اشتعال جمعة الحسم- المنطقة الشمالية - الاسكندرية

النهاردة الخميس: 21 يوليو:

في اعتصام سعد زغلول اسكندرية ، بعد الفطار الجماعي مع أهل الشهدا - اللي اتعمل عشان نحاول نلم الشمل بعد ما المية اللي اترشت ف الجنينة خلت جميع الخيام تنقل ما عدا خيم أهالي الشهد ف نص لوحدها - كنا بنسأل هنروح فين بكرة؟ أهالي شهدا زهقانين من قعدة الجنينة ومتضايقين من تعامل المارة مع الميدان على إنه مزار.

طلبوا مسيرة للمحكمة حتى لو قفلة يوم الجمعة بس هي رمز للمكان اللي هيجيب حق الشهدا م اللي قتل.

وبعدين مجموعة مننا واقفين نتفق واحد جه قال لنا لا ده ف اجماع على المنطقة الشمالية اعتقد إن "ماهي" تعرفه فقالت له "أوك، مفيش مشكلة" وهو فعلا مفيش مشكلة.

إلا إن شوية مننا كان قلقان

النهاردة الجمعة: 22 يوليو: 

مفترض انطلاق المسيرة بعد صلاة الجمعة من مسجد القائد إبراهيم للمنطقة الشمالية

أنا مارحتش م الأول عشان كان عندي "عجلة إنتاج" :S - إيوة حتى يوم الجمعة- بس المسيرة عدت من تحت البيت طلعت صورتها م الشباك وشفت خليط من "اللي متعلم عليهم" على نشطاء ومتظاهرين حقيقين (كالعادة يعني)

وقفت عجلة الانتاج - وجهزت المعدات ونزلت بعد ساعة من مرور المسيرة -ووصلت المنطقة الشمالية

لقيت عدد صغير جدا  من المجموعة اللي اعرفها وناس ما أعرفهاش قاعدين على أركان الشارع يمين وشمال، والمجموعة الأكبر عند حواجز بوابة المنطقة الشمالية وأغلبيتهم فعلا "متعلم" عليهم- اتصلت بـ"ماهي" أعرف هما فين - جه اتنين "متعلم عليهم" يشخطوا ف الناس يقولوا " إنتوا قاعدين هنا ليه؟" "كله ع البوابة" ياأستاذ، وإنتي ياللي بتتكلمي ف التليفووووون" " المحترم يروح يقف عند البوابة، والمش محترم يمشي من هنا"

قلت أعدي الشارع عند بوابة المنطقة الشمالية أشوف وأراقب اللي هيحصل بعد التجميعة ديه. 

رحت لقيت مجموعة "تويبس" صغيرة جدا، آه "ماهي" قالت لي أنهم رجعوا ميدان الاعتصام عشان جالهم أخبار إن عدد اللي بيحموا الخيم ضعيف جدا والاعتصام ف خطر- أول ما عديت ناحية حواجز البوابة كانت التويت بتاعتي "الفلول كتير"- كانوا كتير اوي 

شفت حتى واحد معاق ذهنيا - من مرات فاتت أعرف إن أرزقية بيستعملوه للهجوم على العربيات والخبط على إزازها.

شباب التويتر كانوا قعدين يهزروا مع اتنين من الشرطة العسكرية - بس هم مركزين عينهم بعيد وبيحاولوا مايضحكوش بعدين واحد منهم بيدخن قالوا طيب سيجارة، رد واحد منهم قال أنا مش باشرب يعني هو في ناس ممكن تشرب سجاير ف الجيش بس أنا مش باشرب، وبعدين كرر الكلام مرتين، زي ما واحد يحكي حاجة "بطولية" ومايلقيش مدح كفاية يقوم يعيدها تاني طيب نعمل إيه؟ طلعت له إزازة مية- قال لا شكرا مش عطشان وهم واقفين سايحين بعد شوية لقيت خط بتوع الشرطة العسكرية واحد ماسك إزازة فيها كركديه يشرب "بق" بسرعة ويسلمها للي جنبه وهو مش بيبص له وهو يشرب ويسلمها للي بعده - حتى الشرب عسكري واحد من التويبس: "دم الشهدا ده - الأحمر اللي بتشربه ده دم الشهدا" ضحكوا أخيرا :)

بعدين قعدوا يغنوا شوية 

بعدين كان في قناة (جزيرة أو تحرير) حقيقي مش فاكرة - التويبس"إيه ده العيال بتوع الثانوية العامة رايحين يقولوا إحنا واقفين عشان الحد الأدنى للكليات - لا لا لازم نتحرك نعرفهم الوقفة ليه"

عدوا الشارع تقريبا من الزحمة ما وصلوش للكاميرا أو طنشوا- ما سألتش

بعدها أنا وبنتين عدينا الشارع ووقفنا مكان ما الكاميرا كانت واقفة بعد ما اتفضت الزحمة وقعدنا نبص شوية على المجموعة اللي واقفة عند الحواجز ومش عارفين نرجع ميدان الاعتصام ولا نفضل- خرج من المجموعة اللي عند الحواجز شوية بيجروا شايلين واحد "أغم عليه - من المضربين عن الطعام" :O

- الناس كتير اتلمت بعدين أديناهم مية وشربوه

في ثواني اتحركوا كلهم مع بعض ناحية الحواجز تاني وهو معاهم ماشي

فجأة لقينا المجموعة عمالة تتنطط، الولد اللي كان لابس أخضر ومغم عليه جري زي الحصان وهجم على واحد من الشرطة العسكرية على طرف الكورودون ضربه وجرى (ظاهر لمحة سريعة لواحد لابس أخضر بيجري)، كنت فتحت الكاميرا، بعيد عن "فوكس" الكاميرا بس جنب المنظر اللي بصوره، طوبة اتحدفت وحسيت بيها وهي طالعة من ورايا

لما تشوفه الفيديو ده هتلاقوا إني بتحرك ببطئ على المباني وأنا بدور بالكاميرا ببطء من الخضة - ماكنش عارفة مين ده اللي ورايا على طول

طالع ف الفيديو الراجل (اللي ثبت بعد كدة إنه مخبر أمن من الاستجواب في الميدان) - والناس بتوقفه وهو بيطلع إشاعة ضرب الجيش للمتظاهرين (قال يعني متظاهرين) وف آخر الفيديو لقطة وهو بيجمع طوب تاني

ورايا اتنين بيتكلموا عن واحدة اسمها "مريم" وعلى حسب كلامهم "دخلت ومعاها مجموعة توصل المطالب ومعاها كفنها وف آخر طلبها تهديد بـ(الانتحار) في حال عدم تنفيذ المطالب" وناس بتصرخ بصوت عالي " أخدوهم جوا .. أخدوهم"،  بعدها: "طلعوا" "لا ماطلعوش"

شوية من اللي عند الحواجز هم كمان جمعوا طوب واشتغلوا - بعدها جرى كام واحد سحبوا الحواجز اللي عند المنطقة الشمالية وقفلوا مداخل الشوارع ويصرخوا "محدش يدخوووول" ويخبطوا على كابوت العربية اللي تحاول تدخل حتى واحد قال "أنا رايح مستشفى مصطفى كامل من هنا، ألف ليه طيب"

واحد من اللي بيقفلوا المداخل صورته كان في خناقة مفتعلة يوم الأربع اللي فات وطلع مشرط من بقه ومنعت اللجان الشعبية تصوير الواقعة أو حتى تصوير صورة ثابته ليه.
على فكرة في اتنين معاقين ذهنيا مأجورين بيستعملوهم عشان الهجوم على العربيات (حصل قبل كدة) وحد أكد لي إنه حصل تاني بعد ما مشيت من واحد منهم، واتقبض عليه واتعذب جوا المنطقة الشمالية اسمه "محمد الغلبان" والتاني ظاهر بالقفطان البني ف الفيديو ده

كان في عدد قليل على جنب ف حالهم بيعملوا جرافيتي

جروب تويتر (أقل من عشرة كنا) هنعمل إيه ياجماعة؟ هنمشي - قرب ما وصلنا الترام مجموعة قالوا هيشربوا حاجة ويرجعوا يشوفوا آخرتها خصوصا وإحنا على آخر الشارع شايفين الموضوع بقة كارثي -

أنا وبنتين قلنا هنرجع الاعتصام - أنا راجعة صحيح قلقانة بس ضميري مرتاح - لأني ما سبتش ثوار في مشكلة أنا عارفة أوي دول مين.

بعد شوية من وصولنا الاعتصام- من تواصل المجموعة الصغيرة اللي فضلت (5 أو 6) طلبوا مدد وقالوا الوضع كارثة - وكان حسب  الفيديوهات عمال ف المحلات خرجوا يدافعوا عن محلاتهم معاهم شوم بدقن ومن غير دقن ... ناس بتدافع عن لقمة عيشها- غير العدد كبير من المأجورين اللي كانوا موجودين أصلا عند حواجز بوابة المنطقة الشمالية

يظهر صاحب الاغماء الفاكس (تي شيرت أخضر) ف الدقيقة 6:20 زي الحصان يحدف طوب على عمال المحلات (في معاهم مأجورين، هما دايما بيندسوا ف الطرفين)

وعلى تويتر كان نور الزوربا وده واحد من اللجان الشعبية والمعتصمين بيتويت ويقول هنقابل "المشير" !!! (وطلع إنه من اللي دخلوا جوا)

صحيح العسكر "بعتوهم"

تكمل لكم "إيف" هنا  التفاصيل من اول ما نزلت وبعدين عملت كذا تحديث بتجميع الشهادات منها تويتات "منسي" اللي كان ساب الاعتصام وراح المنطقة الشمالية - لما اتصلوا بينا طالبين الدعم، وكانت الشرطة العسكرية إدخلت بعنف، وكان اللي كانوا بيعملوا الجرافيتي وغيرهم دخلوا ف قلب المعركة

النهاردة 24 يوليو:
وأنا لسة محروق دمي خصوصا بعد تكرار المشهد على أعنف ف القاهرة، عندي شوية أسئلة:
الولد اللي كان في بقه مشرط في الميدان اتمنعت من اللجان الشعبية إني أصوره فيديو أو حتى صورة ثابتة لوشه - ونور أكد إن ماينفعش نصور عشان محدش يقول بيحصل مشاكل - قلت له أنا عايزة صورة ثابته عشان توثيق - ماردش - وآدي بعدها بيومين شفت الأداء الفريد في البلطجة لـ"مشرط"

- يعني إيه ممنوع أصور أعمال الشغب بين الموجودين ف الاعتصام؟ وإنت مهم أوي عندك الناس تصور الشرطة العسكرية وهي بتضرب؟

- يعني إيه حد يدخل المنطقة الشمالية يوصل الطلبات عشان واحد قائد طلب كدة؟ يعني إيه هنسافر القاهرة نقابل المشير؟ هو مش إحنا ألسنا على اللي راحوا قعدوا مع عمرو سليمان؟

- طيب مش ألسنا على غلطة الإخوان لما قعدوا مع العسكر وقلنا بيكرروا غلطهم؟ ألسنا ع السلفيين لما راحوا لأختي عبير بعد غلطة أختي كاميليا؟ ووقعنا ف نفس الغلط لما رحنا مناطق قيادية ومعانا نفس البلطجية والمشعللتية وهم عددهم كبير بالنسبة لنا، ونسمع واحد دخلت جوا، "خرجت ماخرجتش" "ضربوهم لا دول كويسين"؟
حق أي حد يألس علينا وحق أعضاء المجلس لما يشوفوا المأجورينهم اللي بيقودوا مظاهرتنا- بغض النظر عن إن مش بيتقبض عليهم- إنهم يقولوا علينا إننا "مش واعيين كفاية" - ده حتى جايز واحد يقول لك "لما سهل اختراقهم كدة أمال إزاي عملوا ثورة"؟

الصح إنه 

"لا يلدغ مؤمن من جحر مرتين"

عندي كلام على شوية وصفات على أد ما بافهم عشان الاعتصام - بس دلوقتي - بالنسبة للمأجورين - تقديري - التعامل معاهم
1. الحذر : نتعامل معاهم بالحذر مش هنطردهم (هيجي غيرهم ما نعرفهمش)
2. ياخدوا قرارات؟ لا
3. يقودوا مسيرة؟ لا
4. يقعدوا ف وسطنا؟ مش وإحنا بنتكلم كلام مهم - كفاية علينا بيض تويتر
5. نقسم معاهم الأكل والمية؟ أيوة أكيد (ويارب يفهموا)

التدوينة الجاية بإذن الله: الميدان اللي على حق ما يقلش للنظام لأ