27 مايو 2012

شير م الشارع (2.1): الصندوق الأسود للانتخابات

اعتذر عن طول التدوينة، هي ليست مقالة صحفية في جريدة لكي ألتزم بعدد 2500 كلمة، هي توثيق شهادات لفترة مهمة، هي الصندوق الإسود للانتخابات الرئاسية في المرحلة الأولى، قسمت التدوينة قدر الإمكان إلى أجزاء كي يستطيع القارئ، قرائتها على مراحل كما يريد

مفاجآت وصدمات  في نتيجة الانتخابات، الموضوع أسهل بالنسبة للي اشتغل في الشارع إنه يكون فاهم اللي حصل ولو جزئيًا، بخاصة اللي كان مشارك في حملة مرشح وهو في نفس الوقت بيشارك في المظاهرات ومعارك الشارع، ذلك لوجود تشابه كبير جدًا في السيناريو

النتيجة عندي شايفاها كدة، عن طريق القوى:

1. تنظيم الإخوان بالأساس == مرسي
2. العسكر+ الحزب الوطني + أمن الدولة والداخلية == شفيق
3. إعلام موجه + الشئون المعنوية العسكرية == حمدين
4.إحنا الممثلين بشكل كبير لميدان التحرير [ + عدد غير قليل من الدعوة السلفية]== أبو الفتوح
5. كبار التجار + أصحاب مصالح + كنب == موسى
6. إحنا تاني بس على صغير أوي== خالد علي أو مقاطع لموقف سياسي
7. مش عارفة تقريبًا [رومانسية + عناد] == العوا
8.  مش عارفة تقريبًا[رومانسية + عناد]  == باقي المرشحين
9. نصف أهل البلد (لأسباب مختلفة) == ما نزلوش الانتخابات [من غير موقف سياسي]

عارفة نقطة رقم 3 هتخنق الناس، بس خليك لآخر البوست، هاشهد باللي شفته، وعارفة كويس إن في داعمين لـ(حمدين) من أول يوم أو انضم ليهم جزء من البرادعوية، ناس صادقة وحسني النوايا، إنما (حمدين) ما كنش هيوصل بشكل طبيعي ويقفز القفزات السريعة دي.

هبدأ من آخر ما قفلت البوست اللي فات (شير م الشارع(1)) اللي كتبته قبل الانتخابات بإسبوع واللي عملت له تحديث أخير قبل يوم الانتخاب بيوم.
كان ضروري موضوع تحديث عشان فترة الإسبوع دي حصل فيها فروق كثيرة جدًا، وهي تصاعد الحديث عن (شفيق) على حساب موسى، وانفجار ماسورة دعاية لـ(حمدين) في شوارع اسكندرية، وحديث الشارع عنه، بعكس الأسبوع السابق للانتخابات تمامًا.

من أول يوم شغل في حملة (أبو الفتوح) وأنا رافضة تمامًا الجمع بين (أبو الفتوح) و(حمدين) في بوستات وصور يتعمل لها شير على (الفيس بوك)، عشان بحسب المعلومات المتاحة ليا، مش شايفة أي تقارب بين الاتنين، وإن كان (أبو الفتوح) بيشكر في (حمدين) في بعض الأوقات. إنما كحملة دعائية، أظن حتى لو (حمدين) كان حقيقي ونضاله أصيل، بحسب أصول الدعاية والتسويق، يعتبر ده خطأ فادح.

- محدش كتير يعرف كواليس قعدة المرشحين، وإن كل أفراد حملة طخنوا دماغ مرشحهم، في موضوع التنازل لآخر "ما تخفش إحنا ماشيين تمام" ولو إن وقتها ما كناش نتوقع تنازل (أبو الفتوح) لـ(حمدين) عشان (أبو الفتوح) كان أسهمه أعلى بمراحل، وكمان حتى لو حصل، مش كل مؤيدي (أبو الفتوح) كانوا هيختاروا (حمدين) بديل وأنا أولهم، عشان برأيي "حمدين عاطل ومعارض سبوبة"
- (حمدين) عمل بطل وقال "لن يحكمنا إخواني ولا إخواني بشرطة"، وأصلًا الحزب بتاعه شارك في مجلس الشعب 2010 متحالف مع الإخوان"، وفي 2005 أخلوا له الدايرة بس النسيان نعمة
وفي مؤيدين بيفسروا إنه ما كنش يا عيني يعرف وقتها إن الإخوان متلونين كدة، طيب الكلام ده مقبول مننا ياللي ملناش في السياسة، إنما ده محسوب ع البلد "سياسي" واتحالف معاهم في أكتر من دورة برلمانية، إيه؟


--------------------------------
هقسم التوثيق بحسب ما رأيت بعيني أو حسب ما سمعت ممن أثق بهم وبشهادتهم فقط إلى نصفين: 
الجزء الأول: خاص بـ(حمدين صباحي) بالأساس و(أحمد شفيق) من حين لآخر
الجزء التاني: خاص بحملة (أبو الفتوح) وتسكين الجزء الأول داخل الأحداث في الجزء الثاني لرسم صورة شبه كاملة، دون الإدعاء بأن عندي الصورة مكتملة، لكن أدعي أن عندي قطع كثيرة من البازل، وبعون الله هنكملها في الفترة الجاية، وممكن أدعي أن المفقود من قطع البازل زي البازل بتاعي ده وأنا صغيرة، ناقص فيه اللي ممكن تتخيله مش قطع أساسية تعجزنا عن تكوين صورة أو تخيل الباقي.

الجزء الأول: حمدين صباحي/أحمد شفيق
. من هو (حمدين صباحي)؟ 
(حمدين صباحي) عاطل في الستين من عمره، خريج كلية إعلام، طلع كارنيه صحافة، وقف للسادات مرة وعارضه واتسجن، إنما في وقت مبارك اتحول زي باقي اللي آخدين السياسة "سبوبة"، معارض ممول، تشهد عليه واقعة ملحق جريدة الكرامة والمسجلة بتدوينة (عمر الهادي) وأخرى لـ(وائل عباس)، كان بيطبل للقذافي وصدام (زي ما نشرنا في التدوينة اللي فاتت) وهو رئيس جريدة تحرير الكرامة الفاشلة، سابقة أعماله إنه نائب سابق بمجلس الشعب. 

هتلاقوا صورة لتدوينة عمر الهادي هنا وباقيها هنا.

نرصد بالتوقيت الزمني ظاهرة (حمدين)

قبل الانتخابات بـ16 يوم:
المناظرة التلفزيونية بين (عمرو موسى) و(أبو الفتوح)
مش هاعمل تقييم شخصي لأداء المرشحين، بس هافصل بين حاجتين: الانترنت والشارع
تردد في الإعلام بقوة إن المرشحان خسروا وإن (أبو الفتوح) ظهر متلون وإن (عمرو موسى) ظهر ضعيف وإن المكسب لـ(حمدين)، وتبعه الانترنت وعدد من مستخدميه.
للأمانة عدد قليل غير من (أبو الفتوح) لـ(مرسي) عشان رأي في (أبو الفتوح) في "حد الردة" و"الاستتابة لآخر العمر" ولعب عليها حملة (مرسي) أونلاين برضه، وكأن (مرسي) هيطبق "حد الردة" بالمفهوم الللي هم عايزينه، قابلونـــي!!!

فبركة خبر انسحاب 200 متطوع من حملة (أبو الفتوح) بعد المناظرة، وثبوت اقتباس قائمة أسماء دفعة كلية (الطيران) بعد كدة.

ننزل الشارع بعد المناظرة، جه لعدد كبير من الناس إحساس إنهم محصورين في الاختيار بين (أبو الفتوح) و(عمرو موسى) وكان ميلهم لـ(أبو الفتوح) وصدمتهم في (موسى) وإزاي إنه طلع "ضعيف كدة"، ده سهل علينا الشغل لأن الناس كانت أخيرًا بتناقشنا في كلام على لسان (أبو الفتوح) وكانوا بيمدحوه في كثير من إجاباته.
فيما عدا اتنين بالعدد، واحد قال "أبو الفتوح جه جامد على موسى وبينه ضعيف، عشان كدة لازم أسند موسى" حنية قلب وكدة، وواحد تاني قال "أبو الفتوح ده فاكر نفسه مين بيتكلم عن محاسبة الجيش وإسرائيل عدو، ليه ناوي يعمل حرب مع (إسرائيل) إحنا مش ناقصين، لا طبعًا هاخد شفيق الراجل اللي يعرف يحترم الجيش"

حمدين لسة ما وصلش الشارع ده كدة ع الانترنت بس...

(حمدين)، (حمدين) Let's start an epidemic... لنبدأ وباءًا

بعد كام يوم انتشر على الانترنت صورة أتوبيس (حمدين) الدعائي، فووووووت فوووووت (حمدين) وصـــل
ما حدًا سأل (حمدين) اللي قال مفيش 700 جنيه في حساب الحملة، جاب منين حق الأتوبيس أبو 750 ألف جنيه، السؤال ده بس كان من نصيب (أبو الفتوح)، لكن لما (حمدين) يجيـبـوا واجب نطبل له.



طيب حد يقول "آه صح (أبو الفتوح) جابه منين؟" في الجزء التاني هنحكي :)

إسبوع قبل الانتخابات:
كان اسم (حمدين) بدأ خلاص يتردد بين طلبة الجامعة وع الانترنت بقوة، لكن في زيارتنا للأماكن الشعبية والعزب والقرى، لا يوجد اسم (حمدين)، هذا قبل إسبوع من الانتخابات.
ومن قبله كانت بوستات البراءة، الجمع بين (حمدين) و(أبو الفتوح)، وبحسب مبادئ الدعاية والتسويق ده فشل تام، ده بفرض إن في تقارب بينهم، إنما زي ما حكيت قبل كدة ف التدوينة السابقة، لو هشهد لحد بعد (أبو الفتوح) فهو (خالد علي)

خمس أيام قبل الانتخابات:
عدد مهول من التاكسيات والميكروباصات، معلقين بوسترين لـ(حمدين) واحد يمين واحد شمال، كله بيردد "(حمدين) لا فلول ولا إخوان"، بانرات حمدين اللي كانت تتشاف كل فين وفين هي وبوستراته، اللي كانت كثافتها هزيلة زي بوسترات (خالد علي)، بقيت زي الرز في كل حتة.
ولا في حملة موازية عدديًا على الأرض تقدر تعلق هذا الكم من في هذا الوقت من الزمن، وده بالحسابات.

المجهود ده حملة أبو الفتوح بكل عددها [ف اسكندرية على الأقل 5 أضعاف حملة حمدين] ماكنتش تقدر عليه ف الفترة دي، ولا حتى حملة (شفيق) [فيما عدا لافتات العمارات الكبيرة] ودي مجهودها لو استخدمت فيها معدات مش محتاج شغل. غير إن بوسترات (حمدين) ما كنتش بتتقطع زي شفيق، لأن العدوى استشرت "حمدين واحد مننا"، غير إنها اتعلقت قبل الانتخابات بكام يوم فما لحقتش تتقطع، ماهو أصلًا في ناس بتحب تقطع أي بوستر من غير وجود عداوة، تسلية.

طلع كلام إن الإخوان بيمولوا (حمدين) عشان يوقع (أبو الفتوح)، وإن (الشاطر) بيشرف على الكلام ده، حسيت إن الكلام ده واسع. لأن (حمدين) ممكن يكون تهديد لمرشحهم نفسه، إلا لو عندهم قوة بقوة المخابرات عشان تحكم الموضوع ده أوي.
ولو إن في واحد "إخواني" بيقول إن (الشاطر) حط مليون جنيه لـ(حمدين) في بنك عودة، إنما لا تأكيد تحت إيدي.

لكن مجهود تعليق البوسترات والبانرات ده كان وهمي، وبياخد وقت طويل، حملة (محمد مرسي) كانت بتنزل الفجر معاها معدات ثقيلة عربية نقل فيها كابية بتطلع بسلم آلي فوق على أي عمود النور، واللي جوا الكابينة يعلق اللوحة أو اليافطة. أما البوسترات على الحيطان كانت بتتعلق عادي من بدري الصبح.

في حملة (أبو الفتوح) كنا شغالين على ارتفاع أقل على حسب السلم اللي بنتسلقه ونستلفه من أقرب مكان أو اللي جبناه في الآخر وكان مقاس 5، وفي أوقات كان واحد يطلع على كتف واحد عشان يطول يعلق بوستر في مكان عالي شوية بعيد عن التقطيع، كل الشقلبظات والأكروبات كنا بنعملها عشان نعوض عدم توافر معدات ثقيلة متواجدة عند مرشحين آخرين.

الحسابات الواقعية والموضوعية للوقت والمجهود ما تنفعش مع حملة (حمدين) الضعيفة في العدد والموارد لكل ده في الـ5 أيام الأخيرة.

يومين الانتخابات:
كانت عدوى الـ(حمدين) وصلت لجيل سنه أكبر، كأن تسمع، "اخترت (حمدين) عشان ابني قال مأكد عليا"، أنقل لكم بعض المشاهد الأخرى من يومين الانتخابات:-
- في اليوم الأول، عند لجنتي، امتلاء الشوارع المؤدية للمدارس اللي فيها لجان، في وسط البلد تحديدًا، بوسترات حمدين، إلى حد وضع البوسترات فوق وش بوسترات (مرسي) العريضة الموجودة في الطرق المؤدية للجان في "رسالة واضحة" لتصدير البديل. وما كنش فيه بوسترات لمرشحين تانيين، عشان أشوف تصرف اللي كان بيعلق صور (حمدين) هايكون إيه معاها؛

- تاني يوم انتخابات في اللجنة اللي كنت مندوبة فيها، وأنا معدية للمدرسة، لازق فيها عمارة، أول دور عبارة عن مكتبة تصوير اللي شغال فيها بيطلع من الشباك، وبيعدي تحت الشباك ده أي حد جاي من شارعين أساسيين عشان يدخل جوا المدرسة، سمعته بيقول "أي حد بيعدي من هنا يجيني، باقول له (حمدين)"
نديت عليه سألته "حضرتك تعرف إن ممنوع دعاية في محيط المدرسة"، زعق وقال "بتتصنتي عليا، مالكيش دعوة ده مكاني وأعمل فيه اللي أنا عايزه، وإيه أخرك وإيه سلطتك عليا" رحت أنا ووكيلة (أبو الفتوح) كلمنا واحد من الشرطة، نقلنا لواحد من الجيش، قال لنا مش ممكن نعمل حاجة طالما مش حاجة عينية مش فلوس ولا هدية ولا منشورات، "بس حضرتك ده توجيه مباشر قبل دخول المدرسة" رد ضابط الجيش"يعني لو كان مرشحك كنتي هتقول لي كدة؟" :/
كان نفسي أرد عليه "مرشحي لسة فاقد صوت حالًا، بسبب كلام الراجل ده مع واحدة واثنائها عن اختيار (أبو الفتوح) والتحويل لـ(حمدين) قبل دخول البوابة"

- في نفس المدرسة، الضابط ده منع مندوبة (مرسي) تركن عربيتها في شارع المدرسة وهي عليها رمز الميزان وبوستر (مرسي)، في حين إن الشارع وقدام المدرسة بالضبط كان في 3 عربيات راكنة عليهم بوستر (حمدين) بالإضافة إلى الفكهاني اللي موجود في زاوية مقابلة لمكتبة التصوير بتاعة الدعاية.
- وحتى لما نبهت مندوبة (مرسي) إن الجيش سايب عربيات ببوستر(حمدين)، راحت تراجعه، قال لها "دول مش قدام بوابة المدرسة بالضبط"، قالت له "أنا ما كنتش راكنة عربيتي قدام الباب بالضبط كنت راكنة آخر الرصيف" قال لها "لا لا تعتبر قريبة"، قالت "لا دي أبعد من عربيات حمدين" قال لها "لا مش فاكر اللي إنتي بتقوليه"

ال3 مشاهد دول من قدام لجنتي، اتسجلوا في دماغي كدة، "(حمدين) مشيها، أي حد م التانيين لأ نفذ القانون"

اليوم التاني من الانتخابات الصبح:-
- وأنا رايحة اللجنة كمراقبة، راكبة التاكسي وكان بيتكلم عن الانتخابات، وقال انتخبت "(حمدين)"، سألته "هو بيشتغل إيه؟" قال "مش عارف، محامي باين"؛ رديت قلت له  "لا هو ما دخلش حقوق، هو صحافة معاه كارنيه صحفي، ومسك جريدة فاشلة اسمها جريدة الكرامة، مش بتكسب، إنما مفيش مشكلة عشان هي متمولة من القذافي، من وقت طويل"،
كان رد سائق التاكسي "إيه؟ّ ...بس هو بيقول كلام حلو، ومناضل"، قلت له "حضرتك من حبة اتكلمت عن مبارك وفاهم كل حاجة وبتتكلم زي (حمدين) وأحسن، وبتشتغل كل يوم 12 ساعة عشان تجيب أكل عيشك وعيش عيالك، هو بياخد فلوس عشان بيقول كلمتين يتقالوا على قهوة، بس هو لابس شيك وبيقولهم على التلفزيون، إنما حضرتك بتقولهم عشان ده رأيك، وعندك شغلانة حقيقية بتتعب فيها عشان تجيب لقمة العيش، يبقى مين المناضل؟"؛
كملت كلامي "...حضرتك لو واحد متقدم لبنتك، هتقبله عشان عجبك كلامه ولا هتروح تسأل عليه وعلى شغلته؟ إزاي مش عارف شغلة مرشحك لرئاسة بلدك؟"؛
 قعد الراجل يخبط إيده في الديركسيون ويقول "ما قلتوش ليه من بدري؟"؛

- المحل الموجود آخر شارع المدرسة اللي كنت مندوبة فيها، رحت اجيب من عنده ماية، قعد يحكي لي عن الانتخابات وإزاي برامج ال13 مرشح وقارنهم ببعض وقعد هو ومراته ويعلم عياله الصغيرين ف إعدادي وابتدائي كيفية اختيار رئيس، وقال لهم أنا وصلت للمرشح ده، ومراته دعمته وولاده فرحوا باختيار باباهم، واتكلم على مسؤولية الاختيار عشان أولاده ومستقبلهم. وبعدين سألته "اخترت مين بعد المقارنة" قال لي "حمدين"، سألته "حمدين بيشتغل إيه؟" رد "آآآه ..بصراحة ...ما عرفش" حكت له تاريخ حمدين، برق وسكت لحظة، ورد" بصراحة أنا أول مرة اسمع الكلام ده وما أعرفش غير إنه "مناضل"

اتكرر الموقف ده بأشكال مختلفة معايا ومع كذا واحد من أفراد الحملة لما كان بيسألوا الناس انتخبتوا مين أو قبل كدة بكام يوم لما كانوا بيسألوا "هتنتخبوا مين"، حقيقي يمكن أكتر من 90% مش عارفين #حمدين_بيشتغل_إيه؟

اليوم الثاني من الانتخابات بعد الظهر-- داخل اللجنة:-
- كنت مندوبة عن (ابو الفتوح) وكان معايا مندوبة (مرسي) ووكيلة (مرسي) ومندوبة (عبد الله الأشعل) ووكيلة (عبد الله الأشعل)، وكلهم من جماعة الإخوان وحاضرين لفرز (مرسي) لأن (الأشعل) كان بحسب كلامهم "الظل" اللي الإعلام مسميه "الاستبن".
واحدة منهم كانت بنت مدير المكتب الإداري لجماعة الإخوان في الاسكندرية وقالت لل3 التانيين، "ربنا نصرنا بالظل الثاني، فاكرين لما كنا في مجلس الشعب دايمًا يكون لنا مرشح ظل؟ أهو ربنا كرمنا بـ3 مرشحين الحمد لله، أول واحد خرجوه والتاني كان احتمال يمشوه عشان موضوع أولاده أمريكان، وكنا محضرين (الأشعل) لكن ربنا كرمنا بالثاني ونزل الانتخابات، أد إيـــه ربنا كريــــم"
قلت لنفسي: "يااااه وسابوا الإعلام والجمهور يفترس (ابو الفتوح) ويدعي إنه مرشح الإخوان الخفي وهم محضرين 3 مرشحين بعيد عن أبو الفتوح تمامًا"


اليوم الثاني من الانتخابات بالليل:-
- صديقة كانت رايحة في سوق اشتغلنا فيه كويس أوي، وكان في محلات معلقين بوسترات أبو الفتوح، منهم اللي ليه دقن، الله أعلم سلفيين ولا لأ، وكانوا بيتكلموا على إنهم إدوا صوتهم لـ(حمدين). الست سألتهم بغضب "حمدين! حمدين! ليه؟ بيتشغل إيه ده؟! سبتوا الراجل المحترم اللي معلقين صورته ليه؟" بصوا في الأرض وما ردوش عليها.

اليوم الثاني من الانتخابات بالليل -- داخل اللجنة -- وقت الفرز:-
- ف اللجنة وقت الفرز كان معايا الابنة الكبرى لمدير المكتب الإداري للإخوان وأعرفها وعائلتها من زمن طويل، كانت نتيجة (مرسي) متدنية، وكان المندوبات والوكيلات الأربعة زعلانين جدًا، فحاولت أخفف عنهم وقلت لهم "إذا كان إحنا حملة (أبو الفتوح) عارفين إن (مرسي) هيعيد بس مش عارفين مع مين، ممكن أبو الفتوح"، البنت قالت "لا لا يا رب"، وكنت باكمل كلامي "...وممكن موسى أو فلول عمومًا" قالت "يا ريــــت إن شاء الله" 
كان نفسي اعاتباها، وخصوصًا دلوقتي، هي كانت بتدعي لإعادة بين "مرسي وموسى" فتكون القصة إخوان أو فلول على قديمه.

- ماتتخيلوش مندوبات (مرسي) كانوا فرحانين قد إيه بتقدم (حمدين) في اللجنة وقت الفرز، وهم عارفين إنه مش هياخد أصوات في أماكن كتير، وكانوا بيقولوا لبعض "التفتيت الكبير ده لصالحنا، علامة نصر إن شاء الله" ورددت بنت مكتب المدير الإداري نغمة "إن (أبو الفتوح) وقع في المناظرة"، ما رضتش اسألها وإيه أخبار كلام حملة (مرسي) ف الشارع عن سوء أخلاق (أبو الفتوح) كسبب خروجه من الجماعة :/

يوم النتائج الأولية التالي للفرز صباحًا:
- لكن يوم النتايج، هي وكتير اتصدموا من صعود (شفيق) بدل (موسى).
هي كانت بتدعي دعوة مش عارفة نتايجها، أمنيتهم إن الإعادة بين "مرسي وفلول" كان على (موسى)، لكن صعود (شفيق) وصدمتهم مش معناه إنه غير مقبول (وموسى) مقبول إنما معناه إن العسكر كان متدخل أوي في الانتخابات،
 كلنا على المحك دلوقتي، نفسي اتصل اسألها "سعيدة باستجابة الدعاء؟"

ولو إني أنا عارفة إن لو كنا وصلنا الإعادة بين "مرسي وأبو الفتوح" كان يفضل التنظير والهري بأسلوب "هاهاها شفتوا الصفقة مطلوب مننا نختار بين إخوان وإخوان" وغيرهم هيقولها نختار بين "#£؟µ% و#£؟µ%" على رأسهم (الأسواني) اللي كان بيقود حملة من حملات الهجوم على (أبو الفتوح) ووصل دلوقتي لوضع "وا مرساااااه"، ليه؟ "ده شفيق يا جدعان مفيهاش هزار، رقبتي"

اليوم النتائج الأولية التالي للفرز مساءًا:
. تحية لإنجازات حملة حمدين صباحي:
اتكررت الكلمة دي أكتر من مرة على تويتر والفيس بوك وعلى التلفزيون، بيحيوا حملة (حمدين صباحي) إنها بالرغم من "كل شيء" قدرت تتخطى وتتفوق على حملة بقالها أكتر من سنة شغالة، هي حملة (أبو الفتوح).
محدش يقول شطارة الله يكرمكم ومش هقارن إن صفحة حمدين ف اسكندرية على الفيس بوك 700 فرد مقابل أكثر من 30 ألف لأبو الفتوح،  ولا إن صفحة الحملة الرئيسية حوالي 100 ألف لحمدين في مقابل أكثر من 500 ألف لأبو الفتوح، المقارنة من على الأرض الحملة بتاعة حمدين كانت مش متواجدة، حقيقي.
الأسهم العالية كانت لـ(أبو الفتوح) في الأول، عشان كدة مفيش داعي للتريقة على إن كان في ناس بتدعو مؤيدي(حمدين) واللي عندهم استعداد التصويت لـ(أبو الفتوح) في الإعادة، إنهم يدعموه من دلوقتي.

ده من حساب سيدة قالت وهي تعمل مندوبة في إحدى اللجان أنها تدعم (حمدين)، ولكن العمل يضطرها إلى أن تكون مندوبة عن (عمرو موسى) وظن السامع أنه لحاجة مادية، لا يعلم أنها إحدى عضوات روتاري الاسكندرية، وكانت قبل 25 يناير تعمل مع (سوزان مبارك) وأنها كانت تساند الرأي التالي قبل أسابيع
كي نعلم أن (حمدين) كان ستارًا لكثيرين

حملة (حمدين) هل بدأت في اسكندرية من إسبوعين؟
لمن لا يعرف حملة (حمدين) في اسكندرية مفترض إن أول اجتماع لأعضائها من إبريل 2011، لكن عددهم ما زاد بالمعنى ولا يصل حتى إلى 20% من حملة (أبو الفتوح). كان الناس في الشارع بيتكلموا عنه كل فين وفين، وماكنش في الشارع حكاية مقارنة أبو الفتوح بحمدين أصلًا، وميلهم لـ(أبو الفتوح) عشان تاريخه أوضح، اللي كان بيتكلم عن (حمدين) كان بيقول فرصته أعلى شوية من (خالد علي).

كل اللي بيحيى (حمدين) عشان كلامه الحلو وقدر يكون "واحد مننا" و"إننا حاسينه"، الرد الوحيد عليه "عبد الناصر".
وكل اللي بيقول ده انتصار للتيار اليساري بالرغم من كل شيء، الرد الوحيد برضه "عبد الناصر".


. تحية للشئون المعنوية العسكرية:
المهم بعد متابعة النتائج بخاصة المناطق صعد فيها (حمدين)، الشغل الأكبر في الأماكن اللي صعد فيها (حمدين صباحي) مرتبط جدًا في معظم الأحوال بوجود مقار القيادة العسكرية أو الحزب الوطني
نتابع انفجار ماسورة (حمدين) بعيدًا عن الإعلام النتاوي وإعلام التلفزيون، وبعيدًا عن (كفر الشيخ) مسقط رأسه، وكيفية وصوله للمحافظات المختلفة بالسرعة دي، وبدون سذاجة "تحية حملة (حمدين صباحي) على المجهود في الوقت القصير"، الله يكرم أصلكم وعقولكم.

-دعم الشفيق:
الأول كان ظن الغالبية وأنا، إن (عمرو موسى) هو المرشح المفضل للعسكر، ولو إنا كنا عارفين إن (شفيق) ماريونيت لقطة في إيد العسكر، ويُقال إن العسكر غير رأيه، وجايز ده حقيقي، بس من غير تغيير رأي، إنما من باب المناورات العسكرية، لأن في البداية (عبد الرحيم الغول) كان بيحمي زيارات موسى في الصعيد، وبعدين سمعنا إن (الغول) وغيره من الحزب الوطني بيدعموا (أحمد شفيق)، نذكر من الاسكندرية مثالًا إعلان حزب (مصر القومي) متمثلًا في (عفت السادات)، رئيس نادي الاتحاد، واللي حصلت قائمته على ما يقل عن 30 ألف في انتخابات مجلس الشعب لم تكفي لإدخاله البرلمان أمام المئات اللي حصل عليها آخرون، دعمه لأحمد شفيق.

ومثال تكفل (طارق طلعت مصطفى) بحسب كثير من الشهود، بتعليق لافتات (أحمد شفيق) على واجهات العمارات الكبيرة في منطقة سيدي جابر إلى سان ستيفانو، ورجالته هم اللي بيعلقوها،
(طارق طلعت مصطفى) في مجلس الشعب حصل على مئات الآلاف من الأصوات بس أقل من الخضيري، لكن لازالت كتلة تصويتية يتحكم بها. خسارته في إعادة مجلس الشعب لم تعني رفع الحصانة عن (طارق طلعت مصطفى) أو محاسبته، هو لازال بكامل هيمنته.

لإنجاز المهمة، تم تقسيم المحافظات لنوعين 1. محافظات يصعب فيها تصعيد الفلول؛ 2. محافظات يسهل فيها تصعيد الفلول.
تصعيد الفلول، أي انتصار النظام القديم، شغال من أول الثورة بخطوتين متتاليتين، قتل الحراك الثوري في الشارع ثم الاستفراط بالقوة المتبقية وهي تنظيم الإخوان، باستخدام طرق مختلفة، وقوى مختلفة، اهمهم القوة الناعمة، ألا وهي الإعلام.

 ... حملة العسكر من أجل حمدين باختصار حمدين مناضل حمدين مناضل لا فلول ولا إخوان لا فلول ولا إخوان


وعليه كان الحزب الوطني متحالفًا مع الداخلية مع جهاز الشئون المعنوية العسكرية لإنجاح شفيق من ناحية واستخدام الدعاية (حمدين) لكسر (أبو الفتوح) في المناطق اللي يتعسر فيها تصعيد فلول، ثم الاستفراط بالإخوان متمثلين في مرشحهم (مرسي).

في الجزء التاني بنحكي إزاي (طارق طلعت مصطفى) اشتغل لـ(حمدين) في منطقة المطار

العسكر محتاج مقرات شغل، بالنسبة للشفيق فريق عندهم مقرات الحزب الوطني تحت الخدمة، أوكي تمام، دي هتشتغل كويس في المناطق اللي وارد فيها تصعيد فلول، عندنا 5 مناطق حيوية  تصلح للاستخدام كمساهمة من العسكر ألا وهي:
1. المنطقة الشمالية العسكرية -- الاسكندرية
2. المنطقة المركزية العسكرية -- القاهرة
 . المنطقة العامة -- القاهرة
3. المنطقة الجنوبية العسكرية -- أسيوط
4. المنطقة الغربية العسكرية -- السويس
5. القاعدة البحرية -- بورسعيد
وغيرهم....دولة عميـــــــــقة بقة

(حمدين) في القاهرة والاسكندرية والسويس يحصل على أصوات مرتفعة، إلى جانب بورسعيد ودمياط، سواء أول أو ثاني، وكلها منابع للثورة. أما في أسيوط (المنطقة الجنوبية العسكرية) والمنوفية (معقل فلولي) إيه اللي بيحصل؟ فين (حمدين)؟ في موقعه الطبيعي بحجم حملته وشعبيته، ترتيبه الخامس، لأن العمل كان بالأساس لتصعيد شفيق، فأي طعن على (أبو الفتوح) أو غيره كان يصب في المناطق دي لمصلحة (شفيق) مش (حمدين)...

نتابع "عينة" من نتائج المحافظات مقارنة بوجود القيادات الداعمة لـ"شفيق" والراغبة في استخدام "حمدين" لكسر "أبو الفتوح"
المحافظةشفيقحمدينقيادة ملاحظة
الاسكندريةالخامسالأولالقيادة الشمالية العسكرية + حزب وطنيتصدير خطاب لا ديني ولا فلول
السويسالخامسالثانيالقيادة الشرقية
العسكرية + إسلامية
تصدير خطاب لا ديني لا فلول يحرز الثاني لقوة الإسلامي
أسيوطالأولالخامسالقيادة الجنوبية
العسكرية + حزب وطني + كنيسة
حمدين يهبط لصالح شفيق
المنوفيةالأولالخامسحزب وطني قويحمدين  يهبط  لصالح شفيق
الشرقيةالأولالرابعحزب وطني قويحمدين  يهبط  لصالح شفيق
سوهاجالثانيالخامسحزب وطني قوي + كنيسةحمدين  يهبط  لصالح شفيق
قناالثانيالخامسحزب وطني قوي + كنيسةحمدين  يهبط  لصالح شفيق
بني سويفالخامسالرابعإسلاميةأبو الفتوح الثاني  3 أضعاف حمدين
المنياالثالثالرابعإسلاميةأبو الفتوح أكثر من ضعف حمدين
البحيرةالخامسالرابعإسلاميةما بين إخوانية وسلفية + ثورية - مرسي الأول وبعده أبو الفتوح
القاهرةالثانيالأولالمقر العام والقيادة المركزية + الحزب الوطنيتصدير خطاب لا ديني قوي + خطاب ثوري + تواجد كبير لأصحاب المصالح وتواجد قيادة عسكرية (هنا العاصمة)


وياريت ما نرميش الشماعة على الأقباط بالأساس في اختيار شفيق، عشان لو جينا للصراحة، قارن اختيارات السلفيين والإخوان وغيرهم كتير لأي مرشح هي كانت على أساس إيه.
ملحوظة جانبية: مدرسة تجويد القرآن بتاعتي الأخيرة، مهندسة سلفية جدًا، وصوتها لعمرو موسى

(شفيق) اشتغل له الحزب الوطني بقوة، مثلا ف اسكندرية، كان (طلعت مصطفى) مسؤول عن دعاية منطقة سيدي جابر إلى سان ستيفانو و(عفت السادات) عن منطقة محرم بك وما حولها، صحيح ما جابش فيها اكتساح بس عد أصوات ف الآخر وأصوات منها أسر القوات المسلحة، أؤكد لكم بعدة قرائن:-
. صديقة برتبة ضباط طبيب متقاعد في القوات المسلحة، تقاعدت بعد الثورة، راحت تزور زمايلها في المستشفى العسكري قبل الانتخابات بأيام لقيت كلهم هناك موصيين أسرهم على (شفيق) وهم مالهمش حق تصويت بس الأوامر لأسرهم،
. نفس الصديقة عشان تقاعدت بعد الثورة هي وجميع زمايلها اللي تقاعدوا بعد الثورة تم حرمانهم من التصويت في الانتخابات. ودول عددهم مش شوية آلاف مؤلفة؛
. كنت باكلم جارة متداخلة مع عائلة "داخلية"، إدعوا إنهم انتخبوا موسى، يوم الانتخابات كنت باقولها كل عائلات القوات المسلحة (شفيق)، ردت بتلقائية "أيوة ماما انتخبت شفيق"، عشان أخوها قوات مسلحة متقاعد؛
. عرفت بعد كدة إن كلهم (شفيق)، ودي كانت توصيات ابنهم مدير مكتب أمن دولة، وشباب العائلة الصغير المحرج من انتخاب (شفيق) كانت التوصية بانتخاب (حمدين) كبديل؛
. دلوقتي كل العائلة صغير وكبير انتخبت (شفيق) أو (حمدين) في الإعادة (شفيق) طبعًا بدون تردد.
. مهندس سأل زميله قبطان، انتخبت مين قال له (شفيق)، اتخص ورد "إيه شفيـــــق؟" قال له "لا لا قصدي عمرو موسى"
تاني مرة حد يكون انتخب (شفيق) ويقول انتخبت (موسى)
. وقت شغلنا تبع حملة (أبو الفتوح) في الشارع، واحد قالها بكل صراحة، وده كان في الإسبوع الأخير ده، أيوة هنتخب (شفيق)، لولا إني لازالت في القوات المسلحة،
. صديقة كانت بتزور والدها في السجن الحربي، وهم بيتفشتوا قبل الدخول، اللي قبلها في الطابور كانت بتتفتش من واحدة ست قالت لها، "إنتي هتنتخبي مين"، ردت قالت لها (شفيق)، راحت المسؤولة عن التفتيش ضحكت وقالت لها "خلاص مش هتتفتشي"

حمدين عميل؟!
 لا ما قلتش كدة، مش ضروري ده حصل بعلم منه، بس واضح جدًا لعب الشئون المعنوية والتحريات العسكرية، في اللحظة الأخيرة بالخصوص في أماكن تمركزها هي والحزب الوطني، مش بس لـ(حمدين) إنما جنبًا بجنب لـ(شفيق)، محدش يقول كان خطر على (شفيق)، هم حسابينها صح وكان في فرق حوالي 800 ألف صوت، لكن لما يحصل الإنقلاب ده بسرعة والإغداق في الدعاية، وتوجيه الإعلام والدفة لصالحه، ضروري يكون أخد باله بس عمل مطنش.
وجت له على الطبطاب، البطل الثوري وظهور أبناء ومؤيدين ومتعلقين بيه كقشاية  نتعلق بيها نجاة بالثورة، فرصة ظهور إعلامي وكاميرات ما تتعوضتش

إنكار ما بعد الصدمة
- وما يحدث الآن من دعوات لتصعيد (حمدين) بدلًا من (شفيق) وطعون وغيره، لن يحدث، مهمة استعماله انتهت، وإن تجاوز هيكون هناك تصرف آخر، ولا بيده شيء ليتجاوز به، سواء استكمال الاستناد على البالون والسير متبخترًا محتفلًا بانتصار مزييف، يظهر له الكثير من الأبناء، 
يظنون أنهم يدافعون عن الثورة كما ظن من قبله أنهم يدافعون عن الدين بالاستقتال لمساندة المرشح المستبعد (أبو إسماعيل)

ولن يتواني الإعلام عن الانقضاض على (حمدين)، لأن مهمة التوجيه نحوه وتلميعه انتهت.
ليتشابه ما حدث مع ( أبو سيماعين)، فجأة دعاية منفجرة في الشارع وفجأة لا تسمع شيء عنه، ولعل ده بداية تحجيم (حمدين) ووضعه في نصابه الحقيقي، 
أو
إن استخدام (حمدين) لسة ما انتهاش، الأقرب لإدراكي إنه انتهى، بس ماقدرش أجزم بالقطع على أي من الرأيين، لا احتكر الحقيقة، ولأن المجلس العسكري نفسه والمخابرات الظاهرة (المصرية) والخفية (الأمريكية) ممكن يلاقوا فيه خير ليهم ويغيروا رأيهم ويكملوا استخدامه شوية كمان، خصوصًا إنه أبناءه مش أبناء "تطبيق الدين" لا ده متعلقين بيه تحت اسم "الثورة" و"المدنية"، فرصة يفوتها العسكر؟

في غيري مسجل نفس ملاحظتي على حملة (حمدين) وشايف استخدامه ممكن يكون إزاي





أظن دي قطعة البازل الناقصة، كيفية استخدام (حمدين) الفترة الجاية، استخدامه هيكون إزاي؟ يدفن؟ ولا يتلمع زيادة؟



تغريدة للمحامي والناشط الحقوقي/مالك عادلي (24 مايو 2012)
متوقع إنكار كثير ممن أعطوا صوتهم لـ(حمدين) أي حاجة من التفاصيل، عادي حصل كدة مع ولاد (أبو سيماعين).
وعارفة إني في بعض النشطاء من اللي بيحصلوا على تمويل حاليًا، شايفين لا غبار على (حمدين) إلا إنه يمتدح ديكتاتوريين إنما إنه يعيش عمره آخد المعارضة سبوبة، دي حاجة عادية، مشروعة، عشان هم بيعملوها "واحد مننا...عاطل زينّا"

كل واحد فينا بيقول السبب في حاجة شافها وعادة ما بيختصرها لسبب أو اتنين، إنما الموضوع حصل بطريقة النموذج الميكانيكي، كان في لعبة على الكمبيوتر زمان، ترتب بعض العناصر عشان تعمل نظام ميكانيكي بطريقة متسلسلة صحيحة، بيحصل فيها إنك تحط كرة فوق المقص والمقص بين الحبل والحبل مربوط في جردل والجردل على طرف الزحليقة من فوق وتحت الزحليقة موجودة القطة وقدام القطة في فار والفار بيشغل عجلة، شبه الصورة اللي تحت: النموذج الميكانيكي الفعل ورد الفعل...الأسباب والنتائج


كل واحد فينا مُطًلع على جزء م اللي حصل بس مش بالتساوي، ولا أدعي احتكار الحقيقة، بس شفت جزء مش قليل منها بقدر قطع البازل المكونة للصورة وعرفت كل حاجة من دي حصلت بسبب إيه كان قبلها.

على فكرة في الشارع بدأ تصدير فكرة، لو (مرسي) كسب الجيش هيبهدلكم، وهم 4 سنين وتعدي، أي كان اختياركم المنحاز للحق أو الثورة رجاء عدم ترك الشارع للشئون المعنوية وأمن الدولة والأجهزة بتاعتهم، هنصحى نلاقي نفسنا عايشين مع ناس ما نعرفهاش.

بالنسبة للمقاطعين في الأولى أو الإعادة، أديكم شفتكم إنكم مش أقلية، ملايين قاطعوا الانتخابات، منهم أعداد كبيرة موجودين على أطراف المدينة في المناطق النائية، افكارهم مش متعقدة على طريقتنا، ممكن تكون مقاطعتهم سياسية أو مجرد عن فهم، ممكن تحبوا تزوروهم وتسمعوا منهم قاطعوا الانتخابات ليه، هتلاقوها رحلة تستحق التعب

ملحوظة جانبية: بمناسبة الموضة التي لا تنقطع عن الحديث عن أهالي الشهدا والصباع اللي في دم الشهدا، في أهالي شهدا كانوا رايحين ينتخبوا (عمرو موسى) بفطرة بحب "عمرو موسى وباكره إسرائيل"، لولا مرور شباب من الحملات الرئاسية عليهم ولنا أن نتوقع إن في معداش عليهم حد.

في حين إن كتير بيتريق إن كله دلوقتي بقى ليه ف السياسة، فإن حسب معرفتي، إن السياسة طريقة إدارة المعايش، وإن شيء أساسي إن كل واحد يكون متدخل في طريقة إدارة المعايش، مش قاصرة على فرقة معظمها مكانها الحقيقي القبور، بتتدعي احتكار الحقيقة والعلم بالشيء، وبتحاول توجه وتتحكم في الآلاف لأ الملايين....

أيام الطفولة كان في سباق جري، اتنين سوا، رجل واحدة مربوطة في حد تاني، ورجل حرة، كان لازم ننط بالرجل المربوطة إحنا الاتنين عشان نسابق ونوصل، والرجل الحرة لازم نرفعها متنية لورا عشان نعمل بيها اتزان،
الفرق لما كبرنا لقينا نفسنا مربوطين بآلاف وملايين محتاجين ننط كلنا سوا بالرجل المربوطة ونقنع الأعداد دي، إن الرجل الحرة تترفع عشان نعمل بيها إتزان يساعدنا نجري بالرجل المربوطة من غير من نقع...


:::تحديث:::
وصل التعليق ده على نفس التدوينة اللي نشرتها نوت على الفيس بوك
أنا كنت في حملة أبوالفتوح و الكلام اللي كتبتيه عن الشارع صح قوي.....كنت مندوبة في محرم بك و الناس كانت بتدخل تقول حمدين و مش عارفين لا شكله و لا باقية اسمه و لا الرمز و لما سألت واحدة ست غلبانة مين قالها تنتخب حامدين قالتلي (قالولنا كده في الأتوبيس) أنا ماعرفتش أفهم منها حاجة تانية بصراحة.....ده غير إني أعرف ناس ساكنين في شارع 20 بيقولوا في ناس عدوا عليهم في البيت...إذا كنا احنا بعددنا ما عملناش كده حملة حمدين إزاي توصل لطرق الأبواب زي الإخوان؟؟
:::تحديث:::




الجزء الثاني: مصر القوية ... ميدان التحرير في القلب


هناك 24 تعليقًا:

  1. تدوينة جديرة بالاهتمام والتأمل!

    ردحذف
  2. تدوينة مثيرة للإهتمام جداً ..

    ردحذف
  3. مقاله بترصد حاجات كتير و مهمه جداً , مجهود مشكور

    ردحذف
  4. عملت بحملة د. أبو الفتوح و رصدت تقريباً نفس الملاحظات التي رصدتيها بالشارع .. نعم دائماً ما نوهت في آخر إسبوع أن هناك شيئاً غريباً يحدث ..

    ردحذف
  5. مش قادر اصدق او مش عاااايز اصدق د كدة احنا اتلعب بينا ، كثيررر اووووى اد كدة احنا مغفلين !!!

    اقلها اليوم والغد لقد كفرت بالديمقراطية الغربية المتحكم فيها رجال اعمال وقوى الدولة الامنية العميقة والخطاب الحنجورى للبعض

    صدق عبد المنعم الشحات لما قال الديمقراطية مش حرام دى كفر ايضا

    ردحذف
  6. Thanks Dr. Muhammed El Baradei .. It was just a play .. thanks GOD that I wasn't a part of it

    ردحذف
  7. راااااااااااااائعه

    ردحذف
  8. خلني أعترف أني إخوان و بأيد مرسي و خلني أقول أني متفقة مع جزء من كلامك و اختلف مع الآخر لكن بسم الله ماشاء الله ترتيب افكار جيد
    الجزء بتاع الإعادة مع ابوالفتوح في توضيح بسيط يظل ابو الفتوح في قلوبنا اخ عزيز و أكيد محدش كان بيتمنى يعيد مع اخوه محدش يتمنى يخبط ويصطاد الأخطاء لأخ ببساطة جميعنا كنا لا نرجو صراع الأخوين و ده حق رومانسي من افراد كتير من الأخوان أنا اولهم

    ردحذف
  9. الكلام كان كويس في التعليق على ما حدث بالنسبة لحمدين.. لكن لما بدأتي تشبهي اللي حصل لحمدين باللي حصل للشيخ الفاضل المجاهد حازم أبو إسماعيل.. اسمحيلي أقول لحضرتك كده دخلتي السلوك في بعض.. حازم أبو إسماعيل لم يلمع يوما ما في أي مكان لا من قبل المجلس السمكري ولا من قبل أي إعلام خاص ما عدا قناة الحكمة وكلام بعض المشايخ الذين تكلموا بالحق, بالعكس المشايخ اللي كانوا بيقعدوا مع المجلس العسكري باستمرار شاركوا في الهجوم عليه وكل القنوات الفضائية كانت تنصب له الكمائن وتحذر من الدولة الدينية التي يدعو لها البعبع حازم أبو إسماعيل.. مش علشان الناس نزلت لحمدين والناس نزلت لحازم يبقوا الاتنين اتلمعوا زي بعض.. حازم اكتسب شعبيته تلك بحب الناس واحساسهم بصدقه ونقاء منهجه وقوة حجته.. وأظن إن هم ما عرفوش يستبعدوا حازم عن طريق الصناديق فلم يجدو طريقا إلا استبعاده من الأول.. لكن عرفوا يستبعدوا الدكتور عبد المنعم عن طريق حمدين، وأظن لو كان حازم كمل كنتي حضرتك هتعرفي مين اللي اتلمع ومين اللي الناس اقتنعت بيه فعلا.. يا ريت نكون منصفين.. وبلاش أفكرك إن الدكتور عبد المنعم كان بيطالب الشيخ حازم بالرضا بقرارات اللجنة المشكلة من أكبر قضاة مصر، وبعد ما خسر طلع يقول لن نعترف بهذه النتيجة والتزوير وخلافه.
    أنصار حازم لم ينزلوا في العباسية بالمناسبة من أجله والكلام ده اتقال كتير أوي.. فياريت لما يكون حازم مالوش دعوة بالموضوع ما تدخليهوش في الكلام وخلاص
    وبالمناسبة اسمه حازم أبو إسماعيل مش أبو سيماعين.

    ردحذف
  10. @abdo Mhmoud6
    طبيعي الكلام يرضي كل واحد بالجزء اللي يوافق تفكيره والمعلومات المتوافرة، في ناس بتصدق الجزء الخاص ب(أبو سيماعين) وترفض الجزء الخاص بـ(حمضين)

    - أعرف حقيقة تفاصيل جنسية والدة(أبو سيماعين) بعيد عن الإعلام عن طريق معارف مشتركة بيني وبين والدته، لذا لا أصدفه.
    - ولما قال في خطبة "ناقص بيقولوا على أختي معاها الجنسية الفرنسية" وهي معاها فعلًا الجنسية الامريكية، (وكان لسة ما صرحتش بكدة) ده اسمه تضليل، ولعب بالكلام على طريقة المحامين في وضع الدفاع...
    - شيوخ الظهور الإعلامي في عهد حكم مبارك، فاقدين مصداقية عندي..
    - لو القانون مستند على مبادئ أصيلة، يبقى برأيي المتواضع حقيقةإن أبناء (مرسي)معاهم جنسية أمريكية أخطر من إن والدة (حازم) المتوفاة معاه جنسية...

    - التشبيه بين (حمدين) و(حازم) خاص بنقطتين:
    1. هو شخص غير مؤهل للرئاسة، وآخره كلام، ولا هو رجل سياسي،ولا أي حل من الحلول اللي ذكرها لحل مشكلة البلد هي حلول عاقلة لها تطبيق على أرض الواقع، هو يعتمد في خطابة على الكلام المزوق وفقط؛
    2. أداء أفراد حملته ومؤيديه عند اللجنة العليا للانتخابات وأداء أفراد حملة (حمضين)ومؤيديه بعد النتائج وإلى الآن
    مؤيدين حازم، قرروا إنه صادق، إنما مفيش حد منهم معاه أدلة ورقية بصدقه، يعني مدفوعين بالأحاسيس زي ما حضرتك بتقول، وأولاد (حمضين) كذلك، لا وفاكرين إنه اتظلم وإنه كان يستحق أصوات أكتر من كدة

    - (أبو الفتوح) نادرًا ما بنذكر اسمه كدة، هو اسمه عندنا (تتح) وده شيء لا يقبله إلا من يبعد عن التبعية والأبوية والتزمت و يفتح قلبه وعقله :-)

    ردحذف
  11. @hajar كلامك "كنا لا نرجو صراع الأخوين " ممكن صادق على مستوى أفراد" إنما مش حقيقي على مستوى القيادات، وبعض أفراد حملة (محمد مرسي)، ما كانوش بيمعانوا يغلطوا ويطعنوا في سمعته أبو الفتوح بكل الطرق إلى حد تكفيره، يعني الجماعة رفضته لأسباب خاصة، وفي مجموعة تانية على مستوى الأفراد، لقوا ليها سبب "رومانسي" بعيد عن السبب الأصلي، بدليل اللي صدر من الجماعة لأبو الفتوح ووجعه، يعني التصارع حصل في الجولة الأولى، وبدليل أصلًا إن (أبو الفتوح) مرشح غير مقبول لدى الجماعة، وتقدموا ب3 مرشحين بعيد عنه.

    استنكار الإعادة مع (أبو الفتوح) زي رفض حملة (مرسي) الإعادة مع أي مرشح "محسوب على الثورة" عشان ما يكنش خطر على (مرسي) مش تحليل دي حقيقة في قلب الجماعة، وشوية زيادة عشان اللي يخرج عن الجماعة مش مفروض يحقق نجاح بعيد عنها...

    رجوع نظام مبارك هو المنظر الأكثر سوءًا، هو اللي يوجع القلب ويمس الرومانسية

    ردحذف
  12. كلام فاضي و جزء من حلمة التشزيه لشخص حمدين صباحي و واضح انك ماتعرفيش حاجة عن حمدين فعلا .. انا اتعصبت من اسلوبك الهمجي في النقد و واضح انك شايله اوي من حمدين عشان سكع مرشحك الاخوانجي علي قفاه "ابوالفتوح" ارجو انك تتلمي و تركني علي جنب و بطلي الهزي و الترجيع و القرف ال بتنشريه دا.

    ردحذف
  13. لالالالالالا انتى مش منصفه تماما والكلام ده لا من مشاركتك فى الشارع ولا فى أى حمله انتى كل اللى انتى عملتيه انك رتبتى حملات التشويه اللى وجهت لحمدين تحت بعضها ومتخلقوش أسباب لظهوره القوى فى آخر أسبوعين لان زى أما كلنا عارفين كان فيه 60 % من الشعب المصرى لم يحسم موقفه اتجاه أى مرشح كما ان ظهوره فى بعض البرامج مثله كباقى المرشحين رفعت أسهمه الا انه أيضا خرج الرابح من المناظره بين موسى وابو الفتوح
    يارييت يكون فيه شوية رويه وحكمه وصدق شويه وانا مش هرد على كل حاجه بالتفصيل لان دى كلها حاجات قديمه وتم الرد عليها ولو مكانش فيه نيه لمجرد التشويه أكيد كنتوا حطيتوا فى الحسبان الردود اللى إتردت
    وسلام

    ردحذف
  14. وبعدين ودي المفروض وثيقه نعتمدها يعني ..
    انتوا مشكلتكم أنكم داخلين سياسة جديد ..
    مفيش وجه للمقاونة بين ابو الفتوح وصباحي .. وهما في الجامعه كان الزعيم والقياده حمدين صباحي .. مرات الأعتقال ابو الفتوح مرتين علشان الجماعة وحمدين 17 مرة علشان مصر ومرتين إعتقال ..
    خبرة ابو الفتوح في لنقابات حمدن في قبل الشارع وقضايا الناس ونائب لدورتين 10 سنوات بالبرلمان وكل مرة كان بيموت ناس في مقاومة الأمن علشان ينجح .. والأخوان اللي في الدايره كانوا بيتشحنوا لدعم مرشحي الخوان في مدينتي الرياض وبيلا ..
    وأعتقد أنتم عرفتوا حجمكم وحجم الأخوان والسلفيين في كل كفرالشيخ ..

    أصواتكم ملهاش دعوة بالثورة لسبب بسيط أبو الفتوح رجل إصلاحي طوال تاريخه زي تاريخ الجماعة كله إصلاحي ولم يكن ثورياً في أي مرحلة ومش هشرح أبحثوا عن الفرق بين الثوري والإصلاحي ..

    أصواتكم السلفيين بالإضافة لم تلون عليهم أبو الفتوح واشتغل بليل ليبرالي والصبح إخواني والعصر يساري وبعد المغرب قومي ..

    الفرق بين حمدين وابوالفتوح لن يقول لكم عليه إلا ابوالفتوح نفسه اللي كان بيقف زي التلميذ أمام حمدين في الجامعه وراجعوا لقاء السادات وتعرفوا فرق القدرات والحنكه والخبرة وكل حاجة ..
    ابو الفتوح آخر النقابة أو جامع الفتح ..

    أما عن حمدين والجيش فالمرشح الوحيد اللي صرح برفضة للخروج الآمن للعسكر هو حمدين صباحي علشان كده تم إزاحته لصالح شفيق ..
    بالمناسبة في إحتمال كبير الأنتخابات تتعاد .. أغلبية اصوات الفتوح اللي خدها بالدجل والخداع راجعه واضعافها لحمدين وهنفكر بعض زي ماقلنالكم قبل الأنتخابات مش هتحصلونا ورغم ملاينكم اللي اتصرفت سبقناكم بمليون ..
    حمدين في محافظة سابق اللي بعده بـ 400 الف أبو الفتوح الثالث بعد حمدين في الغربية محافظة ابوالفتوح ياترى لما أهلهم يشهدلهم ينفع نزايد ..

    ليه ابو الفتوح رفض يناظر صباحي مسالتهوش ..
    ههههههههههههههه
    مساكين

    ردحذف
    الردود
    1. فى البدداية انت مصدق نفسك ؟؟
      ابو الفتوح متلون ؟؟
      اقولك انا عشان ابو الفتوح صادق و كل صفاقتة تحمل الشفافية دى شهادة ع فكرة
      ان السلفى و اللبرالى و الاشتراكى كله عارف الصفاقة مع الاخر
      ببساطة : السلفى له حرية الدعوة و اللبرالى له حرية الراى و اللشتراكى له تطبيق عدالة اجتماية : و ك منهم يغلم الصفقة الاخرى
      هذه هى الشفافية التى تصعب ع البعض تنفذها
      و بعدين ابو الفتوح مرفضتش مناظرة زى مانت بتقول دى مجرد فرقعة و شو اعلامى لصالح حمدين

      المرشح الوحيد اللى رفض خروج الجيش ّ!!!!
      امال مين االلى كان بيقول فى الرنامج ع النهار يسقط يسقط حكم العسكر ؟؟
      انت اللى مسكين و الله :)

      حذف
    2. الرابع والخامس في الشرقية والمنوفيه معناها ان الفلول داعمينه؟ على اساس ان الخامس اعلى من التاني والتالت والرابع؟ ولا يمكن الفلول مكانوش في المنوفيه والشرقية ايام الانتخابات وشفيق طلع الاول ببركة دعاء الوالدين؟ او ان الفلول قصدو يجيبوه اخر واحد من الخمسه المنافسين في دواير ضخمه تمويه؟

      احنا بنرحترم ونقدر ابو الفتوح. انا في اسرتي والدتي واخويا ومراته اده ابوالفتوح وانا ووالدي واخويا الصغير ادينا حمدين وكل واحد فينا بيتمنى الفوز للتاني ومتضايقين ان الاتنين متوحدوش (بصرف النظر عن اختلافهم. الاتنين لازم يتلامو على ده. لو واحد فيهم كان معاند التاني كان لازم يطلع الكبير ويتنازل للمصلحه الوطنيه. كون التوحد فشل بين اتنين محترمين يعني الاتنين مسؤولين بصرف النظر عن الاسباب)

      حمدين خد اصوات الناس مش نتيجة دعم العسكر او اي قوى خارجيه او كائنات فضائية ، هو نجح دعائياً لانه كان بسيط ومتواضع مع الناس (الفقراء خصوصاً) (زي ابو الفتوح) بس كمان ظهر بسرعه في وقت قصير مسمحش بوقت كافيه للهجوم عليه سواء من الاخوان او الفلول. لو الناس خدت بالها منه من الاول كان هيتهاجم اكتر من ابو الفتوح ومايجبش الاصوات ديه. الناس بس بعد المناظره دخلت في نوع من التفاعل التسلسلي. جذء شاف ابو الفتوح ضعيف وطيب زياده وفكر يختار حمدين ولما شاف صدقه في تواصله مع البسطاء محتاجش وقت كتير عشان يقنع اللي حواليه واللي حواله اقنعو اللي حواليهم. انا متأكد ان لو كان حمدين مكان ابو الفتوح وموسى قل ادبه عليه كده كان ربما حمدين هيغضب ويرد بقسوه وكانت الناس برده هتسيبه وتروح لغيره.

      مره تانيه مش لازم نروح لنظرية المؤامرة لما نلاقي حاجه غريبه مش عارفين نفسرها. مش معنى ان حمدين طلع عدى ابو الفتوح معناها ان حمدين شرير او اننا بيتلعب بينا. معناها ببساطه اننا كنا اغبيه بما يكفي ان يكون لينا اصوات تطلعنا الاول بسهوله متقسمه على اتنين محترمين دماغهم ناشفه معرفناش نكسرها.

      حذف
  15. انا انتخبت خالد علي بس كنت متاكده ان ابو الفتوح في الاعاده واني هانتخبه بس دلوقتي انا معنديش حل غير اني انتخب مرسي ..على فكره عجبتني اوي الجزئيه دي"أي كان اختياركم المنحاز للحق أو الثورة رجاء عدم ترك الشارع للشئون المعنوية وأمن الدولة والأجهزة بتاعتهم، هنصحى نلاقي نفسنا عايشين مع ناس ما نعرفهاش." .. و اخيرا اقدر لكي جهدك وجزاك الله خيرا عن محاولة ايضاح الحقيقه

    ردحذف
  16. الرابع والخامس في الشرقية والمنوفيه معناها ان الفلول داعمينه؟ على اساس ان الخامس اعلى من التاني والتالت والرابع؟ ولا يمكن الفلول مكانوش في المنوفيه والشرقية ايام الانتخابات وشفيق طلع الاول ببركة دعاء الوالدين؟ او ان الفلول قصدو يجيبوه اخر واحد من الخمسه المنافسين في دواير ضخمه تمويه؟

    احنا بنرحترم ونقدر ابو الفتوح. انا في اسرتي والدتي واخويا ومراته اده ابوالفتوح وانا ووالدي واخويا الصغير ادينا حمدين وكل واحد فينا بيتمنى الفوز للتاني ومتضايقين ان الاتنين متوحدوش (بصرف النظر عن اختلافهم. الاتنين لازم يتلامو على ده. لو واحد فيهم كان معاند التاني كان لازم يطلع الكبير ويتنازل للمصلحه الوطنيه. كون التوحد فشل بين اتنين محترمين يعني الاتنين مسؤولين بصرف النظر عن الاسباب)

    حمدين خد اصوات الناس مش نتيجة دعم العسكر او اي قوى خارجيه او كائنات فضائية ، هو نجح دعائياً لانه كان بسيط ومتواضع مع الناس (الفقراء خصوصاً) (زي ابو الفتوح) بس كمان ظهر بسرعه في وقت قصير مسمحش بوقت كافيه للهجوم عليه سواء من الاخوان او الفلول. لو الناس خدت بالها منه من الاول كان هيتهاجم اكتر من ابو الفتوح ومايجبش الاصوات ديه. الناس بس بعد المناظره دخلت في نوع من التفاعل التسلسلي. جذء شاف ابو الفتوح ضعيف وطيب زياده وفكر يختار حمدين ولما شاف صدقه في تواصله مع البسطاء محتاجش وقت كتير عشان يقنع اللي حواليه واللي حواله اقنعو اللي حواليهم. انا متأكد ان لو كان حمدين مكان ابو الفتوح وموسى قل ادبه عليه كده كان ربما حمدين هيغضب ويرد بقسوه وكانت الناس برده هتسيبه وتروح لغيره.

    مره تانيه مش لازم نروح لنظرية المؤامرة لما نلاقي حاجه غريبه مش عارفين نفسرها. مش معنى ان حمدين طلع عدى ابو الفتوح معناها ان حمدين شرير او اننا بيتلعب بينا. معناها ببساطه اننا كنا اغبيه بما يكفي ان يكون لينا اصوات تطلعنا الاول بسهوله متقسمه على اتنين محترمين دماغهم ناشفه معرفناش نكسرها.

    ردحذف
  17. عندما تكتمل الصورة ... تحياتي :)

    ردحذف
  18. لما هو معارض سبوبه إيه اللي كان بيخليه يتسجن بسبب معارضته!!!!!!!!!!!!!!!!!

    ردحذف
  19. اخوانجية ولازم تعملي كدا

    ردحذف
  20. اغلب الكلام ده اعتقادات شخصيه الواقع اللى عشته ينفيها بلاش تعلقى فشل ابو الفتوح على افتراضات وهميه انا والدى قوات مسلحه محدش جه وجهه انه يقول لعيلته ترشح فلان انا بطلت صوتى و اخترت البرادعى و اخويا صباحى لانه فى حملته من الاساس عن اقتناع والدتى اختارت صباحى بسبب خطابه نزعه انسانيه عند الانسان بتخليهم يميلوا للى هينصف الغلابه و العداله الاجتماعيه من غير ما يهمهم برنامجه او بيشتغل ايه صباحى لعب على النقطه اللى بيتعاطف معاها اغلب المصريين اصحابى اللى ابهاتهم قوات مسلحه مختارين ما بين ابو الفتوح و حمدين من غير برضه ابهاتهم حد يوجهها لشخص معين فيه تانين اخوانيين و اختاروا مرسى و كانوا بيقنعوا الناس بمرسى انه الاصلح
    الامثله ال انتى قبلتيها لو كانت صح فده مش عشان موجه لكن عشان اغلب العسكريين بيميلوا و يفضلوا الرجل العسكرى اعتقاد منهم انه الاصلح دايما للقياده و اسرهم بيبقى عندهم نفس الميل... اعرف ناس بسيطه كتير مش من اسر عسكريين اختاروا شفيق لانهم بيحبوا العسكر شايفين ان الجيش اغلبه من اولادهم و اهلهم و يكون ابنهم مثلا استريح فى فتره الجيش بتاعته ووقع فى ايد ضباط محترمه فخد هو و اهله انطباع ان العسكريين كلهم زى النمودج ده سمعت السبب ده من ناس كتير اختارت شفيق اختاروه مش عشان هو مين ولا شخصه بس لمجرد انه عسكرى و هم بيحبوا العسكريين
    فشل ابو الفتوح كان سببه لقاءاته الاخيره هى سبب تضييع مجهود سنه ونص الطبقه اللى لعب عليها من البدايه و كانت مقتنعه بيه فى الاخر بدأت تبعد عنه بسبب كلامه الاخير و فضلوا واحد زى صباحى بكل عيوبه عليه
    اما الشارع انا نزلت الشارع و قت ما كنت بقنع الناس بالبرادعى اكتشفت ان اغلبه يبينلك انه اقتنع بكلامك و انه اه صح و خلاص انا مع الراجل ده وفى الاخر كلام مش اكتر بيسكتك فى الاخر يمشى ورا رأى واحد صاحبه بيجى يقعد معاه فى المحل او راجل طيب بيشوفوا انه بيفهم اكتر منهم العرافه بتاع المنطقه او يبيع صوته للى يدفع اكتر بجد فكرة اقناع الشارع دى فاشله مجهود بيضيع على الفاضى للاسف لان بيجى للراجل ده ناس غيرك لمرشحين تانين كله بيحاول يقنعه ان اللى تبعه هو الافضل فبيشترى دماغه و يعمل زى اللى هو بيرتاحله ما هيقوله او اللى شافه فى التليفزيون و ارتحله لله فى لله فيختاره او اللى يرشيه بحاجه و يخدمه زيت و سكر و فلوس هو ده شعبك للاسف لو فى مؤامره يبقى الشعب هو اللى بيتأمر على نفسه

    ردحذف
    الردود
    1. شكرًا على التعليق
      . مفيش أي من المكتوب بيتكلم بتعميم أو حصرية، لذلك مش كل اللي انتخبوا شفيق هم عسكريين أو حزب وطني أو تابعين لبعض الكنايس،
      . كون إن موجود فرد عسكري موجود في عائلتك وما حصلش توجيه، دي حالة استثنائية، معروف لدى العامة إن صدرت أوامر بين العسكريين بالتوجيه لشفيق، وده بيتم إلى الآن حتى من اللواءات اللي بيدرسوا في الأكاديمية، تفسير غير كدة، استثناء أو انكار مش أكتر
      . حضرتك ما ردتيش برضه منين جاب حمدين فلوس بعد يومين من وجود 700 جنيه في حسابه
      . لو كنت مكانك كنت هاحب اروح بنفسي منطقة المطار واتحرى إزاي رجالة (طارق طلعت مصطفى) اشتغلوا توجيه لـ(حمدين) بعد ما فشلوا جزئيًا في التوجيه لـ(شفيق)

      حذف
  21. اللى فاكر ان حمدين عمل حاجه فى مجلس الشعب العشر سنيين اللى قعدهم يبقى عبيط ولا حتى فى دائرته كخدمه لابناء الدائره حتى الانجازات اللى قال انه عملها لولا ثوره اهالى الدائره فى مواجهه الحكومه ايامها مكنتش اتعملت حمدين كان بيركب الموجه بعد ما الناس توصل للى هى عايزاه ويطلع يقول انا عملت (محطه المياه )مثلا وموضوع الدقيق اللى الكل تابعه على القنوات وقطع الطريق الدولى كل ده عملته الناس وبعد كده يطلع ينسب الانجاز لنفسه لمعلوماتكم حمدين هو من اهدر حقوق الصياديين فى البرلس وقضى على بحيره البرلس بتنشيفها لمصلحه (ما يسمى بارض الشرطه حاليا )دلوقتى 3/4 البحيره مزارع سمكيه بسببهوغباؤه وحاجات تانيه كتير ."حمدين ظاهره صوتيه عاليه هلاميه تافهه "

    ردحذف