دستور مصر 1923:
مادة 149: الإسلام دين الدولة واللغة العربية لغتها الرسمية.
دستور مصر 1971:مادة 2: الإسلام دين الدولة، واللغة العربية لغتها الرسمية، ومبادئ الشريعة الإسلامية المصدر الرئيسى للتشريع.
دستور مصر 2011:
مادة xx: إيه؟
- تعديل ... تغيير ... إلغاء؟
-------------------------------------
- المادة التانية موجودة بقالها 40 سنة وخلت المثال النموذجي للدولة الإسلامية ... الشريعة الاسلامية كانت متطبقة زي ما بيقول الكتاب... والمسلمين ليهم حقوق وواجبات زي ما بتقول الشريعة... والمسيحيين ياااه ... آخر دلع واخدين حقهم وزيادة ... واللي لا ده ولا ده برضه مظأطط... كله من خير المادة التانية اللي بقالها 40 سنة بتتطبق... إيه ده... إيه الحلاوة دي... تتشالي ليه ... خليكي.
- إيه العك ده ... الكلام ده مش صح... ده اللي كان بيروح الفجر يصلي ولا يعتكف في المسجد كان بيروح يكمل اعتكافه في أمن الدولة ... والمسيحيين اتكلم عن التفجير... مشكلة الواد والبت اللي مافهمتش اولها من آخرها .. طيب كاميليا؟ طيب المية اللي مش ولابد نقطت من مواطن على الدور اللي تحته أيام السادات... كنيسة أطفيح....
- والله إحنا اللي طفحنا... طفحنا من كتر تطبيق المادة التانية... اللي اتطبقت إمتى؟ مش فاكرة...
- لا برضه ماتتشلش .. يعني مثلا عشان قانون محاسبة الخارجين عن القانون والفاسدين ما اتطبقش بقاله سنين مش يتشال بقة؟ ما هي الثورة قامت والقوانين هتتطبق بقة والدستور هيشتغل ... والناس هتبقى كويسة... وكل شوية يدو ورد لبعض ويتصوروا سوا سوا... هممم ... بديع . جميل
أصل إحنا كانت إيدنا مربوطة ومش طايلين فكان في حاجات وحشة كتير بتحصل.. إنما دلوقتي خلاص... والشريعة الاسلامية فيها فقه للأقليات...
- إمم متأكد يعني؟ اساسا أقليات دي كلمة عنصرية جدا... ومكانتش موجودة زمان ... ومكانش في حاجة اسمها أقليات وأكثريات.... صحيح في القرآن إحنا متقسمين على حسب المعتقدات يعني بس مش بالمصطلحات ديه...
- طيب فكك من كلمة أقليات... يعني قصدي فقه بيحمي غير المسلمين
- مش مختلفين... بس مع تقصير المسلمين في تطبيق الشريعة إيه وضع غير المسلمين؟
- ماهي ديه الوحدة الوطنية... يعني يانعيش مع بعض يانموت إحنا الاتنين.. يعني لما يصدر حكم بالجواز الثاني للمسيحيين والبابا شنودة يقول "الكلام ده ما ينفعش عند الأرثوذكس، والمادة التانية قالت المصدر الأساسي للتشريع الإسلام والإسلام بيقول إن غير المسلمين يحكموا بقانونهم في الأحوال الشخصية" نقول له لع- تؤ-لا إحنا في وقت ضعف دلوقتي ومفيش احترام حقيقي لمبادئ الشريعة الاسلامية؟؟
- صحيح مفيش كلمة أحوال شخصية زمان يعني... المقصود من الآخر مش هانحشر نفسنا في تفاصيل الجواز والمواريث ... أو قاضي حنين يقول ذنبه إيه الراجل ده مايتجوزش تاني أما اسمح له بالجواز... البابا شنودة قال هو ده الدين بتاعنا ... واللي عايز يخالف كدة يشوف ملة تانية... ممكن بقة يحول طايفة تانية ماتمنعش جوازه أو يتجوز جواز مدني والكنيسة بقى تعلن إنها مش عايزاه.. المهم إن مانفضلش ننخر في اللوائح بتاعة كل ديانة ونقضيها كدة.
- طيب يعني البابا شنودة استعان بالمادة الثانية أهو، عايز إيه بقة؟
- أنا ماسألتوش ... بس يعني من بعيد كدة لو مكانه مش هافضل رابطة نفسي بإن المسلمين بيطبقوا الشريعة كلها ولا ونصها... ومش ذنب الكنيسة الأرثوذكسية إن بيعدي على المسلمين أوقات ضعف وتجاهل للشريعة... طيب إيه؟--------------------------------------
دستور مصر 2011:
مادة 2: اللغة العربية اللغة الرسمية للدولة، ومبادئ الشريعة الإسلامية المصدر الرئيسى للتشريع بما فيها العمل في قضايا الأحوال الشخصية بموجب اللوائح الخاصة بكل ديانة.
ياسلام كدة بقة اتحلت المعضلة... بصراحة مش عارف
ليست هناك تعليقات:
إرسال تعليق