عووووووو ... عووووو خايف؟ مرعوب؟
آآآه الجيش... انقسامات... المجلس... الثقة.. هيروح فين؟
مجلس؟ مجلس إيه؟ مجلس مين؟
ده اسمه إلتفاف على مطالب الشعب وعدم احترام الأغلبية
1. احترام الأغلبية: ياللي بتحترم الأغلبية لو كانوا عملوا استفتاء شعبي تروح بيتكم قبل تنحي مبارك، كنت هتسمع إنت موزيكا :الأغلبية"
2. مطالب الشعب: اللي هي؟ نعم للتعديلات .. تقصد نعم للمجلس العسكري؟ لا الاستفتاء مالوش دعوة بالمجلس (إممم ده مش رأي اللوا شاهين) لا اللي هي 8 مواد وحطلك عليها 56 مادة طيب مش كان قايلك الدستور بعد الرئاسية دلوقتي قال بعد البرلمانية.. فكك فكك
هو المجلس عمل إيه بسلامته؟
بعزق 200 مليون جنيه ف استفتا ملوش لازمة
شغال في قسم الكهربا: العيال اتهرت إلكتريك
وشغال في العجن: نازل لغوصة في القوانين
وإيه آه فكرتني ديه مهمة، طبعا اختيارته في الوزرا والمحافظين زفت
غير إنهم كذبوا أكتر من مرة الوحيد اللي ما طلعش كدب لحد دلوقتي وبيفضل يسكت لما السؤال يضطر الواحد يكذب هو "العصار" بس طالما قاعد ف وسطهم ممكن نابه جانب منهم يعني.
فكنا بقة من الجرايد اللقيطة بتاعت الجيش كان مجهز لثورة في أجازة الصيف وإحنا فاجئنا باختيار أجازة نص السنة وكلام سوزي بتكره طنطاوي وعمر سليمان، يعني مش شرط إنهم مختلفين يبقى اتخانقوا في فلوس واحد بيسرق والتاني وقفه عند حده
ولا وقفه ولا حاجة ولا القوات المسلحة بروا بقسمهم بحماية الدستور، الدستور مش بيقول برضه اللي يسرق يتحاسب، كانوا بيحموا الدستور إزاي والبلد اتنهبت بالمنظر ده؟ ولا دي مش نازلة ف المقرر؟
أما خناقة سوزي وجمال مع طنطاوي وسليمان سببها إن أمريكا عارفة إن الواد جمال مش فتك، هو عقله على أده، وعايزين واحد قوي حتى عينهم على سليمان شوية وعلى عنان شوية، قال البنتاجون بيحب عنان قال، حبهم برص.
يعني المجلس سقفه هو منع التوريث إنما مصر والوطن ديه يعني من كلامهم والسب والتصريحات المنيلة تحس إنهم بعيد عن المطالب، هم مش بياكلوا منها؟ قصدي أرض مصر، كلام مش في سرك، فوق 70% من المعونة الأمريكية رايح للقوات المسلحة.
بمناسبة بقة استخدام كلام الشيخ الشعراوي (الله يرحمه)، هو كمان قال: "اللي بياكل من فاسه، رأيه من راسه" تفهم من كدة إيه إن طول ما المجلس أكله مش من فاسه ومعتمد على المعونة الأمريكية ماتضمنش موضوع رأيه من رأسه، غير إن ناس زي عتمان وشاهين والملا أثبتوا إن راسهم مش ولابد.
قال إيه ياخويا أمريكا والسعودية تدينا معونة ... دي فلوسنا اللي حاطتها مبارك الحرامي عندكم
افتكر بقة ياعم المجلس إن اللي متغطي بأمريكا عريان وأديك شفت نتنياهو برق لأوباما غير رأيه علطول.
ماهو أنا مش طايق المجلس وعايزه يغور
كلام جميل بس يغور ديه بعد 6 شهور
عد بقة في الفترة ديه كمان كام واحد هيتكهرب؟ كام واحد هينزل على ركبه؟ كام واحد هياخد 5 سنين زي عمرو البحيري؟ وكام واحد هيحصل له زي اللي حصل لـ
محمد سعيد؟ ولا أنت شغال بمنطقNIMBY-Not In My BackYard، يعني طالما مجاش جنبي يبقى خلاص.. تؤ تؤ دي مش أخلاق الثورة، ولا إيه؟
مستأمنهم على المرحلة الخطيرة ديه؟
بس أنا مش عايز تأجيل انتخابات
مين قال إنها هتتأجل؟ خليتني أقعد أدور في كل حتة على شرط فترة المجلس الرئاسي، قلت يمكن في قانون ولا حاجة مالقتش، يعني ممكن نقعد المجلس نفس الست الشهور ونمشي بنفس جدول الانتخابات، إحنا؟ أيوة إحنا ... مش إحنا الشعب ولا إيه؟
أصل يعني صعب يكون في إجماع أو اتفاق على أسماء
مين؟ نعم؟ عايز تقول لي إن في إجماع على وجود الجمل ولا حواس ولا عتمان ولا حمدي بدين لا استنى ده العيسوي معلم ولا بتاع المالية سيدي ع التخطيط والشحاتة طويلة الأجل.. إركن إجماع على جنب بقة
طيب نعمل إيه؟
يعني هنجيب تلاتة معقولين ونحدد مهاهم ونطلب منهم جدول زمني
1. التطهير
2. ملف الأمن
3. يخلعوا من ودن عصام شرف ينقي لنا عنقودين وزرا عنب بدل الطقم اللي ما فيه حد عدل غير "العربي" اللي طفشوه ، بس برضه عينهم على شرف لأن شكله بينخع بسرعة
أحسن ترشيحات هاتكون من القضاة النضاف أو اقترح إنت ناس تانية (أنا أرشح نهى الزيني و(الخضيري/ البسطويسي) وجورج إسحاق)
ويقسموا الشغل مابينهم هتبقى مصر فلة فلة لما الرئيس الجديد يستلمها ويبدأ بقى يشتغل على نضافة.
الجيش بقة بالمجلس بالشرطة العسكرية بيتك بيتك وهنقضيها لجان شعبية لحد ما المجلس المدني ينضف البلد من الداخلية البلطجية والأرزقية بتوع الوطني اللي المجلس طالقهم علينا ف الشوارع..كلها إسبوعين والامتحانات تخلص وهيبقى عندنا متطوعين كتير.
وإحنا نيتنا سليمة يامجلس الهنا، بكرة نكفيك ونغرقك ومانخليك تمد إيدك تاني.
بس دلوقتي مش عارفين نحس إن في تغيير ونشرب مية نضيفة وشافيين مواسير البيبي سارحة على مية الشرب
المجلس المدني هو الحل
ولكن "ما لا يدرك كله لا يترك كله"
