17 مايو 2012

شير م الشارع(1)

عن الانتخابات اكتب، بعد ما تحولت من مقاطعة للانتخابات إلى متطوعة في حملة أبو الفتوح، كتبت عن بعض أسباب مقاطعة المقاطعة هنا
https://www.facebook.com/note.php?note_id=10150873341050695

الإعلام الاجتماعي مليان بوست وشير، من نفسنا نعمل بوست وشير من الشارع، واللي باشوفه وقت الشغل متطوعة سواء في الحديث ضد الفلول أو في سياق حملة أبو الفتوح مقارنة باللي بيحصل على الانترنت والاستطلاعات

ننقل لكم كدة شوية بترتيب الشعبية ف الشارع
عمرو موسى: شعبية عالية أكثر ما يمكن حد يتصوره على الانترنت
النسبة الأكبر من مؤيديه بهذا الرأي
هو اللي عارض مبارك ومبارك اتغاظ منه وداه جامعة الدول ، هو خبرة وهيمسك البلد
النسبة دي، متفقة معانا جدا في إنهم ضد "الشفيق"، وأي حملة تتكلم معاها عن "عدم" انجازات عمرو موسى، ترد بغضب "إزاي المعلومات دي مش متاحة ليهم زي ما اتيحت لينا" وبيكونوا على أتم الاستعداد يسمعوا منك بعدها، وإن كان مثلا حملة أبو الفتوح بتقوم بالكلام ده في منطقة في وقت معينة، فمن المتوقع إن حملة مرسي بتقوم بنفس الكلام ده في 5 مناطق على الأقل

أصل ده أقوى واحد يلم الإخوان
دي النسبة رقم 2 المؤيدة لعمرو موسى في الشارع، وبالعادة بتكون فئتين إحداهما كنبة أو فلول والتانية عدد من اللي تشبعوا بكلام الإعلام وبيكروهوا كل ما هو مصنف "إسلامي"؛
عمرو موسى هيجي يلمكم إنتم وبتوع التحرير، خلي البلد تهدى واخدين كام يا بتوع 6 إبريل، إنتم وبتاع تمويل قطر
ده نوع الرد اللي بيصدر من النسبة رقم 3 المؤيدة لعمرو موسى بحسب الشارع

معلش إحنا فاهمين وأنتم فاهمين إنه هو أو شفيق اللي هيريح الحكومة، وإحنا مش عايزين الحكومة تزعل وتقلبها سوريا
ده نوع الرد اللي بيصدر من النسبة رقم 4 المؤيدة لعمرو موسى

محمد مرسي: شعبية تفوق بمراحل استطلاعات الانترنت
ربنا هيكرمنا إن شاء الله
ده بيكون صادر بالأساس من أحد المنتمين لجماعة الإخوان
معلش محتاجين واحد يطبق شرع الله، الإخوان ما أخدوش فرصتهم، والإعلام ضدهم
 دي النسبة رقم 2 المؤيدة لمحمد مرسي ومنها أفراد سلفية
يعني سواء هو أو أبو الفتوح إحنا راضيين، لأن الاتنين طيبين/ يا ريت كانوا واحد عشان يخلصونا م الفلول
دي النسبة رقم 3 المؤيدة لمحمد مرسي دون تعصب وتتمنى أي حد "طيب" "بيخاف ربنا" وخلاص

أبو الفتوح: شعبيته أعلى شوية من الانترنت
هو مفيش غيره اللي هيجمعنا/ إحنا بنحب الحاج عبد المنعم/ الراجل الجدع/ إحنا هنرشحه عشان الشباب اللي معاه/ هو مرشح كل المصريين...؛
دي الفئة رقم واحد ولا يمكن تصنيفهم
لسة محتار بين عبد المنعم وعمرو موسى، إيه رأيكم؟
دي بالغالب نتاج المناظرة، اللي حسست الناس إنهم مطالبين إنهم يختاروا بين حد من اتنين، وليهم أسباب لاختيار الاتنين، ولو إن بأول توافر المعلومات عن موسى بيغيروا وقتي، حسب متطوع الحملة زي ما حكينا قبل كدة
هو أو مرسي ربنا يولي من يصلح
ده بيصدر من ناس عايزين واحد "طيب" أو من واحد سلفي مش مقتنع تمامًا بدعم حزب نور لأبو الفتوح دونًا عن محمد مرسي

أوووه أنا بحبه راجل جونتي (=لطيف) أوي
خلاص مش هاقول مين ممكن يقول كدة... أول فئة معروفة، تاني فئة هي نسبة مش صغيرة من الكاثوليك

هانتخبه ده الإخوان خبطوا فيه أوي
دي النسبة رقم 4 من ناس لا يمكنك تصنيفها وفئة أخرى من السلفيين المتضايقين من الإخوان

شفيق: أيوة أعلى من حمدين في الشارع مش في الكلية
هو مرشح المجلس وإحنا عايزين حد ما يحاسبش الجيش
دي الفئة الأولى، واللي بتخص بالذكر أبو الفتوح إنه راجل مفتري وعايز يتشطر ع الجيش، عشان قال ف المناظرة كلمة "محاسبة" مع إن موسى قالها بس ماسكينها لأبو الفتوح بس
معلش خبرته في المطار مش شوية، أيوة إحنا فلول بقى، وهيجي يلمكم بالدبابات يا بتوع التحرير
دي الفئة التانية
معلش هو برضه ما أخدتش فرصته يشتغل مع مبارك عشان نحكم عليه
دي الفئة التالتة ويمكنها تغيير  رأيها لما تعرف تفاصيل عن المطار وقضايا إهدار المال و...و...؛

حمدين: لا نسمع عنه إلا كل كام يوم مرة
لسة بافكر ما بين حمدين وأبو الفتوح
الفئة الأولى بتقول كدة شبه الانترنت
واحد مننا بس شعبيته مش جامدة صح؟ أنا ممكن أبدله بأبو الفتوح أو موسى لسة مش متأكد
الفئة التانية بتقول كدة فعلا
إحنا بنحب عبد الناصر، وهو يرجع لنا عبد الناصر
الفئة التالتة المؤيدة لحمدين، شايفة فيه عبد الناصر وإنه اتكلم قدام السادات

العوا: تكاد لا تسمع عنه إلا سؤال الناس هو بيصرف منين، خصوصا إن دعايته وهمية ف اسكندرية
(ومعروف إنه الدعم المادي أكبر من البشري في الحملة، وبالأساس حسب ما سمعت من صاحب سلسلة مطاعم مؤمن)

خالد علي: تكاد لا تسمع عنه في الشارع الواسع، وكان بنسب تكاد تكون معدومة فقط كان بعد ظهوره في قناة سي بي سي

------------------------------------------------------
ده تجميع ما يخطر ببالي الآن عن بوستات الشارع، ليه بقى؟
السبب اللي قررت أشارك فيه فالانتخابات مش ممارسة الديموقراطية والكلام العاطفي ده، ولا اتطلع على المستوى الفردي لديموقراطية على طريقة الدول الأجنبية، واتمنى تقوية الإدارات المحلية والذاتية على حساب المركزية

بما إن زي ما كتبت في نوت سابقة إن دي معركة وإن كان مفروضة علينا زي ما اتفرضت اعتصامات ومعارك ف الشارع على يد العسكر، وإن كان السؤال مين الكويس من ال13 فالإجابة لا أحد، ولكن الأمر المفاضلة بين السيء بنسبة 1000% والسيء بنسبة 50% أي مقبول بنسبة 50%؛
وإن وُجد اتنين على نفس درجة من القبول فالاختيار متجردًا تمامًا من المزاج أو الميول الثورية أو الكنباوية أو ... أو ...؛ هيكون للي شعبيته وفرصته أفضل، في محاولة لتطبيق العزل الشعبي قدر المستطاع

مش عارفة إمتى فهم البعض مننا، إن في رفاهية الاختيار أو إننا في انتخابات بقوائم نسبية، كل واحد هياخد أصوات هيتم تمثيله بنسبة معينة وياخد عدد كراسي، لا وحياتكم هو كرسي واحد ركزوا؛

-------------------------------------------------------------------
بحسب ما أفهم، في بعض النقاط اللي شايفة من الضروري توضيحها:
. شفيق أظن طعم عشان نحل بيه عن موسى، موسى شغال متكييس في الشارع في كل حي وزقاق، شفيق مش موجود في الشارع مش عارفة إزاي آخد في استطلاع كلنا خالد سعيد أكتر من 18 ألف وموسى ألف وشوية، اظن لجان الكترونية تمويهية؛ وإن كان ده لا يمنع إن شفيق ماريونت لقطة في إيد العسكر

. حملة محمد مرسي شغالة بثبات ومش مهتمين بالظهور الإعلامي، وبيكسبوا أرضية واسعة وكبيرة في الشارع، وبيشتغلوا بكل الطرق المختلفة سواء الحسنة أو السيئة، واللي لا تخلو من التشنيع على أبو الفتوح لسحب الأصوات منه بحديث بعض أفراد الحملة عن سوء أخلاق أبو الفتوح اللي كانت سبب أساسي في فصله من الجماعة

. ف الشارع عند مجموعات معينة، زي الانترنت، بيسألوا عن علاقة أبو الفتوح بالإخوان وإذا كان هيرجع لهم، وفي ما يعرفش عن شغله أي حاجة، دكتور باين مش كدة؟، لأن المرشح الوحيد اللي ليه انجازات هو عمرو موسى و ساعات شفيق بمطاره

. دعم الدعوة السلفية وحزب النور لأبو الفتوح كان إعلامي، والله ما بدأوا شغل في الشارع إلا يوم الأربع اللي فات، وفي ناس بترجع الكلام ده لسببين : الأول هو حديث الزعفراني (الإخوان السابق) ليهم ومعاتبتهم عن عدم المشاركة في الدعم الفعلي على الأرض، والتاني: بيقال إن صفوت حجازي في مؤتمر محمد مرسي في الورديان في الاسكندرية قال كلام يزعل القيادات السلفية، فكان الرد بدعم فعلي ف الشارع لأبو الفتوح

. إمبارح كان في مؤتمر لحزب النور في كليوباترا لدعم أبو الفتوح، ما كنش مخصص الصفوف الأولى للرجال بدقون فقط والصفوف الأخيرة للمنتقبات، كان مؤتمر شعبي كما أنزل في الكتاب، أهل المنطقة عامة من غيره تصنيفات، تخيل مؤتمر حزب النور بحضور المسيحيين؟

. على مستوى القيادات السلفية أظن من سابق تصرفاتهم في انتخابات مجلس الشعب، إن دعم أبو الفتوح معاكسة واستقلال عن الإخوان، وفعلا لا يمكن توقع في الإعادة ممكن يدعموا مين، لو مثلا عندنا مرسي قدام موسى؛

. إنما على مستوى الأفراد، من غير استهلاك للكلام ومن غير رومانسية فارغة، في أفراد الدعوة السلفية، في حملة أبو الفتوح زي حكاوي الميدان، بيكتشفوا جيرانهم وأهل حييهم وهم شغالين في حملة أبو الفتوح، مستغربينهم، كأنهم كانوا يعرفوا عننا معلومات محددة ولاقونا حاجة تانية؛

. طبعا ممكن الكلام ده ما يكنش عاجب القيادات السلفية وبالنسبة لهم ملحوقة وهيرجعوا يستقطبوا ويعزلوا ، إنما اتمنى إن التغيير يحصل عندهم من الأفراد إلى القيادات، بغض النظر عن حسابات قيادات الدعوة السلفية بالأخص، لأن السلفيين فئات؛

. دعم حزب الوسط لأبو الفتوح ف الشارع جه متأخر برضه تقريبًا بنفس توقيت حزب النور، وإن كان بعض الأفراد سبقوا من بدري، والصدارة في الدعم كانت لحزب التيار المصري، الحزب ده "شبابي" ومن أول يوم مع أبو الفتوح

. بعض الناس أقل تعلمًا التعليم الحكومي ومتعلمة أكثر من دروس الحياة، وقت ما نكلمهم شايفين إن حمدين بيتم استخدامه، مش ضروري بإدراك منه، لسحب أصوات من مرشح معين "أبو الفتوح"؛

. ع الانترنت المؤيدين لخالد علي، عارفين إنه مش هيوصل للإعادة، مش عارفة فعلا بيعملوا له دعاية على طريقة "لولا دي سيلفا" يعني يتعرف المرة دي، ويكسب الانتخابات الجاية؟ ولا بيحاولوا يشوفوا شعبيته هتوصل أد إيه؟ وكل واحد يقارن بقة شوفوا "خالد علي" جاب كام صوت، مقارنة بفلان اللي صرف كتير وما جبش، زي مثلا ضابط أمن الدولة السابق "محمود حسام" أو "الحريري"؛
وفي بيقول "أدي صوتي للصح اللي أنا شايفه وخلاص"، وفي بيطبق مقولة" لا تستوحشوا طريق الحق لقلة سالكيه" ومش عارفة ليه بيطبقوا المقولة دي هنا وهي لا تنطبق، تاني دي مش انتخابات بقوائم نسبية، هو واحد بس


. بالمثل، مؤيدي حمدين صباحي
إنما منقسمين لـ3 فئات بالأساس

- الأولى لا تفرق كثيرًا بين حمدين صباحي وأبو الفتوح، ولا تمانع إعطاء صوتها لأبو الفتوح في الإعادة على إنه الأقرب لحمدين؛
لا أجده الأقرب لحمدين بأي شكل، لأن حمدين صباحي ثائر كما كان القذافي ثائرًا. إذا بيقولوا غير متلون فالقذافي وصدام حسين والأسد كذلك غير متلونين، ثابتين على تفكيرهم وإعجابهم بنفسهم، زي حمدين، ثائرًا معجب بذاته، وكان متمول من القذافي.... مش عارفة إزاي واحد "هيرد الكرامة" - أصلا مفيش حاجة اسمها كدة، كل واحد يحفظ كرامته لنفسه - وهو كان بياخد تمويل وبيطبل للقذافي ويمتدحه في ملحق جريدة 37 صفحة، ومصايب القذافي معروفة وقديمة من زمن قبل ما نتولد إحنا، إزاي ما كنش عارفها؛
تحديث:: يقال إنه في حلقة "ناس بوك" مع هالة سرحان، قال إنه يرفض يكون نائب لأحد، لأن "لا يصلح إلا أن يكون رئيسًا"؛ وأعرف إنه في لقاء مع لميس الحديدي رفض تاني فكرة إنه يكون نائب" بس ساعتها اختار إن يكون السبب إنه هيقدر يمارس عمله كمواطن"؛

أكره الجمع بين حمدين وأبو الفتوح في بوست واحد، حمدين كان معارض أيام السادات إنما تم تدجينه وإيجاد "كفيل" ليه كما كان الحال مع كثير من المعارضة الكارتونية في عهد مبارك؛
المعارضة النقية في عهد مبارك الأكثر شراسة إما قتلت أو نقلت لمستشفى الأمراض العقلية والمعارضة الشرسة بقدر حذر كانت تُسجن؛
ليه أي حد "ثائر" "معارض" نتوهم بيه؟ ما القذافي كان ثائر ولما وصل للحكم، كان لا يقل لعنة عن المحتل

الفئة التانية المؤيدة لحمدين ستقاطع الإعادة إن لم يصل لها

الفئة التالتة المؤيدة لحمدين هتنخب موسى أو شفيق لأنه المرشح المدني البديل، بغض النظر إنه فلول ولا لأ، وجايز أصلا نفسهم ينتخبوا موسى م الأول بس زهقوا من تأليس الناس ع الفلول واللي هينتخبهم

بالنسبة للفئة التانية والتالتة المؤيدة لحمدين أتمنى لو كانت أصواتهم لخالد علي، أكره إعطاء شرعية لشخص حمدين وفي وجود خالد علي الأحق منه بالأصوات، وإن كانت الأصوات دي مش هتكسب خالد علي، بس إحنا متفقين م الأول على وجود حسابات لمؤيدين بعض المرشحين أخد كام صوت مقارنة بتاريخه وسنه وحسابات تانية؛

أما الفئة المتأرجحة بين حمدين وأبو الفتوح، أو مستعدة يكون صوتها لأبو الفتوح ف الإعادة، بحسب الشارع وبعيدًا عن محافظة كفر الشيخ فإن حمدين غير موجود ليصل للإعادة، وبدل ما يكون مرشحك رقم 1 ورقم 2 مش موجودين في الإعادة ممكن من دلوقتي بتفكير واقعي غير رومانسي تدعم وجود الأكثر شعبية منهم في الإعادة؛ 

رفاهية أدي صوتي للي أنا عايزه اعتقد تنطبق إذا كان بديلك المقاطعة، أما إذا كنت فعلا مهتم بعزل المرشحين المتبجحين أفراد نظام مبارك، وعدم وصول مبارك مرة أخرى للحكم في شخص آخر، وفي مرشحين أكيد مش هتديهم صوتك، ونفس الوقت في مرشح نسبته كويسة وممكن يكون له صوتك في الإعادة، فخليها من دلوقتي؛ 

مش بحاول اعمل افتراضات ونظريات... التنظير بايخ والتصنيفات أبوخ، والاستفطاب غلس، فترة معتمة بتمر بينا؛

ده كان شير م الشارع البعيد عن الانترنت؛ في حين إن الغالب في الانترنت إن في تأرجح أصوات عالي بين أبو الفتوح وحمدين إنما الشارع بيقول إن التأرجح العالي للأصوات بين أبو الفتوح وموسى؛ وغيره كتير من الاختلاف بين الشارع والانترنت

اللي بيشتغل ف الشارع، يا ريت يعمل شير م الشارع ع اللي بيشوفوه، قليل من العالم الافتراضي وكثير من العالم الواقعي لا يضر

مفيش مرشح أقوى ولا أغلى م الدم اللي فات
وليقضي الله أمرًا كان مفعولًا
---------------------------------تحديث-----------------------
 عن علاقة حمدين بالقذافي
* تدوينة "وائل عباس" في ديسمبر 2006 http://misrdigital.blogspirit.com/archive/2006/09/index.html

* تدوينة عمر الهادي في سبتمبر 2006
http://asad.blogsome.com/2006/09/07/khosara_ya_karama/
*صورة ملحق الجريدة الممتدح للقذافي في 37 صفحة، وكان رئيس تحريرها حمدين صباحيhttps://www.facebook.com/photo.php?fbid=10151674670955147&set=a.10150240048230147.465706.8825501461994
* مع صدام حسين 
http://www.youtube.com/watch?v=TtWruiqMsAs

* حمدين ينكر امتداح صدام حسين
http://www.youtube.com/watch?v=AcXS4Bs8Mxk

*موقفه من الجيش السوري الحر 
http://www.youtube.com/watch?v=YHWA6PujTAY* حمدين وأهالي الشهدا، كلام
http://www.youtube.com/watch?v=_-yT4mLhgE0

* حمدين القذافي المعجب بذاته، منذ الدقيقة 5:30 
http://www.youtube.com/watch?v=N0qD4fZMLpY 
---------------------------------تحديث-----------------------
شعبية حمدين تتصاعد بين أوساط لكن مغلقة، بالأكثر موضة بين شباب الكلية، أخيرًا لقوا حد مش فلول ومش "إسلامي" وشكله كيوت
. صعود شعبية حمدين بالسحب ترتيبًا من مجموعة لم يقرر بعد إلى مجموعة شباب في سن الكلية والعشرينات، وبيحاولوا يقنعوا أهلهم اللي هينتخبوا فلول إن في أوبشن جديد موجود مش فلول ومش "إسلامي" لذلك المجموعة التالتة اللي بيستمد منها حمدين شعبيته هي اللي كانوا هينتخبوا موسى أو شفيق، أما المجموعة  الأخيرة فهي ثبات بعض ممن كان يتأرجح بين أبو الفتوح وحمدين، وثبت رأيه على الهوجة النتاوية الجديدة "حمدين"؛ ولا زال التأرجح موجودًا إلى عتبة باب اللجنة وحتى الإمساك بالقلم على ما أظن؛

. اشاعات إن الفلوس اللي اترشت فجأة على حملة حمدين في عدم وجود موارد بشرية مكافئة (أفراد للحملة) إنها دعم من الحرية والعدالة لسحب مزيد من الأصوات من أبو الفتوح لصالح حمدين، دي صعب عليا أصدقها حاسة إنها وسعت أوي، وتحالف حزب الكرامة الممثل لحمدين مع حزب الحرية والعدالة في قائمة مشتركة أثناء مجلس الشعب مش دليل داعم قوي؛

. حمدين صباحي بيشتغل إيه؟ حمدين صباحي عاطل، ليه شعار الحملة بتاعه مش "واحد مننا...عاطل زينا"؟ شيء محزن انتشار تأييد حمدين صباحي بين شباب الجامعة اللي مفروض يكونوا أكتر ناس بيدوروا ع المعلومة، ومش عارفين يردوا هو بيشتغل إيه؟ مش عشان يعرفوا إنه كان بيشتغل شغلانة تتصنف إنها "متواضعة"، لا بالعكس، عشان يدركوا حقيقة إنه ما هو إلا عاطل، واخد السياسة سبوبة، معاه كارت صحفي أي حد يطلعه، بقى رئيس تحرير جريدة الكرامة الفاشلة، اللي زي ما قلنا مدح فيها القذافي لأنه كان بيقبض منه بحسب المراجع اللي نشرناه، عضو مجلس شعب؟ هي دي وظيفة؟ وقبلها كان شغال إيه؟ شغال يتكلم في السياسة الكلام اللي بيتقال أحسن منه ع القهوة وبيقبض عليه فلوس، أول وظيفة حقيقية بعد  العمر ده، أخيرًا، هيشتغل وبقى مرشح رئاسة مرة واحد

. اللي أعرفه بخصوص حملة محمد مرسي، إنهم كانوا شغالين بقوة إن الإعادة تكون بين مرسي وموسى، يعني على قديمه، يا إخوان يا فلول، تقوم الناس تجري تختار مرسي تخلصًا من كل ما هو "مباركي"، مع التغيرات الجديدة وتصاعد شعبية أبو الفتوح غيرت حملة محمد مرسي الهدف وتتمنى بدلًا من خطر الإعادة بين مرسي وأبو الفتوح إن ما يكنش في إعادة وإن مرسي يوصل من أول جولة والهدف هو الحصول من الأصوات على 50%+1، وده ف الغالب صعب جدًا؛
. في فلول بيحلفوا إن الإعادة مش هايكون فيها مرسي وهتكون بين شفيق وموسى، مش عارفة أصوات باقي الشعب هتروح فين؛

. الشفيق مع إن شعبيته بتضمحل في الشارع إلا إن كل شوية نسمع كلام من هنا وهناك على أوامر لأهالي الجيش ممن يحق لهم الحق في الانتخاب بالتصويت لشفيق (قصتين أثق فيهم) بجانب القصة الغريبة المنتشرة بخصوص تغيير طبيعة عمل عدد 8 مليون من أفراد الأمن المركزي إلى مدني في بطاقة شخصية جديدة
http://www.twitlonger.com/show/hh1k61

.رأيي مفيش شيء يتعمل في اللحظة دي، إنما دور المراقبة وقت الانتخاب ووقت الفرز، لو اتفتحت علينا جبهة وصول شفيق يبقى ساعتها ليها تصرف، خصوصًا إن أقل الناس وصولًا للمعلومات النتاوية متأكد زينا إن لا وصول لشفيق للرئاسية إلا بالتزوير ومتغاظين من تصريحات "العباسية كانت بروفة"؛

. زيارات العزب والمناطق النائية في المحافظة، فيها قصص مختلفة، كأن تلاقي أعداد مش قليلة مش عارفة مين المرشحين، ولو سردت عليهم الأسماء مش بيميزوا منهم غير عمرو موسى، اللي كان شغال مع مبارك، عدد كبير هيقاطع لو مفيش غرامة 100 جنيه؛

. لازال في مناطق العزب، والمناطق اللي سكانها بعيد عن مكن الإعلام، لا يعرفوا بالأساس إلا 3 مرشحين: محمد مرسي وعبد المنعم أبو الفتوح وعمرو موسى، وأوقات تكون عزبة أو قرية مقسومة مش بالتساوي إلى أهلي وزمالك قصدي أبو الفتوح ومرسي، عشان في شغل استقطاب من قطبين أحزاب الشعارات الإسلامية، الأماكن دي هي أعداد السكان كبيرة، ممكن نقول دول السكان الأصليين للبلد وإحنا بتعليمنا بانترنتنا بسلطاتنا ببابا غنوجنا ضيوف عليهم؛

. في وجود موسى منتشرًا باسمه، ومحمد مرسي بتنظيم جماعته المتوغل لا يوجد شعبية لمنافستهم إلا لعبد المنعم أبو الفتوح بحملته المكونة من طلائع الحملة الأولى بالإضافة إلى المنضمين لاحقًا من حزب النور وحزب الوسط.

حتى بعد التطورات والتغييرات اللي عمر كل واحدة فيهم 3 أو 4 أيام، أجد إن الأفضل اللي عنده أبو الفتوح اختيار تاني وأي مرشح آخر فرصته متواضعة هو اختيار أول، أن ينحي الميول والرومانسية ويحكم الموضوعية بنظرة فاحصة للواقع على الأرض، ليدرك أنه لا يفل الحديد إلا الحديد، الحملة الأقوى قدام التنظيم والمال، أو السلطة والمال، هي حملة مصر القوية

ليست هناك تعليقات:

إرسال تعليق