار أثناء الكر والفر، للحفاظ على المتظاهرين قدر الإمكان من الاختطاف والضرب والسحل
في حالة الأعداد الصغيرة للمتظاهرين:
- اختيار أرض اعتصام أو تظاهر لا يحددها طرف مجهول واللي ع الأرجح بيكون هو الأمن نفسه،
- الثوار من النشطاء القدامى والثقات معروفين، مطلوب يكونوا متخذي قرار في أي تحركات، مفيش مجال للعشوائية والاعتماد على "التلقائية الشديدة" للشعب و"كفاح المناطق الشعبية"، المرحلة دي كانت ناجحة في السابق، دلوقتي اختراق الثوار ألعن من اختراق جماعة الدعوة السلفية اللي بنألس على قدر الاختراق اللي فيها
في الوقت نفسه مع الحفاظ على أمن اللي هيكونوا مسؤولين عن التحركات، لأن لو ظهر للعسكر قيادات واضحة بعينها هيسهل عملية الهرس والتصفية اللي هم متبنينها في الفترة الحالية
- الإقصاء لجميع البياعين في الميدان اللي ممكن يكونوا أمن أو المندسين، يايتم بطريقة واضحة وصريحة بعد التأكد تماما منهم، ياإما الحذر واجب نعمل إيه؟ مجرد مايكنش ليهم "اتخاذ قرار" في التحركات المختلفة.
في أوقات بيحصل إن عدد المرشدين والمندسين أكبر من الثوار وبيكونوا عند أماكن حيوية، المأجورين على فكرة معندهمش مشاكل يتصابوا أو حتى لو هيتقتلوا دي حياتهم، والثوار كمان معندهمش مشكلة يفقدوا روحهم في سبيل اللي بيؤمنوا بيه سواء كان الفكرة أو الوطن أو الخالق، وصحيح الثورة بتحتاج نقل دم عشان تفضل عايشة، بس معروف إن الدم لازم يتنقل للوريد مش أي حتة وخلاص، ماندخلش في معركة الأمن ساحبنا ليها إلا لو عندنا القدرة إننا نقلب الترابيزة عليهم.

لو الأعداد كبيرة كفاية:
المندسين بيكونوا زي مايكون حد جاب نقطة حبر وحاول يلون بيها البحر، غير مؤثرين بالمعنى
تصعيد الثوار ولو وصل لعصيان مدني شامل مختلف تماماً عن تصعيد الأمن أو الفلول المندسين واختيار الأماكن حتى بيكون مختلف.


تابعوها على تويتر بتقول كلام في الجون كتير

الجمهور:
ليه ينزلوا معاك؟ إنت بتعمل إيه أصلاً؟ هو إنت مش عايز انتخابات؟ إنت عايز البلد تولع؟ طيب إنت نيتك كويسة بس عيل مش هتعرف تمسك البلد
- المصريين "الجمهور" بيقول "واضح أوي إن العيال دي مش عايزة انتخابات"، وفي بيقول "دول الحزب الوطني واللي زاققهم المجلس العسكري" :) وكل واحد بيفسر على مزاجه
ماينفعش تفضل المعارك في شكل "كر وفر" وبس،

مبادرة "سينما التحرير" رائعة، عشان الناس بتتحرك من مكانها وتنظم عروض "لانتهاكات العسكر" في أماكن الناس مدفية فيها تحت البطاطين وبيتفرجوا على "بث ماسبيرو" الذراع القوي للثورة المضادة.
في اقتراح كويس باستخدام شاشة على عربية نقل لتغطية شوارع أكتر في وقت أقل ويكون في مسيرة مع العربية اللي بتعرض.
إيه المكاسب من "سينما التحرير"؟ هيتعاطفوا شوية وماشي وصلهم إن في "شئ غلط" بس مش واضح هيصلحوا "الغلط" ده إزاي.

 - فين المطالب؟ ليه مفيش يافطة على أطول عمارة بمطالب محددة بجداول زمنية محددة، يتوزع بيها مليون منشور في شوارع مصر؟
ضروري بيان موحد على مستوى جميع المحافظات يشترك في الحركات اللي لسة موجودة في الشارع، مطالب واضحة، الناس عايزة كلام واضح، أنا باعمل كدة عشان عايز كذا وكذا، وهيتم عن طريق كذا وكذا، إنما مثلا تطلب م الناس ثوروا عشان الانتهاكات،

- زي اللي بيحاربنا عنده إعلام، لازم يكون عندنا إعلام، زي ما ليه تشكيلات لازم يكون لينا تشكيلات زي ما حاطط ناس مدفوسة في وسطنا تجسس علينا أو تحسبنا لأرض معركة خسرانة، لازم نعمل تخطيط مضاد يفسد مخططهم أو حتى نندس نعرف بيحضروا لنا إيه

- لازم مساحة عمل حتى  لو ع الانترنت يشتغل عليها كل اللي عندهم مبادرات واقتراحات لتسليم السلطة للمدنيين وبوسترات لتوحيد الجهود وتوفير الوقت اللي بنحاول نسبقه ونحاول نخرج منها بوحدة واحدة متسقة ومتناسقة تظهر للجمهور.

من حساب منى سيف على تويتر
الروح غالية انقل لثورتك الدم عن طريق الوريد ولا تخطئ الوريد فتذهب الدماء هدراً.

---تحديث---
 الثوار وأطفال الشوارع في ميدان التحرير - مبادرة
الكلام متحلل سياسياُ من أنس حسن

كالعادة للحديث تحديث :)

03 ديسمبر 2011

شيء من الايفيــــي : الحلقة الثالثة - أحزاب الشعارات الإسلامية


أحزاب الشعارات الإسلامية
خد لك بصة
ولا اسميهم الإسلاميين ولا أحب هذا الاسم، أنا فقط أعرف {هو سماكم المسلمين من قبل}؛
وممكن حد يحب يحط حزب "الحرية والعدالة" مع الأحزاب اللي يقال عليها "ثورية" بمناسبة يعني إنهم نزلوا واستشهد منهم وعدد اللي مات منهم معروف وموقعة الجمل وكدة، تنكروا دورهم ف موقعة الجمل ولا إيه؟ إوعوا تنسوا 80 سنة والسجون وموقعة الجمل، قول 10 مرات ورا بعض (80 سنة .. موقعة الجمل.. 80 سنة موقعة الجمل)

الحرية والعدالة
رئيسه: محمد مرسي
معروف بإنه حزب الإخوان، في اسكندرية بحسب ما توافر من معلومات حصل بينهم تحالف وبين الحزب السلفي الناشئ  حزب (الأصالة والنهضة) في شخص مرشح واحد فقط وهو هشام مصطفى عبد العزيز، وده في الدايرة التانية، أما الدايرة الأولى فكان على رأسها المتألق دائما صبحي صالح مانساش يتألق في لجنة أول يوم ف الانتخابات
قائمة الدايرة الثانية
هشام مصطفى رقم (3) من يمين القارئ
في قارئين للأحداث ومتابعين قالوا لو (الخضيري) مواليد 1940 - الإخوان مرشحينه رئيس مجلس الشعب- ماكسبش في الإعادة قدام (طارق طلعت  مصطفى) إن (صبحي صالح) يكون هو رئيس المجلس، بس لا نعتقد إن جميع قيادات الإخوان بنفس ذكاء (صبحي صالح) عشان يطلبوا تعيينه رئيس المجلس
ولو إن مش عارفة إزاي (الخضيري) هيقدر يركز في رئاسة المجلس، لأن حسب ما أعرف من تجربة صديقة - حضرت معاه تصوير برنامج- إنه مفتقـد القدرة على التركيز لفترات طويلة نظرا لتقدم سنه.
بالنسبة لانتهاكات حزب (الحرية والعدالة ) سواء من دعاية أو بصراحة نقول عليها رشوة مدفوعة مقدماً الجميع اتكلم عنها كتير عن طريق استفاذ الطاقة كلها في الانتقاد والولولة ولمعزة (الإخوان) عند الكثير من مستخدمي الأدوات الإعلامية:
دعاية مصاريف المدارس وشنط رمضان وجوايز صلاة العيد وتكريم أهالي الشهدا والأكل المخفض والدعاية عند اللجنة إلى تزوير إرادة الناس اللي كل شوية (عصام العريان) كان يطلع يدافع عنها ف التليفزيون ويقول "الناس اللي بتقفز على إرادة الشعب" تقريبا هو
شايف إنهم مش بيقفزوا عليها هم بيبططوها بس.

قال نبيع السكر والطماطم بأسعار المنبع، أجبنا: وماعلاقة الطماطم بالسياسة سيدي؟

 شهادة وصلتني من 3 ثقات بالآتي " بعض من الاخوان كانوا بيقولوا للناس .. سيبكم من الاخوان صوتوا للحريه والعداله أو " مش عايز الإخوان؟ طيب خد "الحرية والعدالة"؛
ونذكر شهادة من صفحة غير إخوانية على الفيس بوك
‎-ﺭﺟﻞ: ﺍﻧﺎ ﻣﺶ ﻋﺎﺭﻑ ﺍﻧﺘﺨﺐ ﻣﻴﻦ ﻭﺍﻟﻠﻪ.. ﺍﻧﺎ ﻫﻨﺘﺨﺐ ﺍﻷﺧﻮﺍﻥ ﻭ ﺧﻼﺹ ﻋﺸﺎﻥ ﺍﺿﻤﻦ ﺍﻥ ﻣﻔﻴﺶ ﻓﻠﻮﻝ
-ﺷﺎﺏ ﻳﻠﺒﺲ ﺑﺎﺩﺝ ﺍﻟﺤﺮﻳﺔ ﻭ ﺍﻟﻌﺪﺍﻟﺔ: ﻷ ﻳﺎ ﺣﺎﺝ ﻣﻔﻴﺶ ﺣﺎﺟﺔ ﺍﺳﻤﻬﺎ ﻛﺪﺓ .. ﺍﻧﺘﺨﺐ ﺍﻟﻠﻰ ﺍﻧﺖ ﺷﺎﻳﻔﻪ ﺍﺻﻠﺢ .. ﻭ ﺭﺍﺡ ﻭﺍﺧﺪ ﺍﻟﺮﺍﺟﻞ ﺑﺮﻩ ﺍﻟﻄﺎﺑﻮﺭ ﻭ ﻗﻌﺪ ﻳﺸﺮﺣﻠﻪ ﺍﻷﺣﺰﺍﺏ ﺍﻟﻤﺨﺘﻠﻔﺔ ﻭ ﻣﻠﺨﺺ ﻋﻦ ﺍﻟﺒﺮﺍﻣﺞ ..ﺍﻟﻤﻬﻢ ﺍﻥ ﺩﻭﺭﻫﻢ ﺍﻻﺗﻨﻴﻦ ﺿﺎﻉ ﻓﻰ ﺍﻟﺼﻒ ﻣﻊ ﺍﻟﻌﻠﻢ ﺍﻥ ﺩﻩ ﺻﻒ "ﻣﺤﻤﺪ ﺍﺣﻤﺪ" ﻳﻌﻨﻰ ﺍﻃﻮﻝ ﺻﻒ ﻓﻰ ﻣﺼﺮ .. ﺑﺲ ﻓﻰ ﺍﻷﺧﺮ ﺍﻟﺮﺍﺟﻞ ﻗﺮﺭ ﻳﺨﺘﺎﺭ ﺣﺰﺏ ﺍﻟﻌﺪﻝ .. ﻭ ﺍﻟﺸﺎﺏ ﺍﺑﺘﺴﻢ ﻭ ﺩﺧﻞ ﺍﻟﻠﺠﻨﺔ ﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﻩ ﻟﻮ ﺍﻟﺸﻌﺐ ﺍﻟﻤﺼﺮﻯ ﻛﻠﻪ ﻛﺪﺓ ﻭ ﻣﺶ ﺑﻴﻔﻜﺮ ﻓﻰ ﻣﺼﻠﺤﺘﻪ ﺍﻭ ﻣﺼﺎﺣﺔ ﺍﻟﺤﺰﺏ ﺑﺘﺎﻋﻪ ﺑﺲ
ده فقط معناه إن تزوير الإرادة في الجزئية دي بالتحديد ماكنش منهج أو أوامر من القيادات، ويقولك إن صوابع إيدك مش زي بعضها حتى لو داخل الإخوان، يعني فيهم اللي عك وفيهم اللي ما عكش
 بالنسبة  لجميع بلاغات الانتهاكات المقدمة ضدهم، لا احلم بأي إجراءات ضدهم أو ضد غيرهم، تساووا في الخطيئة فغُفرت لهم

جزء من عمل مجموعة (احمي صوتك) في مرحلة لاحقة كان الاستعلام عن المرشحين، حصل إن في مرشح شاب عمال فردي في الدايرة الأولى اسمه (محمد سعد) من شباب (التيار المصري) مكتوب عنه ع الانترنت إنه جهادي وتبع القاعدة وإن الإخوان رفضوا  يرشحوه على قوائمهم، الإخوان شايفين المرشح ده متطرف، ياألطاف الله!!
ماقدرتش ولو بصفة شخصية أرشحه للي كان بيستعلم، وطلبنا من معارف في حزب (التيار المصري) الاستعلام عنه، وحصل قعدة بين المعارف و (محمد سعد) و(حسام الوكيل) المتحدث باسم الحملة الانتخابية لحزب (الحرية والعدالة)، وطلبوا منهم نفي الكلام ده وإن كان مش صادر منهم إنما ورد على لسانهم لأن (محمد سعد) مالوش علاقة بالقعدة ولا سافر أصلا برة مصر، هو كان من الشباب اللي بيداوموا على الصلاة في المسجد و(أمن الدولة) عملوا له ملف زي كتير، (حسام الوكيل)  المتحدث باسم الحملة الانتخابية لحزب (الحرية والعدالة) رفض نفي الكلام رسمياً
ولما استعلمنا من (صفوان) قال إن في مرشح جيد مصري لا توجهات محددة له يعرفه وقال اسم ورمز المشط ورقم 51، كان الإسم طلع مرشح للشورى، وعليها - زي ما حكينا في الحلقة السابقة - قال مفيش حد أضمن إنه مش فلول غير الإخوان
واتضح بعدها إنه كان يقصد (محمد سعد) اللي اتحط على لسان الإخوان إنه "جهادي" و"تابع للقاعدة".
محمد سعد
من ضمن شغل (الإخوان) على الأرض كان جمع البطاقات، في (كرموز) التابعة للدايرة التالتة فردي، حصل الآتي:
هناك معروف مرشح الإخوان "محمود عطية" إنه راجل "محسن" و"خَير" و"مش سايب الناس" والناس بتحبه، من كلام ناس من المنطقة، كانوا بيقولوا إن المرشح جمع بطاقتهم وهم هيدولوا صوتهم،  وبيقولوا طلب منهم في العمال يدوا صوتهم لـ( صابر أبو الفتوح) مرشح الإخوان، لكن بحسب كلامهم قالوا "إحنا نعرفك إنت، مالكش دعوة هندي صوتنا لمين في العمال"
اللي صدمهم - كأن حد خبطهم ف وشهم - ردنا إن "محدش هيعرف إديتوا صوتكم لمين" وإن جمع البطاقة إذا كان صحيح للتعريف باللجنة ولو إنه كان شهر قبل الانتخابات فده "غير ملزم ليهم"، بعد ما استغربوا الكلام أكدوا على حبهم للراجل "المحسن" وإنهم فعلا شايفين إنه يستحق صوتهم بس لسة مش متأكدين من مرشح العمال

فردي الدايرة الثانية
مرشحي (الحرية والعدالة) الدائرة الثالثة - حصلا على المقاعد في الإعادة
من قبل الانتخابات وهو معروف إنهم هيحصلوا على أعلى نسبة أصوات، وبالنسبة لتقديري المتواضع كان ممكن يحصلوا عليها من غير أي انتهاكات، لكنهم رضوا أن يقعدوا مع المنتهكين

بحسب كلام قيادي في جماعة الإخوان في اسكندرية، قال إنه عارف إن "بالذات المرحلة الأولى من الانتخابات مش هتتزور".

ما كان مفاجأة هو

حزب النور
رئيس الحزب: عماد الدين عبد الغفور
الحزب في الجولة الأولى حصل على أعلى نسبة مقاعد بعد حزب (الحرية والعدالة)
تحليل الصحفي محمد عبد الفتاح، جايز يكون منقوض منه التحالف الحالي لحزب (النور) مع نظام مبارك.

بعيدا عن (عبد المنعم الشحات) أو الدايرة الرابعة اللي تضم مناطق نائية في اسكندرية، يحكم عليها الأمن قبضته مثلما يحكمها على كثير من قرى ونجوع مصر بأفراد لهم لحية، واللي انتصر فيها (عصام حسنين)-  اللي شايف إن ثورة (25 يناير) لن تأتي إلا بسوء - على منافسه مرشح (الإخوان) الدكتور/حمدي حسن

يوم الصلاة على (بهاء السنوسي) كان في تجمع كبير عند المشرحة لتسجيل الاعتراض والغضب على اللي حصل مع احتمالات التصعيد، الناس لقوا راجل دقنه كبيرة واقف يخطب في وسط الناس، يتكلم على إن "السلفيين" و"الإخوان" دول ناس كويسين وأحسن ناس ومش معنى إنهم مش مشاركين في النزول لأحداث ما بعد 19 نوفمبر إنه وحشين، بل بالعكس هم الأقدر على الرؤية،
أصلا يومها كان أهله بيتمنوا ولا حتى هتاف، فمحدش انتبه لكلامه كتير.
الناس ماكنتش عارفة أوي ده مين، بس إحنا متابعين الدعاية وكنا عارفين إنه مرشح فردي الدايرة الثالثة (اللي تقع فيه المشرحة) عن حزب النور
بصراحة مش ده المرشح الوحيد اللي جه يتصفصط على الناس، أكتر من واحد جه بعربيته أخد لفة ومشى.
ومنهم طبعا شباب مرشحين، عكس الراجل ده، علقوا حملتهم الانتخابية، مش كتير حس بوجودهم غير اللي عارفهم، كانوا حاضرين بس ساكتين ومصطدومين لمقتل (بهاء السنوسي).

في الدايرة الأولى، كانت قائمة حزب النور الناشئ من جماعة (الدعوة السلفية) - ولا أقول (السلفيين) نعرف ليه الحلقة الجاية :) - بتستعين بيه في جولات المرشحين في الشوارع والحملة الانتخابية بـ(إبراهيم بوليعة)، سيء السمعة، وحُكم عليه من قبل بـ6 سنوات سجن، المعروف في شارع 10 في (أرض الضلعي)، ووهو وعيلته معروفين إنهم بلطجية ومجرمين وليهم قهوة بتاعتهم في هذه المنطقة، يُقال إنه تاب على إيد جماعة السلفيين لكن الحقيقة إنه لسة بيمارس مهامه.
DSCN3072
مرشحو الدائرة الأولى - الاسكندرية على رأسم (م/أشرف ثابت)

شيء ممكن مانستغربوش، وخصوصاً إذا كنا عارفين قصة تعيين أمن الدولة لصايع (بدقن) كشيخ لتعليم الصغار في منطقة المشهورة والمنسية (اسطبل عنتر) زي ما حكت ناشطة اجتماعية في أول حلقة لنوارة نجم على قناة التحرير، وإن في قصص على إن (الشحات) مخبر قديم لأمن الدولة قبل "التسلف"


من ضمن انتهاكات دعاية حزب النور، قصة مصدرها لا أكثر من تويتة - إن واحد من المندوبين طلب من مندوب عن حزب (النور) يبطل يعمل دعاية عند اللجان، لأن ده "غلط"، فكان الرد "هات لي دليل من الكتاب والسنة" :O


سمعنا كمان عن تحالف قائمة الدايرة الأولى لحزب (النور) مع الفِل الكبير (طارق طلعت مصطفى)، ثبت بالفيديو زي هنا و هنا وفي الصور المنشورة هنا
وناس ساعتها غيرت النبرة وبقى الكلام (مش كل واحد بدقن يبقى سلفي)
وفي خبر لاستخدام حزب (النور) ومندوبين (طارق طلعت مصطفى) للبطاقات الدوارة، والخبر بيذكر الناشط/عبد العزيز الشناوي، ولو ورد على لسانه فعلا يبقى الخبر صدق، وعلى فكرة عبد العزيز بدقن كبيرة زي السلفيين بس مش منضم لهم يعني :)

وفي لافتة تطوع صاحب قهوة "الصعيدي" بعملها عند الإعادة وحكى مبرراتها هنا
ونفى رئيس حزب النور وجود أي تحالف بين الحزب وبين (طارق طلعت مصطفى) هنا

لكن جالنا فعلاً تأكيد من سلفي أصلي لا ينتمي للدعوة السلفية إن حصل بالذات في الإعادة إن رأس قائمة حزب (النور) وهو المهندس (أشرف ثابت) - موجود في الصورة اللي فوق- إنه دعى التابعين للدعوة السلفية بإعطاء صوتهم لـ(طارق طلعت مصطفى)

وحصل بالاتصال مع بعض مؤيدين حزب (النور) من الأفراد، إننا عرفنا إنهم مانزلوش شاركوا في الإعادة للفردي، لأنهم صدموا بموضوع صفقة حزب (النور) مع (طارق طلعت مصطفى) وإن الدعوات للتصويت ليه من بعض قياداتهم الموجودة في الأحياء المختلفة كانت حقيقية، والمجموعة دي رفضت تدي صوتها للمستشار (الخضيري) المتحالف مع (الإخوان) لأنهم من المجموعة السلفية اللي رضعت كره (الإخوان) مع كل خُطبة ضدهم وإنهم "بيشوهوا الإسلام" وإن (الإخوان) لو مسكوا هيطبقوا الشريعة "منقوصة" و"هيمشوها على مزاجهم".


----تحديث-----
أما المرشح الظاهر لحزب (النور) على مقعد الفردي فئات منافساُ لـ(طارق طلعت) و(الخضيري) فهو دكتور الأعصاب (ياسر عبد القوي)، عيادته مابين (كفر عبده) و(وينجت) في الاسكندرية، وهو خطيب في مسجد (الرعاية) في منطقة (وينجت)، زمان كان الأمن بيجي يحضر الخطب، وبعدين بقى مش محتاج يجي يحضرها.
بحسب المستمعين للخطبه، هو مطلع على التاريخ جيد جدا وحافظ للشعر، وده بيديه تمييز عن باقي خطباء المساجد، وله تأثير على شريحة كبيرة من السلف، وبيجدد نفسه بالاستمرار في القراءة
لكن في (جمعة الغضب) مثل باقي شيوخ (الدعوة السلفية) حذر من الخروج على الحاكم والجمعة اللي بعدها، دعا الناس للخروج!!
--------نهاية التحديث------


بعيد عن التصريحات القيادية بتاعة كلنا حلوين، وإحنا مع بعضينا، وإيد واحدة ضد العلمانيين والليبراليين، كتير من أفراد الإخوان وأفراد الدعوة السلفية ع الأرض زي على "الفيس بوك" فعلا واخدين من بعض موقف وكل واحد بيتَهم التاني بحاجات تقريبا التنظيم بتاعه هو كمان عملها، بس مقضينها على طريقة "العيبة لما تطلع مننا ما تبقاش عيبة"

مواقف جماعة الإخوان والدعوة السلفية من بعض الأحداث، نتكلم عنها إن شاء الله مع نقاط عامة ومجمعة في "كل هذا الخراء" :)


للحديث تحديث :)

شيء من الايفيــــي : الحلقة التانية

أحزاب "ثورية" ف اسكندرية
يعني أحزاب تم إنشاؤها بعد قيام الثورة

حزب العدل
المؤسس:  أشهرهم مصطفى النجار
هو نفسه مرشح في القاهرة، ونازل إعادة
العدل ف اسكندرية كان مرشح قوائم على دائرة واحدة من الدايرتين وهي الدايرة الأولى.
 تشرفنا في مجموعة "احمي صوتك" بمقابلة رأس القائمة (سالم شعوط) ، وكان في حوار مفتوح مع كذا مرشح من دواير مختلفة،  فريق (احمي صوتك) كان "بيرمي" كلمة وكان يتنظر ردود المرشحين وكان مرشح العدل فعلا مش على المستوى خالص ومن أكثر الكلمات نشازا هي كلمة "فئوية" اللي بتسبب حساسية مفرطة عند أمثالنا
وتشرفنا كمان بمقابلة (عاطف زغلول) مرشح الدايرة الرابعة فردي واللي ذكر بكل فخر إنه كان الذراع الأيمن لـ(رشاد عثمان) أيام السادات وإنه ماكنش فلول وقتها
المشترك بين مرشحين حزب العدل هو النقص الشديد في الموارد المالية اللازمة للدعاية، ف حين إن (مصطفى النجار) كانت دعايته في القاهرة في نفس بذخ دعاية (طارق طلعت مصطفى) في اسكندرية
مصطفى النجار
مجتهد، مجتهد لأقصى درجة، و"من جد وجد"؛
النجار كان في حملة (البرادعي) سنة 2010، واجتهد لحد ما بقى منسق الحملة في ديسمبر 2010 مكان (عبد الرحمن يوسف)  في ناس من الحملة معتقدين تماما إن قبل ديسمبر 2010 بدأت علاقة (النجار) بسلطة عليا في مصر؛
وقت التحضير ليوم 25 يناير، النجار ماكنش من المؤيدين للنزول بالعكس كان "ضده" وكان "بيتريق" عليه، لولا ضغط أعضاء الحملة  في المحافظات المختلفة، (مصطفى) اتصاب برصاصة مطاطي  واتمسك بس خرج تاني يوم، طلع بعدها في قناة (الجزيرة) ينفي إنه منسق حملة (البرادعي)، وإنه كان مجرد عضو فيها (يبقى أن أجد مقطع هذا الفيديو القديم)، مع إن اسم (مصطفى النجار) قبل كدة مااتبناش إلا بارتباطه بحملة (البرادعي) ووصوله لدرجة منسق الحملة، لو نفتكر كمان طلع في برنامج (العاشرة مساءا) بعد خلع (مبارك) أظن واتكلم عن خطة التوجه لميدان التحرير واحتلاله واتكلم كأنه مفجر الثورة، وطبعا طريقته في تفعيص عينه والكلام بلغة عربية مقعرة أحيانا لصبغ المصداقية على الحديث
أصلاً (مصطفى النجار) قعد مع (عمر سليمان) زي اللي قعدوا وتاني يوم نزل الميدان وطلب من النشطاء يروحوا واتهزأ واتشتم

لكم أنت تتخيلوا أثر تنكر إنسان "صادق" مثل (النجار) لاتصاله بشخص (البرادعي) على مصداقية الحملة، بجانب الحملة الشعواء المقامة ضد وطنية (البرادعي)،وخلاص ماينفعش (مصطفى) يكمل نشاطه داخل حملة (البرادعي)، شاطر يا(مصطفى) برافو عليك، نكافئك  إزاي؟ لازم مكافئة لأن (النجار) مش شغال ببلاش، ودلوقتي هو وصل لأعلى "شعبطة" ممكن يوصلها مع حملة (البرادعي) محتاج سلم تاني
إزاي؟ (النجار) محتاج كفيل، إيه رأيكم في حبايبنا (هشام الخزندار) رجل الحزب الوطني وصاحب في شركة (القلعة) الأستاذ (أحمد هيكل) لو يتولوا الصرف عليه؛
قالك ونعمله كمان حزب (العدل)، وندربه في (المعهد القومي الديموقراطي) الممول من الحكومة الأمريكية، ياعيني كتير كتير صدقوا  "مارطن روخر كينغ" وانضموا للحزب "الثوري" حزب (العدل) وقالك "العدل هو الأمل" ده بالظبط اللي كان الدكتور بيعمله مع أعضاء الحزب في المحافظات عشان يجمع عدد كبير يكفي تكوين حزب وقصاده يبيع "الأمل"، "مفيش فلوس كفاية لتمويلكم إحنا حزب جديد لسة"، وهم في المحافظات يجمعوا من بعض فلوس عشان اللافتات والدعاية وغيرهم مبرطع ف العز
لأن الحقيقة الدكتور سيطر على تمويل شركة (القلعة)  للحزب وصرفها معظمها على نفسه في الدعاية زي ماشاف سكان دايرته وما يمنعش إن (عمرو الشوبكي) و(أحمد إسماعيل شكري) في شربين في الدقهلية نابهم من الحب جانب نونو وقدروا يمولوا حملتهم جزئيا .(أحمد شكري) ده ابن اخت (البرادعي) أيوة بس مش بردعاوي وصديق للنجار من زمن يعني

حزب الوعي
أبرز المؤسسين: (شادي الغزالي)؛
والله ماتشرفانش بالتعرف على مرشح غير بالتليفون، بس رأس القائمة الوحيدة اللي نازلة ف اسكندرية - قائمة الدايرة الأولى -معروفين  عند النشطاء ومنهم نشطاء ومجموعة نحسبهم صادقين وجزء منهم أعضاء في مجموعة (لازم) بس مفيش فلوس وماقدروش يغطوا الدايرة الكبيرة، كانوا موجودين  في المشرحة بعد وفاة (بهاء السنوسي)؛

حزب التيار المصري
هو حزب يجمع مجموعة من شباب الإخوان ومجموعة من شباب الليبراليين والمستقلين، كانوا في (تحالف الثورة مستمرة) ماتقدرش تقول الحزب ده تبع "فلان" بس ممكن نقول إن منهم (بهاء السنوسي) 25 سنة - شهيد مديرية الأمن ف اسكندرية اللي مات برصاصة ف راسه وسقط جنب زميله في الحزب (حسن البغدادي) ومرشح الدايرة الثالثة فئات في اسكندرية، (حسن) أخد 7 آلاف صوت باين ولا حاجة طبعا، يدوبك مفيش فلوس، غير إنه علق حملته الانتخابية ونزل الشارع مع اللي نزلوا في الأحداث الأخيرة
عيال خايبة مش عارفة من أين تؤكل الكتف
منهم كمان (سمية عادل) تاني مرشحين قائمة الثورة مستمرة في الدايرة الأولى قوائم، وأصغر مرشحة، كتبت في البايو بتاعها : "اترشح لأكون قدوة حسنة للبنات المحجبات ليشاركوا ف الحياه السياسية"؛
مع العلم إن في مرشحة في القاهرة (قائمة الثورة مستمرة) برضه اسمها (هدى برسوم) قالت إن من أهدفها "تقديم نموذج للمرأة المسيحية الشابة التى تهتم بشئون الوطن" طب نعمل إيه يعني؟ مش فاهمة
منهم كمان (محمد سعد) مرشح الفردي عمال في الدايرة الأولى، اتغدر بيه إعلامياً، هنحكيها عند حزب (الحرية والعدالة) الحلقة الجاية  عشان هم شاركوا ف المقلب

في رأس قائمة تحالف (الثورة مستمرة) كان في كمان (وليد فكري) ده من حزب (مصر الحرية) من العيال اللي مش مفتحة اللي نزلت المظاهرات الأخيرة وعلقت حملتها الانتخابية ومعهمش فلوس دعاية،
هي قائمة التحالف ماحصلتش على مقاعد في الدايرة الأولى، والناس اللي "فاهمة كل حاجة وكدة" يعني بيقولوا على (وليد) "كافر" عشان في حزب (حمزاوي) نقول سطرين على (مصر الحرية)؛

حزب مصر الحرية
المؤسس: (عمرو حمزاوي)؛
غني عن التعريف، بس نحب نرسم خطين تحت حقيقة إنه كان مُنعم بتمويل كبير لحملته الانتخابية ماحصلش عليه حد في المحافظات؛
ممكن نقول كمان إن كان في مرشح فردي فئات الدايرة التانية اسكندرية نفس دايرة (الخضيري) و(طارق طلعت) من حزب (مصر الحرية) اسمه (وائل أحمد حسن أحمد حنورة)، كان موجود في لقاء فريق (احمي صوتك) مع بعض المرشحين ، ماقدرش يقدم نفسه كويس بس كان بيسمع أكتر، وكانت الحاجات اللي بيقف عندها عشان يكتبها في المفكرة اللي معاه، كانت ذكية شوية، ممكن نذكر كمان إن اخته (لمياء أحمد حسن أحمد حنورة) مرشحة رقم 7 من 10 مرشحين على قائمة الحزب الفلولي (الإصلاح والتنمية)؛

 ف اسكندرية مفيش غير قائمة الدايرة الثانية اللي أخدت نسبة زي نسبة (الكتلة المصرية) ونسبة (الوفد)، المتمثلة في شخص (أبو العز الحريري) واذكر إن هو اللي قال لنا القوائم وجوه والناس بتنجذب للشخصيات المعروفة، ولو إن بالنسبة للنتائج ممكن نقول إن اسم (جماعة الإخوان) كان أهم من اسم مرشحين رؤوس قوائمهم في أكثر من مناسبة؛
ونذكر هنا إن في كنايس ثورية بالذات في منطقة معينة في الدايرة الثانية لم تدعوا للتصويت للكتلة المصرية، وإنما نصحت بالتصويت لقائمة الثورة مستمرة، دول "مظهر شاهين" الكنيسة :) باين كدة



حزب الوسط
رئيسه: (أبو العلا ماضي)؛
حزب الوسط كان حلمه يتأسس من 10 سنين تقريبا وما حصلش على التصريح الرسمي غير بعد خلع المخلوع وكان أول حزب يوافق على إنشائه بعد 11 فبراير 2011
معروف إن مؤسسين حزب (الوسط) ليهم مرجعية إسلامية، وإن كانوا ما بيستخدموش أي دعاية دينية،  مجموعة الحزب ف اسكندرية، اشبه بالعيلة بصراحة، مش سمن ع العسل يعني، بس كل التعاملات مابينهم غاية في الاحترام، ماكنش فيهم مرشحين أقوياء بقوة مرشحهم في دمياط (عصام سلطان) اللي كان على رأس القائمة وحصل على مقعد في البرلمان؛
على مستوى شخصي: لا أعيب على الحزب إلا وجود (سليم العوا) بينهم
واذكر كويس كلمة قالها (عصام سلطان) في برنامج (البرنامج)  مع (باسم يوسف) عن أسلوب الإخوان في الدعاية: "أنا أخبط عليك في رمضان أديك شنطة رمضان، وبعدها بشهر اخبط عليك تاني أقول لك فاكرني أنا اللي جت لك من شهر، أنا نازل الانتخابات" ونفتكر له كمان بعد الخطاب العاطفي للمخلوع إنه عمل مداخلة مع (رولا خرسا) و(عمرو أديب) في قناة (الحياة) وطلع فيهم لما كانوا بيدعوا الناس يروحوا بيوتهم ويسيبوا مبارك يقعد 6 شهور وقال لهم مبارك ده مخادع
ونفتكر لحزب (الوسط) كمان إنه ماشاركش في "غورة الأحزاب" أو "غزوة الأحزاب" اللي راحت توقع على وثيقة العار
ولو إن في الأخبار الجديدة إن (أبو العلا ماضي) حاضر اجتماع مع الجنزوغي والعسكر، عشان تعيين مستشارين من القوى السياسية،  أدينا متسنيين الكلام
حزب (الوسط) في الانتخابات تحالف مع حزب (الريادة) وهم مجموعة خارجة برضه من عباءة (الإخوان المسلمين)، وبحسب ماقيل لي إن الحزبين بعد الانتخابات احتمال يدوبوا في بعض ويكونوا حزب واحد لأنهم واحد بحسب المتحدث الإعلامي لفرع الاسكندرية

للحديث تحديث :)

شيء من الايفيــــي : الحلقة الأولى

على أد ما حبيت الشغل مع مجموعة (احمي صوتك) ولازال الشغل الأحب لقلبي، ومن أفضل المشاريع اللي هتقوي الشارع في الوقت الجاي إن شاء الله، على أد ما تسرب ليا وقت الشغل شيء من الإيفي والإيخيييه وده عند المرحلة الفرز؛ فرز الأحزاب والمرشحين بما يتوافق مع مبادئ المجموعة ومدى أهليتهم للاستجابة لمطالب الجمهور كيف ما أفرزت نتائج الاستطلاع (نبض الشارع) وخصوصا في مرحلة المقابلات مع بعض المرشحين، الكلام بالغالب هايكون بيخص اسكندرية إلا لو ذكرنا غير كدة

نبدأ بالإيخييه أوي عشان نحاول نختم بالمسك ، القصة على أربع حلقات إن شاء الله

الكلام كتير، ممكن تروح علطول ع الحزب اللي يلزمك
أحزاب الفلول ف اسكندرية
حزب الاتحاد
المؤسس: (حسام البدراوي)؛
 الحصيلة "صفر" وع الشمال

حزب مصر القومي
المؤسس: (طلعت السادات)؛
 الحصيلة "صفر" بس مش ع الشمال، المسؤول عن الحزب ف اسكندرية هو (عفت السادات)؛
عفت السادات

هو حاول يتاجر بالماضي على إنه "مُشَرف"، الاتنين راحوا لحالهم، هو قاعد لينا فيها، ونادي الاتحاد تحت أمره، واللي بيشارك في المظاهرات وعارف شلة اتئلاف "زحلقني" عارف شوية "الزحاليق" بتوع نادي (الاتحاد) اللي بيشاركوا ف المظاهرات بالأجرة غير البلطجية أمثال مجموعة البلطجي (عادل شكل)  اللي بيشغل معاه مجموعة من مشجعين السبرتو ومهيجين جماهير بجدارة في المظاهرات وسبب تشوييها والتفاصيل أكتر عند مجموعة مراقبين من اسكندرية هنا
هو خسر ومش هيسكت، وباي ذا واي القائمة ديه كانت "ريكومندد" من أمن الدولة برضه، لبعض الأغنياء الجدد عشان مايخليش اللي ساكن في مكان فقير يتساوى بالأعيان سكان المناطق الراقية، أيون زي ما بقول لكم كدة

تحديث:  من مشاهير المرشحين لحزب (مصر القومي) الظاهرة اللي خلقناها بالأهمية اللي إديناهلها (توفيق عكاشة) في المنصورة



حزب الإصلاح والتنمية
 المؤسس:  (عصمت السادات) (6 يناير 2009) وانضم عليه (رامي لكح ) هات فلوسك على فلوسي
الحصيلة صفر - بس تاني- مش ع الشمال، صفرهم إسود
أي كلام، وعملوا إعلانات وفي التلفزيون معاهم فلوس يتاجروا بيها وأشياء أخرى، إيه بقة؟
عندك رقم واحد: الثورة ومفيش أحسن من كدة تجارة، إزاي؟


خيبتك ياأبو بخيت، قال إيه ائتلاف الثورة، لا ائتلاف ولا حاجة أصلا، يعني رأس القايمة في الدايرة التانية - اسكندرية -(أحمد نصار) المحامي مؤسس (مركز النصار لحقوق الإنسان)، والمعروف بين النشطاء بمركز "النصاب" لحقوق الإنسان، ويقال إنه من رواد حركة (6 إبريل) ف اسكندرية، غير إنه موجود دايما في الصحافة في الأخبار المشتعلة زي هنا وهنا

أما رقم اتنين: الشهدا والتجارة شطارة
KS_AM

د. (على قاسم) "خال خالد سعيد" مرشح على رأس قائمة الدايرة الأولى، على إيده اليمين (خالد سعيد) وعلى إيده الشمال (أميرة سمير) ماتت برصاصة ف البلكونة يوم 28 يناير، خالها هو المرشح التاني على قائمة الدايرة التانية
ومش كل أهل شهيد يبقى كويس، ولا ألتمس للدكتور (علي قاسم) العذر إنه مش عارف، لأن أقبح من مشهد الصورة مناقشتي معاه شخصيا وبصفة شخصية في انضمامه للحزب ده.


الكتلة المصرية
تحالف كذا حزب منهم
    المصريين الأحرار  
المؤسس: نجيب ساويرس
حصلوا على نسبة تمثيل وإن كانت الحد الأدنى
تقريبا جميع ممثلين الكتلة المصرية ف قوائم اسكندرية من حزب (المصريين الأحرار) بس هم مش "مصريين أحرار" هم "مصريين فلول" وكانوا حزب وطني
بس الكتلة وصاية (ساويرس) والراجل مسيحي يبقى الكلام ع الكنيسة (الكنايس اللي بيقدروا عليها، مش كلهم وهنتكلم لاحقا) وكمان بيزنس مان وشيك وإعلاناته ألوان لا وكمان واصل برة "بالخارج" يعني
في ناس اختارت (الكتلة المصرية) فاكرة إنها هتدخل (ساويرس) نفسه البرلمان، أو عشان شخص زي (أبو الغار) موجود في القاهرة يبقى يجوز انتخاب القائمة ف اسكندرية. القوايم فيلم أصلا وف الآخر بترسى على فردي، الفلول في القايمة دي مذكورين هنا
الكتلة كمان (أمن الدولة) بيوصى بيها، حتى إسألوهم
غير طبعا إن (المصريين الأحرار) اتعاملوا مع المصريين إنهم "أحرار" بطريقة الحزب الوطني فجنب توصيات أمن الدولة كان في توزيع أكل وبطاطين و"كروتة" أو كروت شحن
التجمع
رئيسه الحالي:( رفعت السعيد)؛
أبرز المرشحين منهم في اسكندرية هو مرشح العمال في الدائرة الأولى  هو (عبد الفتاح محمد عبد الفتاح)، هو عضو قديم بالمجالس المحلية، وماسمعناش عنه خير، لقينا ليه بوستر على الفيس بوك مع الناشط (صفوان محمد) المشهور بصاحب أول توكيل للـ(برادعي) والمرشح فئات في نفس الدائرة عن (الكتلة المصرية) وبعد الاتصال بـ(صفوان)، قال صراحة "حزب (التجمع) ألعن من الحزب (الوطني)، لأنه مش متعلم عليه بفساده مع إنه نفس السياسة" وذكر مرشح تاني بس كان شورى مش شعب إنه الأفضل (في خلط ف الموضوع ده هنحكي عنه قدام) وبعدين قال بالحرف "لو رسيت على كدة هانتخب العمال بتاع الإخوان على الأقل مش فلول"؛
وكمان دعاية دينية؟ طالما مش تيار إسلامي وفلول يبقى عسل ع القلب

الوفد
رئيسه الحالي: (سيد البدوي)؛
معاملة (الوفد) زي (التجمع)، أحزاب كارتونية شديدة الارتباط  بنظام مبارك وكان ليهم في الأول تحالف انتخابي مع حزب (الحرية والعدالة) وبعدها انفصلوا بسرعة
حصلوا على نسبة تمثيل وإن كانت الحد الأدنى
 على رؤوس القوائم كان في فلول زي الكتلة المصرية، موجودين في نفس الكشف هنا

وبكدة يبقى الكتلة المصرية والوفد ساعدوا في رجوع أعضاء الحزب الوطني للبرلمان


المحافظين - حقوق الإنسان والمواطنة  - الثورة المصرية -  المواطن المصري مؤسسينها من الفلول واندثروا قبل ما يطلعوا ونسبة الأصوات ليهم كانت ضعيفة جدا زي ما ظاهر هنا في فرز دايرة من دايرتين القوائم في اسكندرية وفي الخبر بتاع المصريين بالخارج
المصدر: أحد القائمين على المتابعة في الانتخابات

للحديث تحديث :)

20 نوفمبر 2011

الاسكندرية مسيرة تطالب برحيل العسكر

بعد مجازر التحرير، تظاهر مجموعة كبيرة في الاسكندرية أمام مديرية الامن يوم 19 نوفمبر 2011 قتل خلالها الناشط/بهاء الدين السنوسي
بعد جنازته يوم 20 نوفمبر انطلقت مسيرة من المشرحة إلى المدافن ثم إلى المنطقة الشمالية وأخيرا مديرية الأمن

المسيرة من المشرحة إلى مدافن المنارة:
(جاري التحميل)

المسيرة من المدافن إلى المنطقة الشمالية: (الجزء الهادئ من اليوم)



عند مديرية الأمن (بدء المواجهات من حساب مراسل أون تي في)

25 أكتوبر 2011

وقفة أمناء الشرطة والعساكر في الاسكندرية

نظم أمناء الشرطة والعساكر في عديد من المحافظات وقفة للمطالبة بحقوقهم في المرتبات والرعاية الصحية والمساواة في المعاملة مع الظباط والوقوف ضد الفساد بحسب ما ذكروا.

- بحسب ماذكر أمناء الشرطة المتظاهرون عند مديرية أمن الاسكندرية إنهم تجمعوا عن طريق الانترنت عن طريق صفحة "ائتلاف أمناء الشرطة"، قد تكون هذه أو تلك.
- كما ذكر أحدهم أنه لا يوجد عدل في الاعتماد على ما قد يحصل عليه الأمناء من الجماهير، لأن من يعمل في المرور ليس كمن يعمل في أماكن لا يوجد بها تعامل مع الجماهير.
- بسؤال أحد الأمناء عن إمكانية فض شرطة الداخلية أو الشرطة العسكرية وقفتهم بالقوة، رد أنه غير ممكن لأنهم أقوى من يمكن أن يقوم بوقفة أو اعتصام واضرابهم يهدد مصالح حيوية وأنهم هم من يقوم بالعمل وينزلون إلى الشوارع وليس ضباط الشرطة
- عند طلب التسجيل، طلب الأمين ألا يظهر وجهه في التصوير.


27 يوليو 2011

الميدان اللي على حق ما يقلش للنظام لأ

نكمل كلام التدوينة اللي فاتت - هنا ندخل في حلول عملي - هايكون على أد طبيعة ميدان الاعتصام في سعد زغلول
نعرض كام مشكلة الأول عشان نربط بيها الحلول

1. اللجان الشعبية مخترقة
- في شخصيات تصرفتها مش مظبوطة أبدا، شخصيات تانية ما تقدرش تكون فرد أمن (ده تحقيق؟)
- المارة خصوصا اللي من الحارات الشعبية  يعرفوا ناس معينة بالشكل إنها مش حد كان بلطجي في وقت ما وتاب مثلا، إنما هم عارفين إن " فلان من عندنا ف المنطقة ولحد دلوقتي شغلته كذا أو كذا وبيتشغل لحساب فلان" وبالنسبة لهم طالما بيأمن المداخل يبقى اللي جوا ........"
- ساعة ما بيحصل أي صوت (مسدس صوت/صواريخ/بمبم) نلاقي كام واحد يزعق وكام بنت تصرخ "قتلوا وااااحد" " البلطجية جايين من عند البحر" (=ضفادع بشرية مثلا) "الجيش جاي يضربناااااا" وماتشوفش طرف بدلة ميري على مرمى البصر

2. سوء استقبال الزوار
- إحنا مضايقنا شكلنا إننا شبه كائنات ف الجبلاية الناس بتتفرج عليها
- لما يبدأوا يسألوا أي حد جوا فاهم أو مش فاهم ممكن يرد، غير الفتايين أو المشعللين اللي عند السور من برة

3.  إجهاد وعصبية بعض المعتصمين
- اللي بيبات ومعتصم وقت طويل ساعات بيكون فيهم مجهد ومعندوش خُلق إنه يستقبل حد يقعد يشرح له، خصوصا لو واحد مش جاي يسأل إنما جاي يردد الاتهامات اللي سمعها ف الاعلام أو لو مش نيته يستفسر إنما يشعلل الدنيا


هنعمل إيه؟

حقائق نحب نرد بيها على كلام المارة
  • العيال مفلسة
  • الخيام يعني في منها عبارة ملايات ومشمعات، وفي منها مثلا ممدوح حمزة تبرع بيها (مايمنعش إن اللي جواها بيقول فيه قصايد هجاء)
  • إحنا مش عاطلين اللي متخرج مننا وبيشتغل بيروح شغله الصبح أو وقت الوردية بتاعته:: كتير من اللي بيباتوا طلبة جامعة وف أجازة، بياخدوا مصروفهم من أهلهم وأهلهم بيزفوهم بالدعا عليهم وهم نازلين عادي يعني
  • في ناس تقدر تخلص شغلها وهي في الميدان، لأن شغلها مش محتاج غير كمبيوتر متوصل بالانترنت
  • ياااه حضرتك بتتكلمي زي ماما/بابا، بس هو كدة من القلق، وإحنا يعني عاجبنا القاعدة ديه مش نروح مصيف أحسن
لجان

قائمة بأسماء المعتصمين أو المنتظمين ف الحضور، عشان نوزع أدوار
1. لجنة أمن
مليش خبرة أمنية أصلا، بس مثلا لو ف البيت لو سمعنا صوت ف الشارع أول واحد نسأله الحارس "هو في حاجة" "لا اطمنوا"
  • صوت رصاص:
    • يبقى نحتاج مجموعة كدة هي اللي تقوم بالواجب ده - عشان لو حد وقف ف وسط الميدان يصرخ ويولول يبقى ما يلزمناش
    • لو في حاجة- مش صح نقول "البنات تدخل الخيام" يتأمن مخرج ليهم من أي ناحية
  • خناقة بياعين ومثيري شغب:
    • ياريت دايرة الخناق ماتوسعش ومايدخلش فيها غير المسؤول قدام المعتصمين عن الأمن
    • لو واحد بيفتي وعامل نفسه خبير استراتيجي ومش ف اللجنة الاعلامية، ياريت هو أول واحد يتسحب لبعيد
    • لو كانت حلقة نقاش، يبقى فصل بين الفرقين لحد ما يهدوا
  • المسيرات والهتافات:
    • تأمينها وتنظيمها وقيادتها مسؤولية أشخاص محددة واللي يحددها ويقرر مكانها أشخاص محددة 

2. لجنة إعلامية
  • كشك إعلامي 
    • عند المدخل الكبير (ياريت يكون ده مكان الدخول الوحيد، والمدخلين التانيين للخروج)
    • الكشك ده عليه وردية، اللي هيكون عنده هايكون واحد مش بيتعصب أو أعصابه تلفانة من الاعتصام أو محبط، لازم يكون شخص صبور ولبق وواعي، هايكون معاه منشور صغير يوزع على اللي داخل "يزور" ويرد على الأسئلة، ولو واحد جاي يغلس يديله نسخة من المنشور وبصنعة لطافة يمشيه
    • قول اللي يجمع ما يفرقش: بقة عادي في الميدان وبراه، كل واحد عرف كلمتين ولا 100 ملف عن فساد العسكر يستهل بيه مناقشته :( | قول عيش ... حرية ... عدالة اجتماعية والباقي هيجي ف السكة  [أخدت بالك علاء عبد الفتاح قال أنهي هتاف كان بيخلي الناس كلها تهتف، وأنهي هتاف بيخلي مجموعة صغيرة هي الل تهتف؟]
  • الأسوار
    • عدد من الشباب متوزع عند المنطقة الخلفية معاه المنشور يديه اللي بيسأله أو يرد على الأسئلة ( لو ما عملناش كدة هيقف بدالك مخبر أو واحد فتاي)
يعني ع المداخل محتاجين خلطة من : لجنة إعلامية + لجنة أمن ( مخ + عضلات)
  • الشاشة الاعلامية الرائعة:
    • ممكن يتعرض عليها الحقايق المرًة اللي بيفندها الأسواني هنا عند القضاة والداخلية
    • بجانب الفيديوهات اللي بتتعرض أصلا، لأنها مفيدة للي مش بيعرف يقرأ وخايف يقرب من سور الميدان يسأل
  • محتاجين نتواصل أكتر مع المصانع
  • منشورات: 
    • مثال1:
    ع الوش المطالب السبعة المشتركة لجميع المحافظات، سوا دي أو دي:




    على ضهر المنشور: أخبار المحافظة مثال ف اسكندرية
    1. نقل الضابط وائل الكومي المتورط في قتل عدد... من المتظاهرين إلى مباحث الكهرباء (حيث الاتاوات)
    2. ترقية خالد شلبي المتورط في ..... إلى منصب مدير المباحث في محافظة الاسكندرية
    3. إخلاء سبيل المتورطين في أعمال شغب استاد اسكندرية بعد دفع المصيلحي ألف جنيه كفالة لكل منهم (القانون ده في وقت الثورة؟)
    4. استحواذ محمد يوسف رئيس الشركة القابضة للنقل البحري على نصف مبلغ خصخصة العاملين بها (وهو المحكوم عليه سابقا بسنة مع النفاذ)
    5. ..... إلخ

      • مثال2:
    • حملة هما قاعدين ليه بتتعمل ف المترو ف القاهرة ممكن عند محطات الترام 
      • مثال3
    • تصوير فيديو كل إسبوع مرة مع فئات مختلفة (ليه أنا لسة معتصم؟)
      • مثال4:
    • اتعمل استطلاع رأي مكتوب ف الشارع عن رأيه هل تم تحقيق المطالب ولا لأ، الناس فرحانة إن "الشباب" مهتم يعرف رأيهم

      3. لجنة تنسيق فني/جمالي
      • الاذاعات: شوفوا لها حل، ممكن بتوزيع الأيام ومن غير خناق (مش 100 ألف أغنية من كل الأماكن، محتاجين ودننا)
      • اللوحات والبانرز: بالتنسيق عن طريق إذن من مشرف أو مجموعة مشرفين قبل تعليق أي حاجة ومكانها فين وخلافه
      • يفط الخيم (ممكن كمان ردا على كل ما حد زائر يقولك إيه ده؟ خيمة شيوعين؟ خيمة مستقلين؟ دول الليبراليين؟ نعمل لوح للخيم: خيمة "العيال السيس"، خيمة "أبو لهب"، خيمة" المشاغبين")
      • تلوين مع الأطفال زي ف التحرير في الخيمة ديه
      • تلوين على وش الأطفال ( في واحد بيجي من وقت للتاني يسترزق بالموضوع ده، ممكن التنسيق معاه)
      • خريطة الميدان: ممكن يتعمل واحدة، يتحدد عليها بالذات مكان الأكشاك الاعلامية، الميديا سنتر بتاع السماعات والأغاني،
      • مكان للصلاة (وبلاش السماعات ع الآخر وهو بس صفين صلاة) ممكن يكون ف الركن اللي عكس ركن الشاشة عشان يبقى فيه اتزان
      • كنس الشوارع: كل يومين مثلا مجموعة تطلع تكنس حولين الميدان أو حتى شوارع بعيد (لأن المحافظة بتطنش ف أيام) واسمعوا دعوات الأهالي :) [مطلوب تسريب عدد واحد مقشة من بيتكم وهم يشتروا لنفسهم واحدة جديدة]
      • تنظيم البياعين اللي داخل السور وبراه واعتمادهم والتعاون معاهم لو يبيعوا حاجة تفيدك أو تنصح الزوار إنهم ينَفعوا البياعين
      • رسومات كاركاتير وشعر راح فين الكلام ده؟
      • مكان للكبار: كراسي مثلا لو البنشات مش بتقضي اللي مايقدرش يقعد ع الأرض، وجود الأهالي يفرقنا من شوية عيال لأسر مقدمة كفنها لمصر، وهتاف "ياأهالينا أنضموا لينا" - يبدأ م البيت (يابابا/ياماما أنا محتاجك، ساعدونا، وجودكم مهم، ده إنتوا جيل التاريخ ماتكملوا معانا، وأي حاجة بقى تخلي باباك وماماتك يحنوا كدة) حتى لو يوم أو يومين ف الإسبوع، ويقعدوا الأهالي مع بعض يخلصوا كل الشتيمة اللي عايزين يشتموهالنا وبعدين يدعو لنا :-)
      4. لجنة اقتصادية
      ممكن يكون في معارضة شديدة عليها وممكن تنجح 

      • المؤن سواء المعتصمين أو أهلهم بتيجي بالتبرع (أكل، شرب، شاش وقطن)
      ممكن يتعمل لها مكانين أساسيين الناس تبقى عارفة تجيب منها (أو لو أحسن كل مجموعة حسب خيمتها يبقى أوك)

      • لوحات أو جيش بارتي (على رأي "ماهي" ) جماعي يعني حد مسؤول عن التجميع، مش أي حد يعدي يلم فلوس


      !! ساعات ولاد أو بنات بيكونوا مجهدين بدري ومش ميعاد نوم بس عشان الخيمة اللي بتكون مخصصة لنوم البنات أو للولاد بتكون زحمة، بيفضلوا نايمين على نفسهم وهم قاعدين، ف لو ممكن بما إن على المغرب مافيش شمس يكون القعدة قدام الخيمة، عشان اللي عايز يدخل يريح شوية يبقى براحته
      !! ضروري إشراك أهالي الشهدا ف الأنشطة والتصوير معاهم
      -----------------------
      للحديث بقية: شاركوا بأفكاركم أو اعتراضاتكم أو توضيحاتكم وياريت تجارب كل المحافظات عشان نفيد بعض

      ربنا يقصر علينا أسابيع الاعتصام

      وحد صفك .. كتفي ف كتفك ... حركة وطنية واحدة... ضد السلطة اللي بتدبحنا

      24 يوليو 2011

      اشتعال جمعة الحسم- المنطقة الشمالية - الاسكندرية

      النهاردة الخميس: 21 يوليو:
      في اعتصام سعد زغلول اسكندرية ، بعد الفطار الجماعي مع أهل الشهدا - اللي اتعمل عشان نحاول نلم الشمل بعد ما المية اللي اترشت ف الجنينة خلت جميع الخيام تنقل ما عدا خيم أهالي الشهد ف نص لوحدها - كنا بنسأل هنروح فين بكرة؟ أهالي شهدا زهقانين من قعدة الجنينة ومتضايقين من تعامل المارة مع الميدان على إنه مزار.
      طلبوا مسيرة للمحكمة حتى لو قفلة يوم الجمعة بس هي رمز للمكان اللي هيجيب حق الشهدا م اللي قتل.
      وبعدين مجموعة مننا واقفين نتفق واحد جه قال لنا لا ده ف اجماع على المنطقة الشمالية اعتقد إن "ماهي" تعرفه فقالت له "أوك، مفيش مشكلة" وهو فعلا مفيش مشكلة.
      إلا إن شوية مننا كان قلقان
      النهاردة الجمعة: 22 يوليو: 
      مفترض انطلاق المسيرة بعد صلاة الجمعة من مسجد القائد إبراهيم للمنطقة الشمالية
      أنا مارحتش م الأول عشان كان عندي "عجلة إنتاج" :S - إيوة حتى يوم الجمعة- بس المسيرة عدت من تحت البيت طلعت صورتها م الشباك وشفت خليط من "اللي متعلم عليهم" على نشطاء ومتظاهرين حقيقين (كالعادة يعني)
      وقفت عجلة الانتاج - وجهزت المعدات ونزلت بعد ساعة من مرور المسيرة -ووصلت المنطقة الشمالية
      لقيت عدد صغير جدا  من المجموعة اللي اعرفها وناس ما أعرفهاش قاعدين على أركان الشارع يمين وشمال، والمجموعة الأكبر عند حواجز بوابة المنطقة الشمالية وأغلبيتهم فعلا "متعلم" عليهم- اتصلت بـ"ماهي" أعرف هما فين - جه اتنين "متعلم عليهم" يشخطوا ف الناس يقولوا " إنتوا قاعدين هنا ليه؟" "كله ع البوابة" ياأستاذ، وإنتي ياللي بتتكلمي ف التليفووووون" " المحترم يروح يقف عند البوابة، والمش محترم يمشي من هنا"
      قلت أعدي الشارع عند بوابة المنطقة الشمالية أشوف وأراقب اللي هيحصل بعد التجميعة ديه. 
      رحت لقيت مجموعة "تويبس" صغيرة جدا، آه "ماهي" قالت لي أنهم رجعوا ميدان الاعتصام عشان جالهم أخبار إن عدد اللي بيحموا الخيم ضعيف جدا والاعتصام ف خطر- أول ما عديت ناحية حواجز البوابة كانت التويت بتاعتي "الفلول كتير"- كانوا كتير اوي 
      شفت حتى واحد معاق ذهنيا - من مرات فاتت أعرف إن أرزقية بيستعملوه للهجوم على العربيات والخبط على إزازها.

      شباب التويتر كانوا قعدين يهزروا مع اتنين من الشرطة العسكرية - بس هم مركزين عينهم بعيد وبيحاولوا مايضحكوش
      بعدين واحد منهم بيدخن قالوا طيب سيجارة، رد واحد منهم قال أنا مش باشرب يعني هو في ناس ممكن تشرب سجاير ف الجيش بس أنا مش باشرب، وبعدين كرر الكلام مرتين، زي ما واحد يحكي حاجة "بطولية" ومايلقيش مدح كفاية يقوم يعيدها تاني
      طيب نعمل إيه؟ طلعت له إزازة مية- قال لا شكرا مش عطشان وهم واقفين سايحين
      بعد شوية لقيت خط بتوع الشرطة العسكرية واحد ماسك إزازة فيها كركديه يشرب "بق" بسرعة ويسلمها للي جنبه وهو مش بيبص له وهو يشرب ويسلمها للي بعده - حتى الشرب عسكري
      واحد من التويبس: "دم الشهدا ده - الأحمر اللي بتشربه ده دم الشهدا" ضحكوا أخيرا :)
      بعدين قعدوا يغنوا شوية 
      بعدين كان في قناة (جزيرة أو تحرير) حقيقي مش فاكرة - التويبس"إيه ده العيال بتوع الثانوية العامة رايحين يقولوا إحنا واقفين عشان الحد الأدنى للكليات - لا لا لازم نتحرك نعرفهم الوقفة ليه"
      عدوا الشارع تقريبا من الزحمة ما وصلوش للكاميرا أو طنشوا- ما سألتش
      بعدها أنا وبنتين عدينا الشارع ووقفنا مكان ما الكاميرا كانت واقفة بعد ما اتفضت الزحمة وقعدنا نبص شوية على المجموعة اللي واقفة عند الحواجز ومش عارفين نرجع ميدان الاعتصام ولا نفضل- خرج من المجموعة اللي عند الحواجز شوية بيجروا شايلين واحد "أغم عليه - من المضربين عن الطعام" :O
      - الناس كتير اتلمت بعدين أديناهم مية وشربوه
      في ثواني اتحركوا كلهم مع بعض ناحية الحواجز تاني وهو معاهم ماشي
      فجأة لقينا المجموعة عمالة تتنطط، الولد اللي كان لابس أخضر ومغم عليه جري زي الحصان وهجم على واحد من الشرطة العسكرية على طرف الكورودون ضربه وجرى (ظاهر لمحة سريعة لواحد لابس أخضر بيجري)، كنت فتحت الكاميرا، بعيد عن "فوكس" الكاميرا بس جنب المنظر اللي بصوره، طوبة اتحدفت وحسيت بيها وهي طالعة من ورايا
      لما تشوفه الفيديو ده هتلاقوا إني بتحرك ببطئ على المباني وأنا بدور بالكاميرا ببطء من الخضة - ماكنش عارفة مين ده اللي ورايا على طول

      طالع ف الفيديو الراجل (اللي ثبت بعد كدة إنه مخبر أمن من الاستجواب في الميدان) - والناس بتوقفه وهو بيطلع إشاعة ضرب الجيش للمتظاهرين (قال يعني متظاهرين) وف آخر الفيديو لقطة وهو بيجمع طوب تاني



      ورايا اتنين بيتكلموا عن واحدة اسمها "مريم" وعلى حسب كلامهم "دخلت ومعاها مجموعة توصل المطالب ومعاها كفنها وف آخر طلبها تهديد بـ(الانتحار) في حال عدم تنفيذ المطالب" وناس بتصرخ بصوت عالي " أخدوهم جوا .. أخدوهم"،  بعدها: "طلعوا" "لا ماطلعوش"
      شوية من اللي عند الحواجز هم كمان جمعوا طوب واشتغلوا - بعدها جرى كام واحد سحبوا الحواجز اللي عند المنطقة الشمالية وقفلوا مداخل الشوارع ويصرخوا "محدش يدخوووول" ويخبطوا على كابوت العربية اللي تحاول تدخل حتى واحد قال "أنا رايح مستشفى مصطفى كامل من هنا، ألف ليه طيب"
      واحد من اللي بيقفلوا المداخل صورته كان في خناقة مفتعلة يوم الأربع اللي فات وطلع مشرط من بقه ومنعت اللجان الشعبية تصوير الواقعة أو حتى تصوير صورة ثابته ليه.
      على فكرة في اتنين معاقين ذهنيا مأجورين بيستعملوهم عشان الهجوم على العربيات (حصل قبل كدة) وحد أكد لي إنه حصل تاني بعد ما مشيت من واحد منهم، واتقبض عليه واتعذب جوا المنطقة الشمالية اسمه "محمد الغلبان" والتاني ظاهر بالقفطان البني ف الفيديو ده

      كان في عدد قليل على جنب ف حالهم بيعملوا جرافيتي
      جروب تويتر (أقل من عشرة كنا) هنعمل إيه ياجماعة؟ هنمشي - قرب ما وصلنا الترام مجموعة قالوا هيشربوا حاجة ويرجعوا يشوفوا آخرتها خصوصا وإحنا على آخر الشارع شايفين الموضوع بقة كارثي -
      أنا وبنتين قلنا هنرجع الاعتصام - أنا راجعة صحيح قلقانة بس ضميري مرتاح - لأني ما سبتش ثوار في مشكلة أنا عارفة أوي دول مين.
      بعد شوية من وصولنا الاعتصام- من تواصل المجموعة الصغيرة اللي فضلت (5 أو 6) طلبوا مدد وقالوا الوضع كارثة - وكان حسب  الفيديوهات عمال ف المحلات خرجوا يدافعوا عن محلاتهم معاهم شوم بدقن ومن غير دقن ... ناس بتدافع عن لقمة عيشها- غير العدد كبير من المأجورين اللي كانوا موجودين أصلا عند حواجز بوابة المنطقة الشمالية



      يظهر صاحب الاغماء الفاكس (تي شيرت أخضر) ف الدقيقة 6:20 زي الحصان يحدف طوب على عمال المحلات (في معاهم مأجورين، هما دايما بيندسوا ف الطرفين)

      وعلى تويتر كان نور الزوربا وده واحد من اللجان الشعبية والمعتصمين بيتويت ويقول هنقابل "المشير" !!! (وطلع إنه من اللي دخلوا جوا)
      صحيح العسكر "بعتوهم"

      تكمل لكم "إيف" هنا  التفاصيل من اول ما نزلت وبعدين عملت كذا تحديث بتجميع الشهادات منها تويتات "منسي" اللي كان ساب الاعتصام وراح المنطقة الشمالية - لما اتصلوا بينا طالبين الدعم، وكانت الشرطة العسكرية إدخلت بعنف، وكان اللي كانوا بيعملوا الجرافيتي وغيرهم دخلوا ف قلب المعركة

      النهاردة 24 يوليو:
      وأنا لسة محروق دمي خصوصا بعد تكرار المشهد على أعنف ف القاهرة، عندي شوية أسئلة:
      الولد اللي كان في بقه مشرط في الميدان اتمنعت من اللجان الشعبية إني أصوره فيديو أو حتى صورة ثابتة لوشه - ونور أكد إن ماينفعش نصور عشان محدش يقول بيحصل مشاكل - قلت له أنا عايزة صورة ثابته عشان توثيق - ماردش - وآدي بعدها بيومين شفت الأداء الفريد في البلطجة لـ"مشرط"

      - يعني إيه ممنوع أصور أعمال الشغب بين الموجودين ف الاعتصام؟ وإنت مهم أوي عندك الناس تصور الشرطة العسكرية وهي بتضرب؟
      - يعني إيه حد يدخل المنطقة الشمالية يوصل الطلبات عشان واحد قائد طلب كدة؟ يعني إيه هنسافر القاهرة نقابل المشير؟ هو مش إحنا ألسنا على اللي راحوا قعدوا مع عمرو سليمان؟
      - طيب مش ألسنا على غلطة الإخوان لما قعدوا مع العسكر وقلنا بيكرروا غلطهم؟ ألسنا ع السلفيين لما راحوا لأختي عبير بعد غلطة أختي كاميليا؟ ووقعنا ف نفس الغلط لما رحنا مناطق قيادية ومعانا نفس البلطجية والمشعللتية وهم عددهم كبير بالنسبة لنا، ونسمع واحد دخلت جوا، "خرجت ماخرجتش" "ضربوهم لا دول كويسين"؟
      حق أي حد يألس علينا وحق أعضاء المجلس لما يشوفوا المأجورينهم اللي بيقودوا مظاهرتنا- بغض النظر عن إن مش بيتقبض عليهم- إنهم يقولوا علينا إننا "مش واعيين كفاية" - ده حتى جايز واحد يقول لك "لما سهل اختراقهم كدة أمال إزاي عملوا ثورة"؟

      الصح إنه 
      "لا يلدغ مؤمن من جحر مرتين"
      عندي كلام على شوية وصفات على أد ما بافهم عشان الاعتصام - بس دلوقتي - بالنسبة للمأجورين - تقديري - التعامل معاهم
      1. الحذر : نتعامل معاهم بالحذر مش هنطردهم (هيجي غيرهم ما نعرفهمش)
      2. ياخدوا قرارات؟ لا
      3. يقودوا مسيرة؟ لا
      4. يقعدوا ف وسطنا؟ مش وإحنا بنتكلم كلام مهم - كفاية علينا بيض تويتر
      5. نقسم معاهم الأكل والمية؟ أيوة أكيد (ويارب يفهموا)

      التدوينة الجاية بإذن الله: الميدان اللي على حق ما يقلش للنظام لأ

      13 يوليو 2011

      أنا اللي نزل الميدان زمان ... ولسة بانزل عشان مايرجعش اللي كان

      الجو عندي حلو وطرواة... وعندهم غير.. دا في إغماءات بالأمارة
      قاعد ف التكييف ... أحكي ع الثورة كلام سخيف
      أصل قريبي ف الشرطة... وعمره ما دخل ف ورطة
      مالي باللي اتقتل من التعذيب.. لاكان من الأهل ولا حبيب
      البلد خربوها.. مصر وموتها.. دي كانت قبل الثورة ف كل حاجة الأولى
      ف السرطان الأولى، ف الأجور الأولى، ف التعليم الأولى ف الكرامة الأولى
      أنا عارف كمان إن اللي نزل زمان مش هو دلوقتي اللي في الميدان
      أصلا أنا قاعد ع الكنبة.. أحكم وأفسر وأطلع بكلام ولا أغبى
      اللي نزل زمان قال عيش... وأكل جاتوه بدل العيش
      اللي نزل زمان قال حرية... والسجن الحربي بقى يكفي من الحباييب مية
      اللي نزل زمان قال عدالة اجتماعية...شايف إنه معاه ده لسة مابعش الجلابية
      يامصري ياللي دمك دمي.. ياللي همك همي.. عرفتني أوي عشان تتهمني
      أنا باشتغل مش عاطل...بس مفيش أي خير حاصل...ليه يعني ما اقفش للباطل
      باشتغل بقالي كتير..لحد ما بقيت أسير..متمرط إن شا الله على برة أطير
      أنا وإنت في الساقية مربوطين... زي اللي قبلنا وكانت عيشتهم طين
      الميدان مانزلتش.. إشاعة عليا مادفعتش.. دعوة طيبة منك ماسمعتش
      أنا اللي نزل الميدان زمان ... ولسة بانزل عشان مايرجعش اللي كان
      اللي كان ده اغتصب... اللي كان ده كذب...اللي كان ده نهب الأرض والدهب
      مش لازم تنزل الميدان.. بس بلاش بكلامك تضرب ف المليان
      مش لازم عني تدافع.. أنا نازل فاتح صدري للمدافع
      بس أنا ابن بلدك... وتاني همي همك وحالف أجيب حقي وحقك

      29 مايو 2011

      اللواء العيسوي: اصمت فأنت لا تقول خير

      للمرة الألف اللواء العيسوي مصر على براءة الضباط من دم المقتولين قدام الأقسام في حديثه مع منى الشاذلي ومن قبله بغبغنات ائتلاف الشرطة (دماغهم طلعت غريبة هم كمان)
      صحيح بطل يقول "مش شهيد" بس بيقول بدلها " ده بلطجي"

      يوم 28 يناير 2011 - بعد صلاة الجمعة
      طريق الحرية - الاسكندرية

      مرور المسيرة أمام قسم سيدي جابر - عملت مجموعة من المتظاهرين حيطة قدام القسم عشان فعلا كان في مجموعة نفسها تنتقم من ضباط القسم "سيئ السمعة" ومرت المسيرة بسلام ووصلت عند قسم باب شرق

      ضابط مش عارفين اسمه طلع من مسدسه رصاصتين قتلت اتنين لمجرد مرور المسيرة قدام القسم
      الناس هاجت والمارين بالآلاف قدام القسم، كانوا هيضربوا عسكري أمن المركزي، واحد جرى عليه وحضنه وقال "اللي عايز يضربوا يضربني أنا الأول" وبعدين مجموعة حوطتته وهربوا العسكري من ورا. بالنسبة للي قتل الاتنين وهو جوا القسم، أنهي الأسرع:
      - إن كل الناس تطلع تجري ف كل الاتجاهات بعيد عن ضرب النار؟
      -  إن واحد يطلع يجيب اللي بيضربوا رصاص من فوق سطوح القسم ويشيل منهم السلاح عشان يوقف حمام الدم؟

      ملحوظة: الضابط ده مش من ضمن المقبوض عليهم ولا بيتحقق معاه
      ملحوظة (تانية): أول شهيد على إيد وائل الكومي - عسكري أمن مركزي رفض يضرب النار على المتظاهرين (حسب حكاية اللي كانوا هناك)

      رد ياسيادة اللوا وقل خيرا أو اصمت
      صورة من أمام قسم باب شرق - الاسكندرية (غير مؤكد)
      تحديث:
       (يقال هنا إن اسمه حسن محمد وأنه على قيد الحياة أصيب برصاص حى 9 ملى الرصاصة دخلت من تحت العين واستقرت اسفل الرقبة ادت الى نزيف على الشبكية وازدواجية فى الرؤية وعمل عملية وطلعها يوم 19/2 ولكن لايزال هناك كسر تحت العين وتهتك فى الاعصاب وفقد تام فى السمع فى الاذن اليمنى)


      الشهيد حبيب الله

      مجايب مبارك

      مرتضى منصور - طلعت السادات - صبحي صالح- توفيق عكاشة - إسماعيل عتمان- ممدوح شاهين نجووووووووووووم، إيوة الله نجوم، لو ماكنوش هم يطلوا علينا مين يطل؟

      اللوا ممدوح شاهين يوم الجمعة ف مداخلة يوم جمعة الغضب التانية، أيوة عارفين قال "مش حاشدة"

      قال كلمة تانية جامدة، الراجل مهتم ياناس، ده بيقول إحنا ما جبناش "إبراهيم دوريش" في لجنة التعديلات الدستورية عشان محدش يقول إن إحنا جبنا حد كان ف اللجنة اللي الرئيس السابقة شكلها

      شايفين قلبه على شعورنا إزاي؟ ( آخر دقيقتين من الفيديو)


      ما تيجي نقول مين كمان كان ف التشكيل الوزاري ومين ف تشكيل المحافظين ومين ف المحليات اللي اختارهم مبارك؟ 

      منهم الراجل الكاريزما ده اللي عاش عمره ينضف مصر ويبعت على برة.

      والناس اللي زي الورد دول، وبعدين يعني؟ إحنا فرحانين بتأويرة الشمس كل يوم، مجايب مبارك مجايب جيمي، شيلوهم بقة!




      لقد ورمنا... ورمنا أيها المجلس

      24 مايو 2011

      رسالة إلى قبيلة بني سويلم

      حدث في أوائل صيف 2010 - أمريكا
      "إيه رأيك في مبارك؟"
      السؤال اللي "دانا" غيرت بيه الموضوع اللي كنا بنتكلم فيه وهو تقنيات التعليم اللي اتعرضت في المؤتمر في اليوم الأخير قبل الاستراحة
      بعد تفكير وتردد في الإجابة بسبب استغراب السؤال قلت: " سمعت إن مجلة عملت تصويت على أكثر شعب مش بيحب رئيسه، والنتيجة إن مصر تصدرت التصويت، إدينا متقدمين في حاجة"
      "دانا" ضحكت ضحكة خبيثة من بتوع الأفلام (السكة اتفتحت لها) وقالت هو مش ديموقراطي ومش...
      قبل ما تكمل، قلت لها "بس هو مش بيصحى كل يوم الصبح يطلب من الشعب إنه يقعد يلعب على الكمبيوتر وقت الشغل ولو حد يروح يخلص حاجة في مصلحة يتعامل كأنه بيقاطع حاجة مهمة"
      استغربت "دانا" شوية وحاولت تفسر "بس ده بسبب عبد الناصر اللي عمل قانون إن أي حد جامعي يقدم في وظيفة حكومية لازم يتقبل فده بيعمل تكدس وبيكونوا فاضيين"
      أنا (في سري) "إخص هو عمل كدة؟" - بعدين رديت " بس مش مجبرين يلعبوا كوتشينة ع الكمبيوتر ممكن يتعلموا لغة جديدة من لغات الدول اللي بينا وبينها تعاملات اقتصادية وعلاقات استراتيجية أو دول لسة ماتعاملناش معاه، أو يتعلموا مهارات جديدة في الوقت الفاضي"
      "دانا" بصت باستغراب شوية وسكتت، ما فهمتش قصدي إن "إن الله لا يغير ما بقوم حتى يغيروا ما بأنفسهم"
      رجعت تكمل "أصل مبارك مش عارف يمسك العصايا من النص، يعني ممكن يعمل "شوية" ديموقراطية وفي نفس الوقت يحافظ على علاقاتها الخارجية، إحنا عايزين حليف قوي"
      "إحنا؟ " كدة اتخنقت أنا بقة وقلبت، راحت حولت " وإيه رأيك في الأخوان؟" 
      أنا (في سري) "يايوم مش فايت حد يشيلني من هنا" - ورديت "هم مجموعة منظمة، متلزمة دينيا ومعتدلة نسبيا، أفضل من مجموعات تانية ماشية مكشرة وبتكفر الناس"
      "دانا" تنحت باين ماذكرتش كورس الناس التانية وبعدين ردت عليا "أصلهم قعدوا معانا وفهمونا إنهم معتدلين وقالوا لنا إن إحنا فاهمين غلط كلام القائد بتاعهم "اللي دخل السجن" اللي كاتب المنهج بتاعهم ، وقالوا لنا إحنا مش إرهابيين وإنتوا وصلتكم صورة غلط عننا، وإحنا اقتنعنا وشايفين إن ليهم حق يشاركوا في الحياة السياسية بس مبارك مش عارف يعمل ديموقراطية"
      أنا (في سري) "إحنا واقتنعنا؟ إنتوا مين ياولاد اللذين؟ شوية وهتقولي "بيدينا الأمر"
      الحمد لله الاستراحة خلصت، نجدة من الله، كان على طرف بقها سؤال كمان، ما عرفتوش بس وإحنا مروحين المصرية التانية اللي كانت في المؤتمر قالت لي إنها "اتجرجرت" في الأسئلة وكان آخر سؤال عن رأيها في "جيمي"
      ----------------------------------------------
      بعد ما قامت ثورة 25 يناير - واحدة صاحبتي كانت مصرة إن أمريكا زعلانة على مبارك ولو تطول تشربه إكسير الحياة
      وأنا كنت مصرة إنها مش زعلانة لأنها عارفة إن مفيش إكسير الحياة
      خلاص أمريكا بتفقد مبارك لكبر سنه ومش عايزة جمال لأسباب كتير، اللي يضايق أمريكا طريقة خلع مبارك إنها تمت من غير اللي "بيديه الأمر" على حسب ما هم فاكرين نفسهم
      مين كمان قال لنا "إحنا قامونا التوريث؟" أعضاء من المجلس
      نراجع كدة
      يوم 25 يناير كان متظاهرين -حتى لو مش كلهم -عايزين خلع مبارك بعدها بشوية انضم للمطلب ده كل من المجلس العسكري والبنتاجون الأمريكي، كل واحد منهم ليه أسبابه
      فعقبال ما وصلنا ليوم 11 فبراير مرورا بالتصريحات المستفزة لأوباما والطقم بتاعه "Now is Now" (دلوقتي حالا)، اللي بتطالب مبارك بالرحيل لحد ما أعلن المجلس إنه في "انعقاد مستمر" وبدء صدور البيان الأول والتاني والثالث، وصلنا لتصادف توافق الرأي على خلع مبارك مابين الثوار والحكومة الأمريكية والمجلس العسكري.
      يوم 12 فبراير نروح بيتنا؟
      إحنا قلنا إيه؟ "الشعب يريد إسقاط النظام" وقلنا "عيش.. حرية.. كرامة إنسانية"
      بعد 11 فبراير لحد النهاردة مستمرين في الطلب ده، هل الحكومة الأمريكية متفقة تماما معانا؟
      لما المجلس في البيان أكد إنحيازه للمطالب "المشروعة" كان يقصد إن في مطالب هتكون "غير مشروعة" ولا إضافة الصفة للموصوف كان بغرض التأكيد؟
      . طيب هل في مطالب "مشروعة" بس بتعارض مصلحة أمريكا؟ لو المجلس بدأ ينفذها هيترد عليه بخطاب "شديد اللهجة" من الحكومة الأمريكية وخصوصا إنها مسكانا بالمعونة وأكيد في اللي أكثر من المعونة "أمريكا والمخابرات بتاعتها"
      . طيب المجلس العسكري لما يتجاهل مطالب من مطالبنا هل 
      - عشان هو مش ناوي على الإصلاح؟
      - عشان هو مقدم مصلحة أمريكا؟
      - عشان هو شايف إن عدم معاداة أمريكا ده حماية لمصر؟
      . طيب هل المليونيات ديه بتساعد المجلس العسكري إنه يتحجج قدام أمريكا إنه مضطر ينفذ مطالبنا وهو فرحان من جواه عشان عارف إن المطالب ديه "من أجل مصر أحسن"؟ ولا هيجيله إرشادات من أمريكا بتنويم الناس والتضحية بالبعض كبش فداء زي ما إحنا حاسين خصوصا مع التراخي الشديد؟

      كتير من الأسئلة ماعنديش إجابة عليها بس عايزة أكتب اللي أنا متأكدة منه في الرسالة لقبيلة بني سويلم اللي شايفين إن ثورتنا الحرة تنفيذ مخطط أمريكي.

      إلى قبيلة بني سويلم
      1. مطلب خلع مبارك صادف مصلحة أمريكية في التخلص من جيمي، فحصل في لحظة ما توافق بين مصلحة البنتاجون والثوار،
      2. أكيد إن حريتنا والديموقراطية الحقيقية والشفافية الكاملة والتطهير وإصلاح مصر، مش من مصلحة إسرائيل ولا البنتاجون الأمريكي بأي حال ولو أمريكا قالت هساعدكم تعملوا ديموقراطية يبقى ناوية تصدر لنا  "قناع الديموقراطية" بتاع "إمسك العصاية من النص"
      أمريكا حالها يبكي والله شعبها صعبان عليا وأحوالهم الاقتصادية ف النازل وكذب حكومتهم عليهم بيزيد يوم بعد يوم وبقيت أكبر مديون في العالم ومع ذلك تقريبا في كل ثورة عشان الحرية بيتحرق العلم الأمريكي وتتردد هتافات ضد الحكومة الأمريكية.
      - يابني سويلم جايز تتلخبطوا بسبب تصادف التوافق في النقطة 1 إنما تتهمونا وإنتوا واثقين؟ إزاي؟
      لو إحنا تبع المخطط الأمريكي كنا رجعنا لحياتنا من أول ما خلصنا النقطة رقم 1
      إنما عشان ده مش حقيقي فإحنا ناويين "نخرب" زي ما بتقول يابني سويلم إحنا هنخرب أي تدخل سافر في مصلحة مصر، إحنا هنخرب على "أوباما" أي محاولة لكسب الشعب المصري في صفه ويضحك عليه بفلوس هو عارف إنها أصلا فلوس مصر.
      يابني سويلم اللي يثبت انحياز المجلس العسكري لمطالب الثورة المشروعة مش إنه يسقف لنا على رقم 1 ويحيينا تحية "إعزاز"، انحياز المجلس العسكري للمطالب هو:
      - إنه مايفضلش واقف عند النقطة 1 زي الحكومة الأمريكية
      - إنه يمنع استيراد أي قناع للديموقراطية من أمريكا أو غيرها
      - إنه ينقل على النقطة 2 ويكمل فيها ويزود عليها كمان 

      رايحين على مصر النقطة 2، معانا؟
      نازلين يوم 27 مايو